Kolesha badi batamba kunyingalala

¹ Kakuena tshikondo tshidi tshikengela kukolesha bantu ku muoyo bu etshi to. Tuetu petu tudi ne bua kudienzeja bua ‘kusanguluja mitshima ya badi batamba kunyingalala’ anu bu Mfumuetu Yezu Kristo.​—Yesh. 61:1.

² Tshia kuenza: Bua tuetu kukolesha bakuabu ku muoyo patudi mu buambi, tudi ne bua kuikala ne nkatshinkatshi ne kubambila mêyi adi akankamija. Tudi ne bua kuakula bua malu mabi adi enzeka pa buloba ne malongesha a dishima anu mu mêyi makese, ne kupita diakamue ku bulelela budi Bible ulongesha ne malu adi akolesha ku muoyo adi Nzambi mulaye. Abi kabiena bisua kumvuija ne: katuena mua kuakula bua Armagedone to. Mudimu wetu ngua “kuambila bantu bua tshidimu tshia diakalengele dia Yehowa, ne bua dituku dia disombuela dia Nzambi wetu” ne bua ‘kuambila muntu mubi bua adimuke, alekele nsombelu wende mubi.’ Kadi, kumanyisha dilua dia Armagedone ne kumvuija muabutulaye bantu babi, kakuena ne bua kubuitshidija tshiena-bualu tshia lumu luimpe lua bukalenge bua Nzambi to.​—Yesh. 61:2; Yeh. 3:18; Mat. 24:14.

³ Ku nzubu ne ku nzubu: Patutu mu buambi tutu tupetangana ne bantu badi basama, badi bafuishe balela babu, badibu benzele malu ne kansungasunga anyi badi kabayi ne mushindu wa kupeta makuta. Anu bu Kristo, patudi tupetangana ne bantu ba mushindu eu mu buambi, tudi ‘tubafue luse’ ne tuleja mutudi tuditeka pa muaba wabu. (Luka 7:13; Lomo 12:15) Nansha mutudi mua kubala mvese umue anyi ibidi idi ipetangana ne bualu budi nabu muntu, tudi ne bua ‘kumvua lubilu’ bua amone mua kutuambila malu adi mamutonde. (Yak. 1:19) Patudi tuanji kuteleja muntu bimpe, tudi tupeta mushindu wa kumukolesha ku muoyo.

⁴ Nuenu bamane kuyukila ndambu, udi mua kumuambila ne: “Ndi musue kukulejaku amue mêyi a mu Bible adi akolesha ku muoyo.” Wikale ne budimu bua kulu kuleja muntu ngelelu mubi wende wa meji yonso udiye muleja. Kadi tshipatshila tshietu ntshia kumukankamija ne kumukolesha ku muoyo ne mvese ya mu Bible. Bua kumanya tshia kuenza, tangila mukanda wa Comment raisonner à partir des Écritures mu dibeji dia 119-122, muinshi mua mutu wa bualu wa “Encouragement.” Peshi udi mua kupesha muntu trakte wa Dikoleshibua ku muoyo bua bena tunyinganyinga tukole ne kukonkonona nende mêyi adi akolesha ku muoyo adimu.

⁵ Keba mishindu ya kukankamija bakuabu: Udiku mumanye muena mutumba nebe, muena mudimu nebe anyi mulongi wenu anyi mulela webe udi mutekete mu mikolo anyi? Kuenaku mua kudienzeja bua kuya kumumona ku nzubu kuende bua kumukankamija ne mêyi a mu Bible anyi? Wewe mumanye lutatu ludi bantu aba nalu, udi mua kudianjila kudilongolola bilondeshile lutatu alu. Bamue batu bafundila bantu ba mushindu eu mikanda anyi bababikila ku telefone bua kubakankamija. Dinanga ditudi banange muntu netu didi ne bua kutusaka bua kuleja bantu abu mutudi tudiumvua bua lutatu ludibu nalu ne kubakankamija ne mêyi mimpe a mu Bible.​—Luka 10:25-37.

⁶ Eyowa, mbatupeshe mudimu wa kusamba badi mu madilu, kusanguluja mitshima ya badi batekete ne kubapesha ditekemena dia malu mimpe adi kumpala eku. Bantu ba pa buloba bujima badi dijinga ne busambi ebu. Kuambila bantu badi batekete ku muoyo malu mimpe a bungi adi Nzambi mutulaye nekubakoleshe. Tuvulukayi misangu yonso ne: tudi ne bua kusanguluja mitshima ya badi batamba kunyingalala.