Utuku wakuila Dîyi dia Nzambi anyi?
1 Padi bantu bavule bapepeja Bible, bena Kristo balelela bobu badi bitaba Mukanda wa Nzambi eu. Anu bu Yezu Kristo, tudi tuitaba ne: ‘Dîyi dionso dia mu Mukanda wa Nzambi didi difume munda mua Nzambi.’ Yezu wakajadika bualu ebu pakasambilaye Yehowa wamba ne: ‘Dîyi diebe mbulelela.’ (2 Tim. 3:16; Yone 17:17) Kadi mmunyi mutudi mua kuakuila Dîyi dia Nzambi edi mudibi bikengela?
2 Ikala ulonga Mukanda wa Nzambi: Yezu uvua ulonga Mukanda wa Nzambi bikole. Ke bualu kayi uvua ulongesha nawu kakuyi lutatu pavuaye uyisha bantu. (Luka 4:16-21; 24:44-46) Mmunyi mutudi mua kufika ku dikuata mvese ya bungi mu mutu? Mpatudi tubala Bible dituku dionso diakafuka Nzambi edi ne tuela meji pa mvese utudi tumona ne: udi utukolesha anyi neambuluishe bantu batudi tuyisha bimpe. Patudi tulongolola bisangilu, tudi ne bua kukeba mvese idibu bafile ne kuyibala anu mu Bible, ne pamuapa kulongolola tshia kuamba pa mvese au mu bisangilu. Patudi mu bisangilu, tudi ne bua kuikala tuenda tulondesha mu yetu Bible mvese yonso idi ngamba-malu ubala. Kulonga Bible kudi kutuambuluisha bua ‘kuludikila bantu njila mululame mu Dîyi dia Nzambi.’—2 Tim. 2:15.
3 Lekela Mukanda wa Nzambi wakule: Patudi mu buambi, tulekele Bible nkayende akule. Tshilejilu, padiku mushindu, mbimpe tubadile muntu yonso mvese. Padi muntu utuela lukonko anyi wela mpata, mbimpe kumuandamuna ne Bible. Nansha muntu yeye ne mudimu, kudi mushindu wa kumuleja lungenyi kampanda lua mu Bible tuetu bamuambile tshianana ne: “Kumpala kua meme kukushiya, itaba bua nkubadilaku mvese umue patupu.” Padiku mushindu, bulula Bible webe ne bala mvese au mu mushindu wa yeye kuikalaye wenda ukulondesha.
4 Tshilejilu, pakabadilabu muntu mukuabu mvese udi uleja mudi dilongesha dia Busatu Bunsantu dikale dia dishima, wakamba ne: “Ntu nya mu nzambi katshia bandela, kadi tshivua mumanye ne: Bible utu wamba bualu ebu to!” Wakitaba diakamue bua kutuadijabu kulonga nende Bible. Yezu wakamba ne: mikoko yende ivua ne bua kumvua dîyi diende. (Yone 10:16, 27) Mushindu muimpe utudi mua kuambuluisha bantu ba muoyo muimpe bua kuitababu ne: etshi ke bulelela, nkubalejabu mu Bible nkayende. Nunku tuakuilayi Dîyi dia Nzambi bualu didi ne bulelela!