Ndîba kayi ditudi ne bua kupinganyina bavua bitabe bua kututeleja?
1. Kuvuija bantu bayidi kudi kulomba tshinyi?
1 Mudimu wa kuvuija bantu bayidi udi ulomba kupinganyina muntu yonso uvua muanyishe bua kumanya malu a Bukalenge bua Nzambi. (Mat. 28:19, 20) Dîba dimpe ditudi mua kupeta dia kupinganyina muntu ndidi dipetangana ne programe wetu nende bonso. Bua tshinyi tudi ne bua kupinganyina muntu lukasa panyima pa kuyukila kuetu nende kua musangu wa kumpala?
2, 3. Bua tshinyi tudi ne bua kupinganyina bantu ne lukasa luonso?
2 Bua tshinyi kupingana lukasa? Mudimu wa diyisha ‘lumu luimpe elu lua bukalenge’ ukadi mutangile ku ndekelu, ne nshikidilu wa malu a panu apa ukadi pabuipi. (Mat. 24:14; 1 Pet. 4:7) Nunku, bu mutshidiku ‘dituku dia lupandu’ bua bantu badi banyisha bulelela, tudi ne bua kuteleja mubelu wa ‘kuambila bantu dîyi dia Nzambi ne dinanukila,’ mbuena kuamba kabidi ne: kubapinganyina ne lukasa luonso bua kukolesha dijinga diabu.—2 Kol. 6:1, 2; 2 Tim. 4:2.
3 Satana udi uluangana bua kujula maminu a Bukalenge atudi mua kuikala bakune mu muoyo wa muntu udi ujinga kumanya bulelela. (Mâko 4:14, 15) Misangu mivule, bana babu ne bantu batu babanga kudifila ku bulelela, bena mudimu nabu, ne bantu bakuabu, batu babanga kubaseka. Nanku kubapinganyina pa lukasa kudi kutuambuluisha bua kukolesha dijinga diabu dia kumanya bulelela kumpala kua bakuabu kuditundubijabu. Patshidi malu atuvua bayikile ne bantu abu mabishi mu mitu yabu, mbipepele bua kubangilapu muyuki wetu.
4. Mmushindu kayi utudi mua kulongolola muntu bua kumupinganyina kabidi?
4 Laya muntu bua kumupinganyina: Mbimpe numvuangane ne muntu panyima pa muyuki wenu nende wa kumpala bua wewe kumualukidila. Ujule lukonko luwandamuna musangu udi ulonda. Mbia mushinga bua kufunda malu anudi bayikile nende ne anualua kuyikila kabidi. Wewe ne dîba, udi mua kumulomba bua kumupinganyina dituku didi dilonda anyi matuku makese panyima. Nuenu bayikile musangu wa kumpala mu Disambombo anyi mu Dia lumingu ne muntu utu uya ku mudimu munkatshi mua lumingu, pamuapa udi mua kuitaba bua kumupinganyina Disambombo anyi Dia lumingu didi dilonda. Paudi umulaya bua kumupinganyina, mbimpe ukumbaje mêyi ebe.—Mat. 5:37.
5. Mmushindu kayi udi dipinganyina bantu ne lukasa mua kutufikisha ku dikumbaja mudimu udi Yezu mutupeshe?
5 Tudi ne malu mimpe a bungi adi atusaka bua kupinganyina bantu badi banange bulelela ne lukasa luonso. Nunku, tulaye bantu ne tubapinganyine lukasa, bualu dîba didi dishadile buloba ebu ‘didi dikepe.’ (1 Kol. 7:29) Patudi tupinganyina bantu badi banange mukenji wa Bukalenge ne lukasa, mudimu wetu udi mua kupatula bipeta bimpe.