Mandamuna ku nkonko yenu
▪ Tuikale ne mvuadilu wa mushindu kayi patudi tuya miaba idibu benzela Yehowa mudimu anyi itutu tumutendelela?
Nzubu ya Bukalenge, Nzubu ya mpungilu ne ya Betele idi pa buloba bujima mmiaba mijidila kudi Yehowa bua kumutendelela anyi kumuenzela mudimu. Nzubu eyi mmikumbanyine, mmilama ne mankenda ne miakaja bimpe, idi itumbishisha Nzambi. Mmishilangane bikole ne nzubu ya batumone batuambe itu mu bulongolodi bua Satana ebu. Bantu badi baya miaba itubu benzela Yehowa mudimu anyi bamutendelela eyi badi ne bua kumueneka ne: mbantu ba Yehowa badi benza disua diende.
Tuetu bena Kristo tudi “tudimanyisha bu bena mudimu ba Nzambi” mu malu onso, nansha ku mvuadilu wetu muimpe udi mutuakanyine ne didilengeja dia mubidi dimpe. (2 Kol. 6:3, 4) Tudi kabidi ne bua kuikala ne bikadilu bimpe. Tuikale misangu yonso tuvuala ne tudilengeja ne bukalanga ne kanemu mu mushindu udi muakanyine bantu ba Yehowa Nzambi. Bidi nanku nangananga patudi tuya kuendakana ku biro bietu bia ku New York bidi bilombola mudimu wetu pa buloba bujima ne ku biro bietu bia mu matunga makuabu.
Mukanda wa Bulongolodi budi buenza disua dia Yehowa udi uleja mushinga wa divuala ne didilengeja biakane padiwu wakula bua mankenda a mubidi, mvuadilu muakanyine, ne didilengeja bimpe patudi tuya mu mudimu wa buambi ne mu bisangilu bietu kabidi. Pashishe, udi wamba mu dibeji dia 138, tshikoso 3 ne: “Kupu muoyo ne: dîna Betele didi diumvuija ‘Nzubu wa Nzambi.’ Nunku, bilamba bietu, nsuki yetu ne ngikadilu yetu bidi ne bua kuikala muomumue ne patutu tuya kutendelela Yehowa mu Nzubu wa Bukalenge.” Bamanyishi ba Bukalenge bonso batu baya ku Betele wa muaba udibu basombele anyi badi bafuma miaba ya kule badi ne bua kutumikila dîyi edi. Dîba adi, badi baleja mudibu ne dianyisha ne kanemu.—Mus. 29:2.
Mvuadilu wetu udi ne bua kuleja mutudi bantu badi ‘batshina Nzambi.’ (1 Tim. 2:10) Mvuadilu wetu muimpe ne didilengeja dietu diakane bidi biambuluisha bantu bua kunemekabu ntendelelu wa Yehowa. Kadi bidi bimueneka ne: bana betu bakuabu batu baya miaba itubu benzela Yehowa mudimu eyi batu ne kalengu kakole mu mvuadilu, anyi bavuala bintu kabiyi biakanyine to. Nansha mu tshikondo kayi, muena Kristo kêna ne bua kuikala ne mvuadilu wa nunku to. Bituikale tuya kutangila nzubu idibu benzela mudimu anyi tuya mu bisangilu nansha mu malu makuabu onso a bena Kristo, tuikale ne mvuadilu ne ngezelu wa malu udi uleja dishilangana didi pankatshi pa bantu ba Nzambi ne bena panu. Tuenzayi malu onso anu bua kutumbisha Nzambi.—Lomo 12:2; 1 Kol. 10:31.
Nunku, patudi tuya ku biro bidibu balombuela mudimu wetu wa pa buloba bujima ku New York anyi ku Betele mikuabu yonso, nansha bituikale badianjile kudilongolola bua kupitshilaku anyi bapitshilaku mu mpukapuka patudi mu dikisha, tudikonke ne: ‘Ndi mudilengeje ne muvuale mu mushindu muakanyine udi uleja kanemu bua muaba undi nya anyi? Udi bitumbishisha Nzambi wetu anyi? Udi ukoka bantu ntema anyi ubatondesha nsombelu anyi?’ Mvuadilu wetu ne ndengejilu wetu wa mubidi bikala misangu yonso ‘bitumbisha diyisha dia Nzambi, Musungidi wetu, mu malu onso.’—Tito 2:10.