Kudieledi mikalu to! Udi mukumbane
1. Bua tshinyi bamue batu babenga kulomba bantu bua kulonga Bible?
1 Utuku ulekela kulomba bantu bua kulonga nabu Bible bualu udi mumone ne: kutu ulombola bimpe dilonga dia Bible anyi? Batendeledi balelela ba Nzambi ba kale bu mudi Mose ne Yelemiya bavua badimone kabayi bakumbane bua midimu ivuabu babapeshe. (Ekes. 3:10, 11; 4:10; Yel. 1:4-6) Nanku, bantu ba bungi batu badiumvua mushindu wa muomumue. Mmunyi mutudi mua kujikija lutatu elu?
2. Bua tshinyi tudi ne bua kuyisha ku nzubu ne ku nzubu, kulombola kabidi ne malonga a Bible?
2 Tudi ne bua kuvuluka ne: Yehowa katu utulomba bua kuenza malu adi matupite bukole to. (Mus. 103:14) ‘Kuvuija bantu bayidi’ ne ‘kubalongesha’ mmudimu udibu batupeshe: tudi mua kuwenza. (Mat. 28:19, 20) Yehowa ki mmusungule anu bantu badi ne dimanya dia bungi anyi badi bapiluke to. (1 Kol. 1:26, 27) Nunku, katuena ne bua kuyisha anu ku nzubu ne ku nzubu, kadi tulekeela bakuabu mudimu wa kulombola malonga a Bible.
3. Mmunyi mudi Yehowa mutuvuije bakumbane bua kulombola malonga a Bible?
3 Yehowa udi utuvuija bakumbane: Yehowa ke udi utuambuluisha bua kumanya mua kuvuija bantu bayidi. (2 Kol. 3:5) Ku diambuluisha dia bulongolodi buende, mmutulongeshe malongesha a mu Bible adi nansha bena mukanda banene kabayi bamanye. (1 Kol. 2:7, 8) Mmuenze bua bafunde mishindu ivua Yezu ulongesha bua tuetu kumuidikija (bualu Yezu uvua Mulongeshi Munene) ne udi utungunuka ne kutulongesha ku diambuluisha dia tshisumbu. Yehowa mmutupeshe kabidi bintu bitudi nabi dijinga bua kulongesha bantu Bible. Mmutupatuile bitudi mua kuyisha nabi bu mudi mukanda wa Bible ulongesha, udi ulongesha bulelela mu mushindu muimpe mupepele bua kumvua. Katuedi meji ne: kulombola dilonga dia Bible nkukole to.
4. Bua tshinyi tudi bashindike ne: Yehowa neatuambuluishe?
4 Yehowa wakambuluisha Mose ne Yelemiya bua kukumbajabu midimu yabu. (Ekes. 4:11, 12; Yel. 1:7, 8) Tudi mua kulomba Yehowa bua atuambuluishe petu. Tumanyayi ne: patudi tulombola malonga a Bible, tudi tulongesha bantu bua bamanye Yehowa; bualu ebu budi bumusankisha. (1 Yone 3:22) Nunku ikala ne kipatshila ka kulonga Bible ne bantu, bualu mmudimu mulenga wa mabenesha a bungi bua mudimu wetu wa buambi.