Mandamuna a nkonko yenu

▪ Mmêyi manene kayi a mu Bible adi atangila dienza mudimu ne telefone atudi mua kulonda patudi mu bisangilu ne mu buambi?

“Bualu bua tshintu tshionso tshidi ne tshikondo tshiatshi.” (Muam. 3:1): Telefone ya ku bianza idi yambuluisha bantu bua kufundilangana mesaje anyi kubikilangana pamuapa dîba kayi dionso. Kadi, kudi bikondo bitu bena Kristo kabayi basue bua telefone ibashiye mu ditanaji to. Tshilejilu, bisangilu ntshikondo tshia kutendelela Yehowa, kulonga malu a Nzambi, ne kukankamijangana. (Dut. 31:12; Mus. 22:22; Lomo 1:11, 12) Bu wewe mua kusua, ukange telefone webe paudi mu bisangilu, padi bisangilu bijika, udi mua kutangila mesaje adibu bakutumine. Padiku bualu budi mua kukulomba ne: ushiye telefone webe mukangula, mbimpe wenze bua kanyangi ntema ya bakuabu to.

‘Wenze malu onso bua lumu luimpe.’ (1 Kol. 9:23): Misangu mikuabu kutu malu mimpe atu atusaka bua kuenza mudimu ne telefone patudi mu buambi. Tshilejilu, muanetu udi utangila mudimu wa buambi udi mua kuenza mudimu ne telefone bua kumanya mudi malu enda miaba idi bamanyishi bakuabu ba mu tshisumbu tshiabu bayisha. Imue misangu bamue bamanyishi batu benza mudimu ne telefone yabu bua kubikila muntu uvua muanyishe bulelela anyi mulongi wa Bible kumpala kua kuya kumutangila, nangananga bikalaye musombele muaba mule. Tuetu ne telefone, tudi ne bua kuenza bua kakoshi muyuki wetu ne muntu to. (2 Kol. 6:3) Patudi tuindila bambi ba lumu luimpe bakuabu, pamutu pa tuetu kubikila anyi kufundila mulunda wetu mesaje, katuenaku mua kutuma lungenyi luetu ku mudimu wa buambi ne kudi bantu batudi tuyisha nabu anyi?

Angata bakuabu ne mushinga. (1 Kol. 10:24; Filip. 2:4): Katuena basue kulengulula mubelu wa kufika pa dîba mu tshisangilu tshia mudimu wa buambi tuela meji ne: netubikile anyi netufundile muanetu kampanda bua kumanya muaba udi kasumbu ketu kayishila. Paudi ufika tshisangilu tshimane kujika, misangu ya bungi nebilombe bua bashintulule mukavuabu babanye bantu. Bushuwa, bidi mua kuenzeka bua tufike imue misangu panyima pa tshisangilu, kabiyi ku disua dietu. Kadi, tuetu ne tshibidilu tshia kufika kumpala kua dîba, tudi tuleja mutudi tuangata malu adi Yehowa mulongolole ne mushinga, tuangata muanetu udi ulombola tshisangilu ne bambi ba lumu luimpe bakuabu ne mushinga.