‘Angatayi mutshi wanyi wa tshikokedi pa nshingu yenu’
1 Bua ntatu ne makenga bitudi nabi pa buloba, tuakadiumvua disulakana dia bungi patuakaya kudi Yezu bua kupeta dikisha mu diambula dietu dia mutshi wende wa tshikokedi. (Mat. 11:29, 30) Kulua muyidi wa Yezu kudi kutulomba kuenza mudimu udi ne ntatu ne masanka. Kudi kutulomba kabidi bua kuyisha lumu luimpe lua Bukalenge bua Nzambi ne kuambuluisha bantu bua bapete pabu dikisha mu diambula bujitu buimpe ebu.—Mat. 24:14; 28:19, 20.
2 Masanka adi mudimu wa buambi utupesha: Yezu kavua muambile bayidi bende bua basakidile bujitu buende pa buabu to. Uvua wamba bua bamupeshe dibuki diabu didi ne bujitu, bangate diende divua dipepele. Nunku ntatu ne dipanga kumanya malu mimpe adi matuindile kabiena kabidi bitunemena bujitu to. Katuena kabidi tudikengesha bua kupeta biuma bia panu to. (Luka 21:34; 1 Tim. 6:17) Nansha mutudi ne malu a bungi a kuenza anyi tuenza mudimu bua kupeta tshiakudia, tudi bateke ditendelela Yehowa pa muaba wa kumpala. (Mat. 6:33) Tuetu bamanye bimpe malu adi ne mushinga mukole, mudimu wa buambi neutusankishe, kawakututonda to.—Filip. 1:10.
3 Muntu yonso eu utu musue kuyikila malu atu amusankisha bikole. (Luka 6:45) Bena Kristo bonso batu banange Yehowa ne malu malenga adiye mutulaye bikole be! Nenku patutu tuanji kuteka ntatu yetu ku luseke, tuya kuambila bantu ‘lumu luimpe lua malu mimpe,’ tutu tumvua bimpe be! (Lomo 10:15) Padi muntu wenza tshintu kampanda bikole, udi umanya mua kutshienza bimpe bitambe ne ulua kumvua disanka dia bungi. Ke bualu kayi tuetu tuyisha bikole padiku kakuyi bualu budi butupangisha, netupete disanka. Ndisankapu kayi patutu tumona muntu witaba bulelela! (Bien. 15:3) Nansha bantu kabayi basue kututeleja, netumvue disanka tuetu bamanye ne: mudimu eu udi usankisha Yehowa, ne: Yehowa ke walua kupatula bipeta bimpe bionso bidi mua kumueneka.—Bien. 5:41; 1 Kol. 3:9.
4 Patudi tuambula mutshi wa tshikokedi wa Yezu, tudi tupeta disanka dia kuenza nende mudimu pamue bu Bantemu ba Yehowa. (Yesh. 43:10; Buak. 1:5) Kakuena tshintu tshidi mua kutupesha disanka bu kuenza mudimu pamue ne Yezu to!