‘Nuikale mu ditalala ne bantu bonso’
1. Mmubelu kayi wa mu Bible utudi ne bua kutumikila patudi tupetangana ne bantu badi bafiika munda?
1 Bantu ba Yehowa batu banange ditalala; mudimu wetu wa buambi utu wa ditalala. (Yesh. 52:7) Kadi imue misangu, tutu tupetangana ne bantu batu bafiika munda anu bualu tudi tukeba kubayisha. Ntshinyi tshidi mua kutuambuluisha bua kuikala ne ditalala mu nsombelu ya nunku?—Lomo 12:18.
2. Mbimpe kumanya tshidi tshisaka muntu bua kufiika munda bua tshinyi?
2 Umanye tshidi tshibasaka: Nansha mudi bamue mua kutuandamuna ne tshiji bualu badi babenga malongesha etu, bakuabu badi mua kufiika munda bua abu malu. Pamuapa bualu tudi balue dîba dibi. Muntu udi mua kufiika munda bua ende malu adi mamutonde. Nansha biobi ne: lumu luimpe ke ludi lumufiikisha munda, tudi ne bua kuvuluka ne: mmutuandamune nanku pamuapa bualu mbamupambuishe. (2 Kol. 4:4) Kumanya tshidi tshisaka muntu kudi kutuambuluisha bua kushala batukije ne kubenga kumona ne: mmutufiikile tuetu munda.—Nsu. 19:11.
3. Leja mutudi mua kuleja bantu kanemu.
3 Ikala ne kanemu: Bantu ba bungi lelu mbalamate bikole ku malongesha a dishima. (2 Kol. 10:4) Badi ne bukenji bua kuitaba bua kututeleja anyi kubenga. Katuena basue kupetula malongesha a bantu anyi kuleja ne: tudi babapite to. Muntu yeye mutuipate, tumbuke ne kanemu konso.
4. Kuakula ne mêyi mimpe kudi kumvuija tshinyi?
4 Mêyi ebe ikale mimpe: Nansha bobu batuamba mêyi mabi, mbimpe tuandamune ne mêyi mimpe adi aleja kanemu. (Kolos. 4:6; 1 Pet. 2:23) Pamutu pa kukokangana nabu ku mêyi, tukebe bualu budi kabuyi bujula milandu. Pamuapa tudi mua kuebeja muntu ne bulenga buonso bua atuambile bua tshinyi udi ubenga kututeleja. Kadi bua kubenga kufiikisha muntu munda bikole, imue misangu mbimpe kukosa muyuki.—Nsu. 9:7; 17:14.
5. Tuetu bikale ne ditalala mu buambi, netupete malu mimpe kayi?
5 Tuetu bikale ne ditalala, muntu udi mua kuvuluka bimpe mushindu utuvua bamuandamune, ne kulua kuteleja muanetu kampanda wikala mua kumuyisha musangu mukuabu. (Lomo 12:20, 21) Nansha muntu yeye kayi anu musue kututeleja, dimue dituku udi mua kulua Ntemu. (Gal. 1:13, 14) Nansha muntu musue kumanya bulelela anyi kayi musue, tuetu tudikanda, ne bikale ne ditalala, netutumbishe Yehowa ne malongesha etu.—2 Kol. 6:3.