‘Tuikalayi balongolodibue bua mudimu muimpe wonso’
1 Pavua Yezu muenze programe wa kuyisha bikole kabidi, uvua muanji kukebaku dîba dia kulongolola bayidi bende. (Mat. 10:5-14) Nansha mutudi tuetu bonso ne malu a bungi a kuenza, tuetu bangataku anu minite mikese bua kudilongolola kumpala kua kuya kuyisha ku nzubu ne ku nzubu, nebituambuluishe bua kupatula bipeta bimpe.—2 Kol. 9:6.
2 Mushindu wa kudilongolola: Mushindu muimpe wa kudilongolola, nkuanji kumanya malu adi mu mikanda itudi tuya kufila mu buambi. Tudi kabidi mua kuela meji bua bantu badi mu teritware wetu. Mmalu kayi adi mabatonde? Mmalongesha a bitendelelu kayi adibu bitaba? Nunku, tudi mua kutangila mbuelelu ya mu muyiki idi mu Mudimu wetu wa Bukalenge anyi kukeba ngenyi mikuabu mu mukanda wa Comment raisonner.
3 Tuetu tulonda bimpe manaya a tshilejilu atubu benza mu Tshisangilu tshia Mudimu, nebituambuluishe kabidi. Tuetu bibidilangane ne mbuelelu wetu wa muyiki, nebituangate anu dîba dikese bua kudilongolola. Nunku, kumpala kua kupatuka mu buambi musangu wonso, tuetu tuanji kuelaku meji bua mbuelelu wetu, netumanye mua kuyisha bimpe. Tuikale kabidi tutangila mu tshibuta tshietu ni mudi mikanda ituikala nayi dijinga.
4 Ntshinyi tshiatuambuluisha bua kuvuluka mbuelelu wetu wa muyiki? Tuetu tumuambulula ne dîyi dikole neashale mu lungenyi. Bana betu bakuabu batu bambulula mbuelelu wa muyiki padibu benza dilonga dia mu dîku. Bakuabu pabu batu bafunda malu makese mu kabeji, batapamu dîsu kakese kumpala kua kukokola ku tshiibi.
5 Bulenga bua kudilongolola: Patudi tudilongolola bimpe, tudi tumanya mua kuyisha ne tumvua kabidi disanka dia kuyisha. Kudi kutuambuluisha bua kubenga kumvua buôwa mu buambi. Netuteleje muntu pamutu pa kuenda kukeba tshitudi mua kumuambila. Tuetu bamanye malu adi mu mikanda itudi tusua kufila, netuyifile ne disanka dionso.
6 Bible udi utulomba bua ‘kuikala balongolodibue bua mudimu muimpe wonso.’ (Tito 3:1) Kudi mudimu mulenga bu mudimu wa kuyisha lumu luimpe anyi? Patudi tudilongolola bimpe, tudi tuleja mutudi tunemeka muntu udi witaba lumu luimpe ne Nzambi udi mututume bua kuyisha.—Yesh. 43:10.