Tuakajayi mishindu yetu ya kuyisha: Kuyisha ku telefone idi ku tshibueledi tshia nzubu

Mushinga: Kuyisha ku telefone idi ku tshibueledi tshia nzubu kudi mua kukuenza buôwa. Ntshinyi tshitudi mua kuenza bua buôwa kabutekeshi tshisumi tshietu bua midimu mimpe? Uvuluke ne: kuyisha ku telefone idi ku tshibueledi tshia nzubu kudi mua kuikala mushindu umuepele wa kupeta bamue bantu bua kubayisha lumu luimpe. (Lom 10:14) Malu mamonamona adi aleja ne: tudi mua kuyisha bimpe menemene mu mushindu eu. (Bala Annuaire wa 2011, dib. 65-66, ne wa 2000, dib. 54, tshik. 3.) Tukonkononayi ngenyi idi ilonda eyi.

Mushindu wa kuenza malu:

Longolola mêyi makese, uafunde pa dibeji bua wikale uabadila muntu musangu umue ku telefone. Nebikuambuluishe bua kuikala ne dikima dia bungi. Anu ku ntuadijilu, umuambile tshiudi muluile. Umubikile mu dîna diende bikaladi dipatuke mu telefone. Bua kujikija umuambile ne: udi usua kumupesha (anyi kumushila ku tshiibi) trakte anyi tshibejibeji tshidi ne malu a bungi.
Wikale ne mmuenenu muimpe. Ufukishe mimuemue ne wenze jeste anu bu ne: udi uyukila ne muntu mpala ne mpala.
Ikala mudikelele ne akula anu bu pa tshibidilu. Amba malu adi umvuika ne dîyi dikumbane. Kuikadi wikisha tshianana tshianana paudi wakula to, kadi kuakudi lubilu lubilu to.
Ikala ne busunguluji. Mu nzubu minene, mudi mua kuikala telefone ya bungi. Udi pamuapa mua kusungula bua kubikila bantu bakese, kufunda baukadi mubikile ne pashishe kumbuka. Bantu badi basombele mu nzubu ayi badi mua kutumona mu mushindu mubi tuetu benze mutantshi mule anu bua kubikila muntu yonso ku telefone.

Tshitudi mua kuenza mu ngondo eu:

Mu ntendelelu wenu wa mu dîku nuenze manaya, kadi munayi yonso ikale mutangile ku luende luseke.