Mudimu wa pa buawu wa diabanya trakte mu dia 20 ngondo wa 10 too ne dia 16 ngondo wa 11
1 Kutuadijila mu Dimue dia 20 ngondo wa 10 too ne panyima pa mbingu inayi, netudifile bonso mu mudimu wa pa buawu wa diabanya trakte mupiamupia wa Kuenaku musue kupeta mandamuna a nkonko eyi anyi? Tudi batekemena bua se: mudimu eu utuenza pa buloba bujima ujula bantu dijinga dikole dia kumanya bimpe mukanda udi ulongesha bulelela.—Yone 17:17.
2 Trakte eu udi ufila mandamuna makumbane a mu Bible bua nkonko 6 ya mushinga mukole eyi: “Nzambi utu mutunange anyi?” “Makenga ne mvita nebijike anyi?” “Padi muntu ufua utu uya penyi?” “Netumonaku kabidi bantu batudi bafuishe anyi?” “Ndi mua kuenza tshinyi bua Nzambi kuteleja masambila anyi?” ne lua “Mmunyi mundi mua kupetaku panyi disanka?” Bitendelelu bia mu bukua-buena-Kristo kabitu ne mandamuna a nsongo bua nkonko yonso eyi to. Nansha bantu badi kabayi bitaba Kristo batu bela meji bikole bua nkonko eyi, kadi kabatu bitaba ne: mu Bible mudi mandamuna ayi mimpe ne matoke to. Nanku, tudi tuela meji ne: trakte au nebamuanyishe bikole kudi bantu ba bungi.
3 Nufile mu Teritware wenu mujima: Nuenze muenu muonso bua kuyisha ku nzubu ne ku nzubu mu teritware wenu mujima. Nuenu bikale ne teritware munene, bakulu badi mua kunuambila bua nuenu kushila ne bantu bikale kabayi ku nzubu yabu trakte anu ku dikumbula dia kumpala. Nuvuluka bua kupesha bena mutumba benu, balela benu, bena mudimu ne balongi benu bantu bakuabu banutu ne tshibidilu tshia kuyikila nabu trakte eu. Udi pamuapa bua kudilongolola bua kuenze mudimu wa bumpanda-njila buambuluishi mu ngondo wa 10 ne 11. Udi muana peshi mulongi wa Bible udi uyaku kumpala mu dimanya dia bulelela ne udi mukumbane bua kuenza netu mudimu eu wa pa buawu bu mumanyishi udi kayi muanji kutambula anyi? Pikalabi nanku, udi mua kuambila bakulu.
4 Malu a kuakula: Bua kumona mua kuyisha bantu ba bungi, mbitambe buimpe kuikala ne mbuelelu wa mu muyiki muipi. Udi mua kuela bantu lukonko lumue lua ku nkonko 6 idi pa tshizubu ne kubaleja diandamuna didi mu trakte. Nunku, bateleji bonso badi ne kuakaja mbuelelu wabu ku majinga adi mu teritware wenu. Bikala muntu yeye musue kumanya malu a bungi, funda bua kulua kumutangila tshia kabidi. Nudi mua kufila trakte pamue ne bibejibeji mu matuku a ndekelu wa lumingu luonso. Padi mudimu wa pa buawu ujika mu dia 16 wa ngondo wa 11, netufile mukanda wa Bible ulongesha. Trakte yashala, nenuikale nuyisha nayi pa tshibidilu anu munutu nuenza ne mikuabu amu.
5 Banga kulongesha bantu Bible: Trakte eu mmulongolola bua kutuambuluisha bua kutuadija kulongesha bantu Bible. Paudi upinganyina muntu uvua muanyishe bua kulonga Bible, udi mua kumuebeja bualu bua mu Bible buvua mua kuikala bumukoleshe anyi bumusambe. Muleja muaba udibu baleje mu dibeji dia ndekelu dia trakte eu mua kutuadija kulonga Bible, pashishe umupeshe mukanda wa Bible ulongesha. Pikalaku mushindu, longa nende tshikoso tshimue anyi bibidi bia nshapita udi ne malu a bungi a bualu buvua bumukoleshe.
6 Yehowa udi ukeba bantu bikala ne bua kumutendelela “mu nyuma ne mu bulelela.” (Yone 4:23) Nunku, tuetu buonso tuenzayi mudimu eu wa pa buawu bua kuambuluisha bantu bakuabu bua kumanyabu pabu bulelela!