Mandamuna a nkonko yenu

▪ Kumpala kua kuanyishila mumanyishi bua kutambulaye, udi ne bua kuikala ubuela mu bisangilu ne uyisha mushindu kayi?

Kutambula ndipangadika dinene didi muntu wangata. Nanku, kumpala kua kuitabila muntu bua kutambulaye udi ne bua kupeta dimanya dikumbane dia tshidi Nzambi umulomba. Ikale kabidi ukadi mudianjile kuleja mudiye mudisuike bua kutumikila mikenji ya Nzambi.

Bible udi ulomba bena Kristo bua kabalekedi kudisangisha kuabu pamue, nanku muambi wa lumu luimpe udi ne bua kuikala ukadi munange kubuela mu bisangilu. (Eb. 10:24, 25) Ikala kabidi wandamuna mu bisangilu. Ikale pamuapa ukadi mudifundishe mu Kalasa ka Mudimu wa Nzambi, nansha mudi bualu ebu kabuyi mukenji.

Bu mudibu bapeshe bena Kristo mudimu wa kuyisha lumu luimpe ne kuvuija bantu bayidi, muambi wa lumu luimpe udi ne bua kuikala ne tshibidilu tshia kuyisha kumpala kua batismo. (Mat. 24:14; 28:19, 20) Nngondo bungi kayi idi mumanyishi ne bua kuyisha bua kutambulaye? Mbimpe kumupesha tshikondo tshikumbane tshia kulejaye mudiye mudisuike ne muoyo mujima bua kuyisha ne tshisumi ku ngondo ne ku ngondo. (Mus. 78:37) Kadi, ki mbimpe kupite tshikondo tshile menemene kutuadijila ku dîba divuaye mutuadije kuyisha too ne dîba didiye ukumbana bua kutambulaye to. Biangate pamuapa ngondo mikese tshianana. Udi ne bua kufila luapolo ngondo bungi kayi? Kakuena mikenji miela to. Bakulu badi ne bua kukonkonona nsombelu wa mumanyishi ne mumanyishi yonso ne bikale ne nkatshinkatshi.​—Luka 21:1-4.

Bakulu (anyi basadidi ba mudimu badi mu bisumbu mudi bakulu bakese) badi bakonkonona muntu udi musue kutambula badi ne bua kumanya ne: bantu mbashilangane, ne badi ne bua kuikala ne busunguluji bua kumanya bikala muntu mukumbane bua kutambula. Nebakebe bua kumanya bikalaye udi ne dijinga dilelela dia kulua Ntemu wa Yehowa ne kuleja mudiye wanyisha diakalenga didiye nadi dia kuikala mu bulongolodi bua Yehowa ne dia kuyisha. Bakulu bamanye ne: ki muanji kukola mu nyuma anyi ki muanji kupeta dimanya didi nadi bambi ba lumu luimpe bakadi batambule kukadi matuku a bungi to. Bakulu bobu bamone ne: muntu ki muanji kukumbana bua kutambula, badi ne bua kumuambila ne bukalanga buonso malu a mu Bible adiye kayi mukumbaje ne kumuambuluisha ne mibelu ya mu Bible.