Mudimu wa dibikila bantu mu Tshivulukilu udi utuadija mu dia 22 ngondo 3

Tshidimu etshi, netutuadije kubikila bantu bua kulua kubuela mu Tshivulukilu mu Disambombo dia 22 ngondo 3. Tudi tulomba bamanyishi bonso bua kudifila bikole mu mudimu eu. Ngenyi ya mua kubanga muyuki idi mu dibeji 4. Netuikale kabidi tufila bibejibeji bitudi nabi mu Disambombo ne mu Dia lumingu pikalabi bikengela. Mu Disambombo dia kumpala dia ngondo 4, netudifile bikole mu mudimu wa diabanya mabeji a kubikila nawu bantu pamutu pa kutuadija malonga a Bible. Kadi, tuetu bapete muntu udi uleja dijinga dikole dia kumanya bia bungi, tudi mua kutuadija kulonga nende Bible. Nudi mua kuabanya mabeji aa miaba idi bantu ba bungi. Kadi, mutangidi wa mudimu wa buambi ke wanji kutangila bua kuamba bikalabi bimpe bua tshisumbu tshienu kuenza nanku ne tshipatshila tshia kupeta bantu ba bungi mu teritware wenu. Bua bantu batudi bamanyangane nabu bu mudi balela betu, bena mudimu netu, balongi betu ne bantu batudi tupinganyina bua kulonga nabu Bible kuluabu kubuela mu Tshivulukilu, mbimpe tudianjile kufunda mêna a batudi basue kupesha mabeji a dibikilangana nawu pa dibeji ne kubapesha mabeji aa diakamue padi mudimu eu utuadija. Tudi batekemene ne: bantu ba bungi nebadisangishe netu patuikala tuvuluka mishindu mitambe bunene ibidi idibu batuleje dinanga.​—Yone 3:16; 15:13.