Kujimiji dîba paudi mu buambi

¹ Kutshidi mudimu wa bungi wa kuenza mu buambi kadi nkutushadile anu dîba dikese. (Yone 4:35; 1 Kol. 7:29) Tuetu badilongolole bimpe bua mudimu wetu, katuakuikala tujimija dîba mu buambi.

² Ikala mudilongolole: Kumpala kua wewe kuya mu tshisangilu tshia mudimu wa buambi, tangila ni udi ne mikanda iwikala nayi dijinga ne ni udi mulongolole bia wewe kuamba mu buambi. Padibu anu benza disambila, ndaku diakamue mu buambi. Wewe muenze nanku, wewe ne baudi uyisha nabu nenuenze mudimu wa bungi mu dîba dinudi badikosele bua kuyisha.

³ Bakulu bobu bakusungule bua kulombola tshisangilu tshia mudimu wa buambi, tuadija pa dîba. Kuakudi bia bungi to, bualu tshisangilu etshi tshidi ne bua kuenza minite 10 anyi 15. Kumpala kua bantu kupatukabu, leja muntu yonso wapatukabu nende ne muaba wayabu kuyisha.

⁴ Paudi mu buambi: Padi anu tshisangilu tshia buambi tshijika, kujingakanyi to, ndaku diakamue mu teritware. Binuikala baye mu buambi ne tshisumbu tshia bantu ne udi mulongolole bua kumbuka mu teritware lukasa, udi pamuapa mua kulongolola mushindu wa kupingana nkayebe bua kupetesha bakuabu mushindu wa kushalabu kuyisha. Panudi nuyisha mu kasumbu, ikala uditeka pa muaba wa bakuabu badi mua kuikala bakuindile bua ujikije kuyukila ne muntu. Bidi mua kukulomba bua kukeba ne budimu mushindu uudi mua kushiyangana ne muntu muena mpata anyi kumvuangana ne muntu udi musue kumanya bia bungi bua kupingana musangu mukuabu.​—Mat. 10:11.

⁵ Paudi upinganyina bantu, mbimpe kuanji kujikija ne bantu ba muaba umue, kumpala kua kuya muaba mukuabu. Kuoku mushindu, udi mua kubikila bamue bantu ku telefone bua kumanya ni badi ku mabu. (Nsu. 21:5) Wewe mulongolole bua kuyukila ne muntu mutantshi mule, numvuangane ne bena mu kasumbu bua bayishe pabuipi apu anyi baye kuenza dikumbula dikuabu.

⁶ Tudi mu tshikondo tshidi dinowa dinene dienzeka. (Mat. 9:37, 38) Mudimu eu ukadi pa kujika. Nunku tudienzejayi bua kubenga kujimija dîba patudi mu buambi.