Tupinganyine bantu bonso badi bitaba bulelela nansha kakese
1 Ba bungi ba kutudi badi mu bulelela lelu bualu kuvua muntu uvua mumone mutuvua banyishe bulelela ne mutupinganyine ne disuminyina (pamuapa misangu ya bungi) bua kudiundisha dijinga dietu adi. Tuetu petu tudi ne bua kupinganyina bantu bonso badi bitaba bulelela nansha kakese. Bushuwa, kupinganyina bantu ntshitupa tshia mudimu wetu wa ‘kuvuija bantu bayidi.’—Mat. 28:19, 20.
2 Tujingulule lungenyi lua muntu: Nansha muntu yeye kayi muitabe mikanda itudi tumuleja, mpala wende, dîyi diende anyi mêyi ende bidi mua kuleja ne: udi wanyisha bulelela nansha kakese. Bua bualu ebu tudi mua kumupinganyina. Tshilejilu, muanetu mukuabu wa balume wakapinganyina muntu kampanda mbingu itanu milondangane kayi umushila mukanda nansha umue. Musangu muisambombo, muntu au wakitaba mukanda, ne kutuadijabu kulonga Bible.
3 Wewe mumone ne: muntu mmuitabe bulelela nansha kakese, umupinganyine ne lukasa, nansha panyima pa matuku makese. Kushidi Diabolo anyi “mubi” mpunga wa kunyenga bintu biudi mukune mu muoyo wa muntu. (Mat. 13:19) Nuenu balayangane bua kumonangana dîba kampanda, udienzeje bua kukumbaja tshipungidi tshienu.—Mat. 5:37.
4 Buambi bua mu njila: Utuku udienzeja bua kukeba bua kuyukila kabidi ne bantu baudi uyisha mu njila anyi padi mpunga umueneka anyi? Ku ndekelu kua diyukidilangana dienu udi mua kuamba ne: “Diyukila dietu edi ndisankishe bikole. Nkuepi kundi mua kukumona kabidi bua tuetu kuyukila?” Padibi bikumbane, bamue bamanyishi batu bapesha muntu udi muitabe nimero yabu ya telefonebua kuyukila nende anyi balombangana nimero ya telefone ne muntu au. Bikala bantu batu ne tshibidilu tshia kukumona uyisha mu tshitupa kampanda tshia njila, badi mua kukupesha nimero yabu ya telefone anyi adrese yabu kakuyi bualu. Nansha bobu babenge mua kukuleja mushindu unudi mua kumonangana, udi mua kuyukila nabu musangu mukuabu unuamonangana nabu mu njila.
5 Tutu tusanka patudi tumona mitshi itudi bakune ne bamiamine mâyi ikola. Bia muomumue, tudi mua kupeta disanka dia bungi patudi tupinganyina bantu ne tubambuluisha bua kukoleshabu malanda abu ne Nzambi. (1 Kol. 3:6) Udifundile tshipatshila tshia kupinganyina muntu yonso udi witaba bulelela nansha kakese.