‘Mêyi enu ikale matue bu luepu misangu yonso’

1. Kuakula ne ‘mêyi matue bu luepu’ kudi kumvuija tshinyi?

¹ Bible udi utubela ne: ‘Mêyi enu ikale ne ngasa misangu yonso, matue bu luepu, bua nuenu numanye mua kuandamuna muntu ne muntu dîyi.’ (Kolos. 4:6) Kuakula ne mêyi matue bu luepu kudi kumvuija kusungula mêyi mimpe ne kuakula mu mushindu udi usankisha muntu utudi tuambila. Kuakula nunku kudi ne mushinga wa bungi patudi tuyisha.

2. Mmunyi muakafika Yezu ku diyisha mukaji muena Samalea?

² Tshilejilu tshia Yezu: Pavua Yezu musombe wikisha pabuipi ne tshina tshia mâyi kampanda, wakatuadija kuyukila ne mukaji muena Samalea uvua mulue bua kusuna mâyi. Pavuabu bayukila, muena Samalea au wakakula misangu ya bungi bua lukinu luvua pankatshi pabu ne bena Yuda. Kulejaye kabidi muvuaye witaba ne: bena Samalea ndelanganyi ya Yakobo nansha muvua bena Yuda babamona bu bantu ba bisamba bikuabu. Yezu kakatuadija kukokangana nende pa malu aa to, kadi wakatungunuka anu ne kuyukila nende bimpe. Bualu ebu buakamuambuluisha bua kuyisha mukaji au ne bantu ba mu musoko wabu.​—Yone 4:7-15, 39.

3. Mmunyi mutudi mua kuidikija Yezu patudi mu buambi?

³ Tumanye ne: Tshipatshila tshietu patudi tuyisha ntshia kuambila bantu “lumu luimpe lua malu mimpe.” (Lomo 10:15) Tudi basue kuambila bantu malu adi akolesha ku muoyo a mu Bible, katuena tuya bua kubaleja ne: bidibu bamanye mbia dishima to. Padi muntu utuambila bualu budi kabuyi bulelela, katuena ne bua kumuleja diakamue ne: udi mu dipanga to. Kudiku bualu buimpe mu bidiye muambe abi butudi mua kumuelela kalumbandi ne muoyo mujima anyi? Tshilejilu, tudi mua kumubadisha mvese pa kumuebeja ne: “Ukatu mukonkonone tshidi mvese eu wamba anyi?”

4. Ntshinyi tshitudi ne bua kuenza muntu yeye utuamba mêyi mabi?

⁴ Kadi netuenze tshinyi bikala muntu utuamba mêyi mabi anyi tuetu bamone ne: mmusue anu tukokangana nende? Tutungunuke anu ne kuikala ne lutulu ne kuakula ne dîyi dimpe. (2 Tim. 2:24, 25) Muntu yeye kayi musue kuteleja lumu luimpe lua Bukalenge, mbimpe tushiyangana nende mu buimpe.​—Mat. 7:6; 10:11-14.

5. Mmunyi muvua kuandamuna ne dîyi dimpe kuambuluishe muanetu wa bakaji mukuabu?

⁵ Malu mimpe atudi tupeta: Pavua muanetu mukuabu wa bakaji ukeba kuyisha muena mutumba nende, mamu au wakafika munda ne kutuadija kumuamba mêyi mabi. Muanetu wakamuandamuna ne dîyi dimpe ne: “Umfuilaku luse mukuetu tshivua musue bua kukufikisha munda to, ushale bimpe.” Mbingu ibidi pashishe, mamu au wakalua kua muanetu wa bakaji ne kumulomba luse bua tshivuaye muenze ne kuitabaye bua kuteleja tshivua muanetu au musue kumuambila. Kuandamuna bantu ne dîyi dimpe kutu misangu ya bungi kupetesha malu mimpe.​—Nsu. 15:1; 25:15.

6. Bua tshinyi mbimpe tuikale ne mêyi matue bu luepu patudi tuyisha?

⁶ Dienzeje bua kuikala ne dîyi dimpe paudi uyisha lumu luimpe. Nansha muntu yeye kayi musue kututeleja, udi mua kulua kuitaba bua kuteleja Bantemu ba Yehowa bakuabu paluabu kumutangila musangu mukuabu.