Tuvuluke mulambu wa Yezu ne dianyisha
1, 2. Mmalu kayi adi atusaka bua kuvuluka mulambu wa Yezu ne dianyisha?
1 Bena Kristo ba pa buloba bujima nebadisangishe mu Disambombo dia 22 ngondo muisatu wa 2008 panyima pa dîba dimane kubuela bua kuvuluka lufu lua Yezu Kristo anu bu muvuaye mubambile bua kuenza. (Luka 22:19; 1 Kol. 11:23-26) Tudi tuenza bualu ebu bua kuleja dianyisha dietu bua bionso bivua bienzeke dituku divua Yezu mufue kukadi mpindieu bidimu 1 975. Yezu wakatumbisha dîna dia Tatuende ne wakaleja mu mushindu mutambe buimpe muvua malu avua Satana muambe bua Yehowa mikale a dishima, bualu wakalama muoyo mutoke nansha muvuaye mukenge mufike too ne ku difua pa mutshi wa makenga.—Yobo 1:11; Nsu. 27:11.
2 Mashi a Yezu akajadika tshipungidi tshipiatshipia tshidi tshifikishe bantu bapange bupuangane bua kuluabu bana ba Nzambi ne bua kukokeshabu ne Kristo mu Bukalenge buende bua mu diulu. (Yel. 31:31-34; Mâko 14:24) Mulambu wa Yezu wakaleja kabidi mudi Nzambi munange bantu bikole, bualu wakitaba bua kufila Muanende munanga bua kufuilaye bantu anu muvua Yezu muleje Nikodemo.—Yone 3:16.
3. Ntshinyi tshiapeta bantu babuela mu Tshivulukilu?
3 Tubikile bantu bakuabu: Mu Mudimu wetu wa Bukalenge wa ngondo wa kumpala, bavua batuambile bua kufunda mêna a bantu batudi bamanyangane nabu ne kubikila muntu ne muntu wa kudibu. Ukadiku mutuadije kubikila bantu bauvua mufunde anyi? Ukadiku mudilongolole bua kuyisha bikole mu mudimu wa pa buawu wa kubikila bantu mu Tshivulukilu watuadija mu dia 1 dia ngondo muisatu anyi? Bantu babuela mu Tshivulukilu, nebumvue malongeshe a mu Bible akolesha ditabuja diabu mu mulambu wa Yezu, ne ditabuja edi nedibapeteshe muoyo wa kashidi.—Lomo 10:17.
4. Bua tshinyi tudi ne bua kufika kumpala kua dîba mu Tshivulukilu?
4 Bantu bonso badi ne mushindu badi mua kufika kumpala kua dîba bua kuakidila benyi ne disanka. Bu mutu bantu ba bungi babuela mu Tshivulukilu, mbimpe tutambe kutabalela benyi betu ne bantu batu imue misangu babuela mu bisangilu bietu.
5. Mmunyi muudi mua kulongolola muoyo webe bua Tshivulukilu?
5 Ulongolole muoyo webe: Mu kakanda ka Tukonkononayi Mifundu dituku dionso 2008 ne mu Kalandriye ka 2008, mudi programe wa pa buende wa dibala dia Bible bua Tshivulukilu kutuadijila mu dia 17 ngondo muisatu. Kubala malu a mushinga avua menzeke mu matuku a ndekelu a Yezu pa buloba nekukuambuluishe bua kulongolola muoyo webe bua Tshivulukilu. (Eze. 7:10) Kusambila ne kuelangana meji bua malu aa nekukoleshe dianyisha diebe bua dinanga didi Yehowa ne Muanende batuleje padibu bafile mulambu wa Yezu.—Mus. 143:5.
6. Kukolesha dianyisha dietu bua mulambu wa Yezu kudi kutuambuluisha ku tshinyi?
6 Bu mudi Tshivulukilu tshisemene pabuipi, tudilongolole bimpe ne tuambuluishe bakuabu bua badilongolole pabu. Kuvuluka mulambu wa Yezu ne dianyisha nekukoleshe malanda etu ne Yehowa ne Muanende. (2 Kol. 5:14, 15) Nekutusake kabidi bua kubidikija pa kunanga bantu bakuabu ne muoyo mujima.—1 Yone 4:11.