Ndi mukumbane bua kuyisha anyi?
1. Bua tshinyi katuena ne bua kudiumvua bu badi kabayi bakumbane bua kuyisha?
1 Utu udiela lukonko elu anyi? Kolesha muoyo. Ki ntulasa anyi tshipedi kampanda tshidi mua kuenza bua se: tuikale bakumbane bua kuyisha to. Bavua bamba bamue bayidi ba Yezu muvuabu ‘kabayi bamanye mikanda, bantu ba patupu.’ Nansha nanku, bavua bayishi bimpe ba lumu luimpe bualu bavua badisuike bua kuidikija tshilejilu tshia Yezu.—Bien. 4:13; 1 Pet. 2:21.
2. Leja mishindu ivua Yezu ulongesha nayi.
2 Mushindu uvua Yezu ulongesha: Uvua ulongesha mu mushindu muimpe mupepele, wamba malu avua mamanyike kudi bantu bonso ne mapepele bua kuumvua. Nkonko ivuaye wela, bilejilu bivuaye ufila ne mushindu mupepele uvuaye utuadija miyuki bivua bikoka ntema ya bantu. (Mat. 6:26) Uvua uditatshisha bua bantu ne muoyo mujima. (Mat. 14:14) Yezu uvua kabidi wakula malu ne dishindika ne bukole bualu uvua mumanye ne: Yehowa ke uvua mumutume ne mumupeshe bukole bua kukumbaja mudimu wende.—Luka 4:18.
3. Tela mishindu idi Yehowa utuambuluisha bua kuyisha bimpe.
3 Yehowa udi utuambuluisha: Mulongeshi wetu Munene Yehowa udi utulongesha mua kuyisha bimpe lumu luimpe ku diambuluisha dia Dîyi diende ne bulongolodi buende. (Yesh. 54:13) Bu mudi Yehowa mufundishe mishindu ivua Yezu ulongesha mu Bible, tudi mua kuyikonkonona ne kuyidikija. Yehowa udi utupesha nyuma wende ne udi utulongesha ku diambuluisha dia bisangilu bietu. (Yone 14:26) Tudi kabidi tulongela malu makuabu kudi bana betu badi ne dimanya dia bungi.
4. Bua tshinyi tudi ne bua kudiumvua bakumbane bua kuyisha lumu luimpe?
4 Nunku katuena mua kumvua buôwa, tudiumvua katuyi bakumbane bua kuyisha to, bualu “dikumbana dietu didi difuma kudi Nzambi.” (2 Kol. 3:5) Tuetu tueyemena Yehowa ne tudienzeja bua atulongeshe mu mishindu itudi batele mu tshiena-bualu etshi, netulue ‘bakumbajibue, balongolola tshishiki bua midimu yonso mimpe.’—2 Tim. 3:17.