‘Yeye udi ukolesha badi bapungile’
1 Tuetu bonso tutu anu tutshioka amue matuku. Kutshioka eku kakutu kufuma anu ku mudimu utudi tuenza anyi ku malu makuabu to, kadi kutu kufuma kabidi ku ntatu itudi tupetangana nayi mu ‘matuku a malu makole’ aa. (2 Tim. 3:1) Kadi mmunyi mutudi mua kupeta bukole bua kumona mua kuenzela Yehowa mudimu too ne ku ndekelu? Tudi ne bua kueyemena Yehowa, bualu yeye udi ne ‘bukole bunene.’ (Yesh. 40:26) Yehowa mumanye bimpe bitudi tukengela ne mmusue kutuambuluisha ne muoyo mujima.—1 Pet. 5:7.
2 Malu adi Yehowa mulongolole bua kutuambuluisha: Yehowa udi utukolesha ne nyuma wende. Nyuma eu ke uvuaye muenze nende mudimu bua kufuka bintu bionso. Nyuma eu udi utuambuluisha bua ‘kupeta bukole bupiabupia’ patudi tutshioka. (Yesh. 40:31, MMV) Mpindieu diebeja ne: ‘Kukadi matuku bungi kayi katshia ngalomba Nzambi anu nyuma wende bua kumpeshaye bukole bua meme kuenza midimu idiye mumpeshe?’—Luka 11:11-13.
3 Yehowa udi utukolesha kabidi ne Dîyi diende. Patudi tubala Bible dituku dionso, tubala kabidi mikanda yetu bikole ne tuelangana meji pa bitudi tubala abi, tudi tulua anu bu ‘mutshi wakakunabu ku muelelu wa mâyi, udi ukuama mamuma au mu tshidimu tshiawu; dibeji diawu kadiena difubidila.’—Mus. 1:2, 3.
4 Yehowa udi utukolesha kabidi ku diambuluisha dia bena Kristo netu badi mua kuikala “busambi” kutudi. (Kolos. 4:10, 11) Bana betu aba badi batukolesha mu bisangilu patudi tuyukila nabu, ku mandamuna abu ne ku miyuki idibu benza. (Bien. 15:32) Nangananga bakulu ke badi batusamba ne malu a kudi Nzambi.—Yesh. 32:1, 2.
5 Mudimu wa buambi: Wewe udiumvua muikale mutshioke, kulekedi kuyisha to! Mudimu wa buambi mmushilangane bikole ne mikuabu bualu wowu udi utupeshilula bukole. (Mat. 11:28-30) Kuyisha lumu luimpe kudi kutuambuluisha bua kulamata Bukalenge bua Nzambi ne kulama mu lungenyi malu malenga ikalabu ne bua kututuadila.
6 Tudi ne mudimu wa bungi wa kuenza kumpala kua kubutulabu ndongoluelu mubi wa malu eu. Tudi ne bua kutungunuka amu ne kuyisha tuetu tueyemena ‘bukole buakatupa Nzambi.’ (1 Pet. 4:11) Tudi mua kuenza mudimu wetu too ne ku ndekelu, bualu Yehowa ‘udi ukolesha badi bapungile.’—Yesh. 40:29.