Tudi Bantemu mêba onso
1. Ntshinyi tshidi mushindu uvua Yezu muyishe mukaji uvua ku tshina tshia mâyi mua kutulongesha?
1 Yezu uvua muende munkatshi mua mêba mavule. Ke yeye kutshioka, e kumvuaye nyota. Muvua bayidi bende baye kusumba biakudia, kusombaye pambelu pa tshimenga tshia Samalea bua kuikisha. Yezu kavua muye mu Samalea bua kuyisha to; uvua upitshilamu patupu uya ku Galela bua kutungunukaku ne mudimu wende. Nansha nanku, wakakeba mpunga wa kuyisha mukaji mukuabu uvua usuna mâyi. (Yone 4:5-14) Mbua tshinyi? Yezu kavua muanji kulekelaku bua kuikala ntemu anyi “mumanyishi wa kueyemena ne mulelela” wa Yehowa nansha. (Buak. 3:14) Tudi tuidikija Yezu pa kuikala Bantemu ba Yehowa mêba onso.—1 Pet. 2:21.
2. Mmunyi mutudi mua kudipaya bua kuyisha padi mpunga upeteka?
2 Ikala mudipaye: Tudi mua kudipaya bua kuyisha padi mpunga umueneka pa kuendaku ne mikanda yetu miaba yonso. Bamanyishi bavule batu benda ne trakte, bayipesha bena mu makazen, bena miaba ya dipanyishila tusolonyi ne bakuabu badibu mua kupetangana nabu munkatshi mua dituku. (Muam. 11:6) Muanetu wa bakaji mukuabu utu utamba kuenza ngendu utu udienzeja bua kuambulaku Bible wende wa mukese ne kakanda ka Bible ulongesha mu tshibuta tshiende misangu yonso ne utu ubanga kuyikila ne badi basomba pabuipi nende.
3. Mmunyi mutudi mua kutuadija muyiki?
3 Banga muyuki: Patudi tuyisha dîba didi mpunga umueneka, katuena ne bua kubanga diakamue ne malu a mu Bible to. Pavua Yezu mutuadije kuyikila ne mukaji ku tshina tshia mâyi kavua mumuambile diakamue mudiye Masiya to. Bua kukoka ntema ya mukaji au, Yezu uvua mumulombe anu mâyi patupu. (Yone 4:7-9) Muanetu mukuabu wa bakaji wakamona ne: nyishilu wa mushindu au udi umuambuluisha bua kutuadija muyuki padibu bamukonka ni uvua mubuele mu difesto kampanda dia panu. Pamutu pa kuamba ne: ki mmusekelele difesto adi bua mudiye Ntemu wa Yehowa, udi wandamuna ne: “Too, mvua mubenge bua meme kudisekelela.” Muntu udi ne dijinga dia kumanya bia bungi utu anu webeja tshivuaye kayi muenzele nanku, dîba adi muanetu au udi ubanga kumuyisha.
4. Matayo 28:18-20 udi utukankamija mushindu kayi?
4 Nansha muvua Yezu mujikije mudimu wende pa buloba ne tshisumi, utshidi anu mutungunuke ne kutangila mudi mudimu wa diyisha wenzeka anu muakawenzaye. (Mat. 28:18-20) Nanku, anu bu Yezu tshilejilu tshietu, tudi Bantemu badi badilongolole bua kujukula bualu bua ditabuja dietu patoke dîba dionso.—Eb. 10:23.