Mandamuna a nkonko yenu

▪ Bua tshinyi kuikala ne busunguluji patudi tuambuluisha bana betu kampanda bua kumvuilabu bisangilu ku telefone?

Mu bisumbu bia bungi batu balongoluele bantu batu bimue bikondo kabayi ne mushindu wa kulua mu bisangilu ku Nzubu wa Bukalenge (bua disama anyi bua bualu bukuabu budi kabuyi kuepuka) bua kumvuilabu bisangilu ku telefone kumbelu kuabu. Bua kuenza bua ndongoluelu wa dinanga wa mushindu eu kuambuluishaye nangananga bantu badibu bamulongoluele, bidi bilomba busunguluji ne dilongolola malu bimpe. Nunku, bakulu badi batangila bualu ebu nebakebe bua kubulongolola bimpe ne kubulombola bua “malu onso enjibue bilengele, ne alondangane biakane.”​—1 Kol. 14:40.

Bakulu nebavuluke tshia kumpala bamanyishi badi ne masama makole a matuku a bungi anyi badi batshibukile panshi peshi badi kabayi mua kukokesha bua kupatuka nansha lupangu. Mumanyishi udi ne disama dia matuku makese anyi dia kayi mua kuya mu bisangilu, nansha mulongi wa Bible udi uya kumpala kadi kayi ne mushindu wa kupatuka nansha lupangu, badi mua kumuela pende munkatshi mua bantu badibu balongoluele muanda eu ne kumubala mu bungi bua bavua mu bisangilu. Pikalaku kakuyi telefone ya kuambuluisha nayi bana betu badi mu lutatu aba nanku, mbimpe pamuapa kubalongoluela malu mushindu mukuabu, bu mudi kubakuatshila malu a mu bisangilu mu bande ya bisanji.

Bushuwa, kakuena tshintu tshidi mua kupita masanka a padi muntu nkayende mudibuelele mu bisangilu nansha. Kudifikila kuetu tuetu bine mu bisangilu pamue ne bana betu kudi kutufikisha ku ‘disambangana nabu’ ne kudi kuambuluisha bapiabapia bua kumvuabu mushinga wa dibuela mu bisangilu. Patudi mu bisangilu, manaya a bilejilu adi mua kutuambuluisha bikole, bakulu badi dîba adi ne mushindu wa kututabalelabu, ne tudi tudilabuila tuetu bine dinanga dikole dia kudi bana betu. Ke muakumvua muanetu wa bakaji kampanda ukadi mukulakaje uvuabu bakidile bamuele mu tshitupa pavuaye upatuka mu Nzubu wa Bukalenge, wakakatshila wamba ne: “Ka! Ku telefone kabena mua kukuelaku mu tshitupa nunku to!”​—Lomo 1:11, 12.

Anu bu Ana uvua ‘kayi umuka [anyi upangika] mu ntempelo,’ lelu bana betu ba bungi bakadi bakulakaje batu balua mu bisangilu bionso bilondeshile mudi makanda abu ne nsombelu wabu. (Luka 2:36, 37) Nansha mudi bana betu aba balondela bisangilu ku telefone, kabatu bamona ndongoluelu eu bu ne: ke mushindu muimpe udi upingana pa muaba wa dibuela diabu dia mu bisangilu ku Nzubu wa Bukalenge nansha. Bua kulonda tshilejilu tshiabu tshimpe, tutungunukayi ne kusanka pa kudienzeja bua kuikala kudibuelela mu bisangilu tuetu bine bua kutendelela Nzambi wetu munene Yehowa!​—Mus. 95:1-3, 6; 122:1.