Ambuluisha balongi ba Bible bua balue bamanyishi ba lumu luimpe
1 Mudimu uvua Yezu mupeshe bayidi bende udibu baleje mu Matayo 28:19, 20 uvua wa kuenza pa buloba bujima. Uvua muambile bayidi bende bua kuvuija bantu ba bungi bayidi bua bobu pabu bavuije bakuabu bantu bayidi. Mudimu wabu uvua ne bua kuambuluisha bua kuyisha lumu luimpe lua Bukalenge bua Nzambi pa buloba bujima mu matuku a ku nshikidilu atudi aa.—Mat. 24:14.
2 Tudi mua kulonga Bible ne bana betu balela anyi bantu bakuabu badi bitaba bua tuetu kulonga nabu. Tudi ne bua kubambuluisha bua bamanye dibanza didibu nadi dia kuambuluisha pabu bantu bakuabu bua balue bayidi ba Yezu Kristo.—Luka 6:40.
3 Ubalongolole bua kuyishabu: Ikala usake bantu baudi ulonga nabu Bible bua kuambila bakuabu bidibu balonga. Balondela malu mimpe a mu buambi. Longesha bana bebe mua kuyisha bimpe kutuadijila anu ku buana buabu bilondeshile malu adibu mua kuenza. (Mus. 148:12, 13) Malu audi wamba ne biudi wenza bidi ne bua kubaleja ne: mudimu wa buambi udi ne mushinga wa bungi mu nsombelu webe.—1 Tim. 1:12.
4 Bantu badi Yehowa witabila bua kuyisha badi anu aba badi bitaba mikenji yende ne bayitumikila. Ntshia bushuwa ne: bamanyishi bapiabapia kabena ne dimanya dia bungi bu dia bakadi badilambule ne batambule ne benzenze mudimu eu to. Kadi badi ne bua kuitaba malongesha manene a mu Bible ne kumanya mua kuumvuija bakuabu. (Bala mukanda wa Bulongolodi, dib. 79-82.) Badi ne bua kuikala bamane kupatuka mu “Babulona munene,” kabatshiyi babuelakana mu malu a tshididi, ne badi ne bua kuikala babuela mu bisangilu bionso bia tshisumbu.—Buak. 18:2, 4; Yone 17:16; Eb. 10:24, 25.
5 Paudi umona ne: muntu uudi ulonga nende Bible mmukumbane bua kulua mumanyishi udi kayi muanji kutambula, ambila mutangidi muludiki. Neambile bakulu babidi bua nuye nabu bua kuyukila nende bua bamone ni mmukumbaje malu adi akengela bua kutuadijaye kuyisha ne bena mu tshisumbu. Wewe ke wikala ne diakalenga dia kutungunuka ne kulongesha mulongi webe wa Bible mudimu wa kuyisha paudi uyisha nende.