Ela mbata yebe bimpe
1. Mmushindu kayi udi 1 Kolinto 9:26 upetangana ne mudimu wa buambi?
1 Mupostolo Paulo wakamba ne: ‘Meme ndi ndumbila nunku, tshiyi nsesuka mu njila; ndi nduangana ne mbata tshiyi bu muntu udi widikija.’ (1 Kol. 9:26) Paulo uvua wakula bua muvuaye muteke meji ende anu ku bipatshila bia kuenzela Yehowa mudimu. Kadi mêyi aa adi kabidi atangila mudimu wa buambi. Tudi ne bua kuela “mbata” anyi kuenza malu mu mushindu muimpe bua kupatula bipeta bimpe. Tudi mua kuenza tshinyi?
2. Leja mutudi mua kuidikija Paulo ne bakuabu bena Kristo ba kumpala patudi tukeba dîba ne muaba wa kuyisha.
2 Uye muaba udi bantu: Paulo ne bakuabu bena Kristo ba kumpala bavua baya kuyisha muaba uvuabu bamanye ne: nebapete bantu. (Bien. 5:42; 16:13; 17:17) Nanku pikala bantu ba mu teritware wenu bikale ku nzubu ku dilolo, ke dîba dimpe dia kuyisha ku nzubu ne ku nzubu adi. Miaba itu bantu bangatshila mashinyi anyi kawulu itu ne bantu mu dindadinda ne ku dilolo anyi? Miaba itubu bapanyishila bintu itu ne bantu dîba kayi? Ke dîba dimpe dia kuyisha mu njila adi.
3. Leja mutudi mua kuela mbata yetu bimpe patudi basue kuyisha mu teritware.
3 Nuyishe bimpe mu teritware wenu: Tudi ne bua kuela kabidi mbata yetu bimpe patudi tuyisha mu teritware. Tshilejilu, tuetu tuya tshisumbu tshinene muaba umue, nebilombe dîba ne mudimu wa bungi bua kuabanya bantu. Nanku mbimpe kukosa bantu mu tusumbu tukese tukese. Bia muomumue, patudi tuyisha ku misoko, tuetu tuya bantu bakese bakese mu mashinyi, netujikije teritware lukasa, muntu yonso neayishe bikole. Mbimpe kabidi kulomba teritware udi pamue netu bua kubenga kujimija dîba dia bungi.
4. Tshidi mua kutuambuluisha bua kuikala ‘balobi bimpe ba bantu’ ntshinyi?
4 Yezu wakafuanyikija bambi ba lumu luimpe ne “balobi ba bantu.” (Mâko 1:17, Muanda Mulenga Lelu) Mulobi utu ukeba kukuata bikele, katu ukeba anu kuela ndobo anyi bukondo mu mâyi tshianana to. Nunku, balobi bapiluke batu baya muaba ne dîba didibu bamanye ne: nebapete mishipa ya bungi; kabatu banengakana to. Batu benza mudimu wabu ne lungenyi. Tuenzayi petu mudimu wa buambi bikole anu bu bobu.—Eb. 6:11.