Mushindu utudi mua kuambuluisha babuela mu Tshivulukilu
1. Mmalu kayi ikala bantu mua kudimuena mu dia matuku 22 a ngondo muisatu eu?
1 Mu dia matuku 22 a ngondo muisatu eu, bantu miliyo ya bungi pa buloba bujima nebadimuene malu a bungi a mushinga. Bantu babuela mu Tshivulukilu nebumvue muyuki udi wakula bua dinanga dikole divua Yehowa muleje pakafilaye mulambu wa kupikula nawu bantu. (Yone 3:16) Nebamanye tshidi Bukalenge, ne mushindu wikala Yehowa mua kuenza nabu mudimu bua kukumbaja disua diende pa buloba buonso. (Mat. 6:9, 10) Nebamone dinanga ne buobumue budi nabu bantu ba Nzambi ne mushindu utuabakidila ne musangelu.—Mus. 133:1.
2. Mmushindu kayi utudi mua kuambuluisha bantu batudi tulongesha Bible bavua babuele mu Tshivulukilu?
2 Balongi ba Bible: Bamue ba ku bantu bikala mua kubuela mu Tshivulukilu etshi mbatudi batuadije kulongesha Bible. Ubamanyishe kudi bana betu bakuabu bua bamanyangane. Ubumvuije mushindu utu bisangilu bietu bienzeka lumingu luonso, ubaleje ne imue miaba ya ku Nzubu wa Bukalenge. Ngamba-malu neabalombe mu muyiki wenzaye bua batungunuke ne kuvudija dimanya diabu dia malu a Nzambi. Nanku, udi mua kuambulula mêyi a ngamba-malu bua kusaka mulongi webe wa Bible bua kuyaye kumpala.
3. Tshia kuenza ntshinyi bua kukolesha bamanyishi bakadi balekele kuyisha ku muoyo bua bikala babuela mu Tshivulukilu?
3 Bakadi balekele kuyisha: Bamue ba ku bantu babuela mu Tshivulukilu mbamanyishi bakadi balekele kuyisha. Ndaku ubele muoyo ne disanka. Kubedi nkonko pa nsombelu udibu nende anyi kubambi malu adi mua kubatondesha nsombelu to. Bakulu badi ne bua kuya matuku makese kunyima kua Tshivulukilu bua kubatangila, kubelaku kalumbandi bua muvuabu badienzeje bua kubuela mu Tshivulukilu ne kubabikila ne disanka dionso mu bisangilu bikuabu.
4. Mmunyi mutudi bonso mua kuambuluisha benyi badi balue mu Tshivulukilu?
4 Benyi: Bamue ba ku bantu babuela mu Tshivulukilu badi mua kuikala bamanyangana nabu, anyi bena mu dîku dietu batuvua babikile. Bakuabu bavua mua kuikala bapete dibeji dia dibikila dîba dituvua tuenza mudimu wa pa buawu. Wewe mumone bantu baudi kuyi mumanye, ndaku udimanyishe kudibu, ubajingile difika dilenga ne disanka dionso. Pamuapa kabatu banji kubuela mu bisangilu bietu to. Mu diyikila nabu, udi mua kubebeja mushindu uudi mua kumonangana nabu kabidi. Matuku makese panyima pa Tshivulukilu wewe muye kubatangilaku kumbelu anyi mubabikilaku ku telefone, udi mua kubajula dijinga dia kutuadija kulonga Bible.
5. Mmêyi kayi atudi mua kuamba bua kutuadija kulongesha muntu Bible?
5 Udi mua kuenza mudimu ne ngenyi yambabu mu muyuki wa Tshivulukilu bua kuleja muntu bua kulonga Bible ne mukanda wa Bible ulongesha paudi umupinganyina. Tshilejilu, ngamba-malu neabale mukanda wa Yeshaya 65:21-23. Paudi upingana, udi mua kutela ngenyi ya mu muyuki au ne kuamba ne: “Tangila malu malenga makuabu atudi tupetela ku mulambu wa Yezu.” Pashishe nukonkonone nende dibeji 4-5 dia mukanda wa Bible ulongesha. Anyi udi mua kuamba ne: “Bantu ba bungi badi badiebeja bua kumanya tshikondo tshiakumbana mêyi a Yeshaya aa.” Pashishe nukonkonone nende tshikoso 1-3 mu nshapita wa 9. Mushindu mukuabu mupepele wa kutuadija dilonga dia Bible ne mukanda wa Bible ulongesha ngua kuambulula anu mêyi a ngamba-malu wa muyuki wa Tshivulukilu, ne pashishe kuleja muntu mudi dilonga dienzeka.
6. Mmalu kayi atudi mua kuenza patudi tutumikila dîyi dia Yezu dia kuvuluka lufu luende?
6 Tuetu bonso tukebayiku mushindu wa kuambuluisha balongi ba Bible, bamanyishi bakadi balekele kuyisha ne benyi balua mu Tshivulukilu. (Luka 22:19) Kakuyi mpata, Yehowa neabeneshe mudimu wa Bukalenge utuenza wa pa mutu eu.