“Ikalayi ne muoyo wa dianyisha”
1 Pavua Yezu muondope bantu dikumi disama dia nsudi, anu muntu umue ke uvua mupingane bua kumuela tuasakidila. Ke Yezu kumukonka ne: ‘Bantu dikumi kabena balengejibue anyi? Apu tshitema tshidi penyi?’ (Luka 17:11-19) Nanku, tuikalayi bena dianyisha ne disakidila bua kupa kuonso kuimpe ne kuakane kudi Yehowa Nzambi Tatu wetu udi mu diulu wa dinanga ne kalolo utupesha.—Kolos. 3:15, MMM; Yak. 1:17.
2 Tudi ne bua kuikala ne dianyisha bua malu kayi? Bua mulambu uvua Nzambi mufile bua kupikula nawu bantu udi kupa kua mushinga mukole. (Yone 3:16) Bua mudi Yehowa mutukoke kudiye. (Yone 6:44) Bua buobumue butudi nabu munkatshi muetu. (Mus. 133:1-3) Tuele kabidi Yehowa tuasakidila bua bintu bikuabu bia bungi bitudi mua kuikala bamanye bidiye utupesha. Katuikadi bu bena Isalele bavua kabayi ne dianyisha bavua bapue malu manene avua Yehowa mubenzele muoyo.—Mus. 106:12, 13.
3 Leja muudi muena dianyisha: Nansha muvua bantu bonso dikumi bavua Yezu muondope nsudi banyishe muvuaye mubondope, kadi anu muntu umue ke uvua mudileje muena dianyisha. (Luka 17:15) Bia muomumue, patudi tuyisha ne tshisumi tudi tudileja petu bena dianyisha. Tuetu bikale ne dianyisha dia bushuwa bua bionso bidi Tatu wetu wa dinanga udi mu diulu mutuenzele, mioyo yetu neitusake bua kuidikija dinanga diende ne muoyo wende muimpe pa kulongesha bakuabu mêyi ende. (Luka 6:45) Pashishe, patudi tuambila bantu bakuabu ‘malu a kukema akenza Yehowa ne malu akupangidijaye bua kutuenzela,’ dinanga dietu kudiye ne dianyisha dietu bidi bikola.—Mus. 40:5.
4 Saka bakuabu bua bikale pabu ne dianyisha: Tudi ne bua kukeba mua kuambuluisha bana betu balela ne bantu batudi tulongesha Bible bua bikale pabu ne muoyo wa dianyisha. Baledi badi ne mpunga ya bungi ya kukumbaja bualu ebu, tshilejilu padibu bayikila ne bana babu bua bintu bidi Yehowa mufuke. (Lomo 1:20) Patudi tulongesha muntu Bible, tudi mua kumuebeja ne: “Malu aa adiku atulongesha tshinyi bua bualu bua Yehowa?” Nanku, padi dianyisha didi nadi muntu eu kudi Nzambi dienda dikola, dinanga didiye nadi kudi Nzambi ne dipangadika diende dia kumutumikila padi nebikole.
5 Mu matuku aa a ku nshikidilu, bantu ba bungi kabena ne dianyisha ne kusakidila to. (2 Tim. 3:1, 2) Yehowa udi ne disanka dia bungi padiye umona basadidi bende ba lulamatu badifila mu mudimu wa buambi ne tshisumi bua kuleja mudibu ne dianyisha.—Yak. 1:22-25.