Malu adibu baledile mu Mabeji a tshisangilu tshia Nsombelu ne mudimu wetu
LUMINGU LUA DIA 6-12/5
BIUMA BIA MU DÎYI DIA NZAMBI | 2 KOLINTO 4-6
Dinanukila
Bidi kabidi bikengela bua katujimiji ditekemena dietu dia muoyo wa tshiendelele mupuangane to. Nansha baluishi betu mua kutushipa, katuakudijimija to. (Lom 5:4, 5; 1Ts 1:3; Bua 2:10) Makenga atudi nawu mpindieu adi patupu patudi tuafuanyikija ne mutuikala pakumbana ditekemena dinene adi. (Lom 8:18-25) Patudi tuela meji a muikala muoyo wa tshiendelele, tudi tumona ne: makenga nansha wowu a bishi, adi anu a ‘tshitupa tshîpi ne mapepele.’ (2Ko 4:16-18) Tuetu balamate ku ditekemena dietu dia buena Kristo tuvuluka ne: ntatu itudi nayi nya tshitupa tshîpi, katuakuteketa mu mikolo anyi kuela Yehowa Nzambi nyima nansha.
Dikeba bubanji bua mu Dîyi dia Nzambi
“Nuenze bua Yehowa atue mimuemue”
David Splane wa mu Kasumbu kaludiki uvua mumvuije mvese wa mu Bible eu. (2 Kolinto 4:7) Tshiuma etshi tshidi tshileja tshinyi? Tshidi tshileja dimanya peshi meji anyi? Kuandamunaye ne: “Tòo. Tshiuma tshivua mupostolo Paulo muakuile muaba eu tshidi tshileja ‘mudimu’ wa ‘kuleja bulelela patoke.’” (2 Kolinto 4:1, 2, 5) Kuvuluijaye balongi ne: ngondo itanu ivuabu bapitshishe mu dilonga ivua ibalongolola ku mudimu wa pa buawu uvua mubindile. Bavua ne bua kuwangata ne mushinga wa bungi menemene.
Muanetu Splane uvua kabidi mumvuije ne: “bivuadi bienza ne buloba” bidi bileja mubidi wetu wa buntu. Kulejaye dishilangana pankatshi pa tshivuadi tshia buloba ne tshia or. Bantu kabatu batamba kuela bintu mu bivuadi bia or to, kadi batu batamba kubiela mu bia buloba. Tuetu bele tshiuma mu tshivuadi tshia or, bantu nebatapulule ntema yabu bayituma ku tshidibu belamu ne ku tshivuadi tshine atshi. Muanetu Splane kuambila balongi ne: “Kanukoki ntema ya bantu kunudi to. Bu munudi bamisionere, enzayi bua bantu batume ntema yabu kudi Yehowa. Ikalayi bivuadi bipuekele bienza ne buloba.”
LUMINGU LUA DIA 13-19/5
BIUMA BIA MU DÎYI DIA NZAMBI | 2 KOLINTO 7-10
Mudimu wetu wa diambuluishangana
“Nzambi mmusue muena kupa udi ufila ne disanka”
Tshia kumpala, Paulo wakambila bena Kolinto muvua bena Makedonia bikale tshilejilu tshimpe bualu bavua bitaba bua kuambuluisha bena Kristo nabu. Wakafunda ne: “Mu tshikondo tshia diteta dikole pavuabu mu dikenga, disanka diabu dia bungi ne bupele buabu bukole biakenza bua ne: bubanji bua lungenyi luabu lua kupeshangana bintu buvule.” Bena Makedonia kabavua bakeba bua babenzeje bua kushishabu kufila to. Kadi Paulo wakamba ne: bavua “batungunuka ne kudilombela nkayabu kutudi ne disuminyina bua bapete pabu diakalenga dia kufila ne bulenga buonso.” Patudi tuvuluka ne: bena Makedonia abu bavua mu ‘bupele bukole,’ tudi tumona muvuabu ne muoyo wa kupa wa dikema!—2 Kolinto 8:2-4.
Kuditumbisha nkubi anyi?
Muaku wa pa muanda wa mu tshiena Greke wa kaukhaomai, udibu bakudimune ne: “kuditambisha, kusanka bikole, anyi kuditumbisha,” badi mua kuwangata mu mushindu muimpe anyi mubi. Tshilejilu, Paulo wakamba ne: “tusanke bashindamene mu ditekemena dia butumbi bua Nzambi.” Kuambaye kabidi ne: “Muntu udi uditumbisha, aditumbishile mu Yehowa.” (Lomo 5:2; 2 Kolinto 10:17) Bidi biumvuija ne: tudi tuditumbisha bua mudi Yehowa muikale Nzambi wetu, bitusaka bua kusanka bikole bua dîna diende ne lumu luende.
LUMINGU LUA DIA 20-26/5
BIUMA BIA MU DÎYI DIA NZAMBI | 2 KOLINTO 11-13
Kutuangana mishiku
“Dituangana dia mishiku dia tshijila.” Bena Kristo ba kumpala bavua “batuangana mishiku ya tshijila” (Lom 16:16; 1Ko 16:20; 2Ko 13:12; 1Ts 5:26) anyi “ya dinanga” (1Pt 5:14), bayitua imue misangu balume anyi bakaji nabu. Tshilele atshi tshivua mua kuikala tshipetangana ne tshia bena Ebelu ba kale bavua bela muntu muoyo, bamutua mishiku. Nansha mudi Bible kayi wamba malu a bungi bua “dituangana dia mishiku dia tshijila” anyi “dia dinanga,” tshienzedi atshi tshivua tshileja muvua bena Kristo abu banangangane ne bikale mu buobumue mu tshisumbu.—Yne 13:34, 35.
LUMINGU LUA DIA 27/5–2/6
BIUMA BIA MU DÎYI DIA NZAMBI | GALATIYA 1-3
Dikeba bubanji bua mu Dîyi dia Nzambi
Mukanda mutumina bena Galatiya
Kakuena tshijadiki tshidi tshileja ne: pavua Paulo mukeme ne: “Nuenu bena Galatiya badi kabayi ne meji!” uvua wamba anu kasumbu ka bena tshisa kampanda bavua basombele mu Galatiya lua ku nord to. (Gal 3:1) Kadi uvua utandisha bamue bantu ba mu tshisumbu atshi bavua balekele bantu ba munkatshi muabu bavua balamate ku buena Yuda babanyanga. Bantu abu bavua badielela yabu mikenji ya buakane miangatshila ku Mikenji ya Mose pamutu pa kulonda ‘buakane buvua bufumina ku ditabuja’ buvua tshipungidi tshipiatshipia tshibapeteshe. (2:15–3:14; 4:9, 10) Bantu ba mu “bisumbu bia mu Galatiya” (1:2) bavua Paulo mufundile mukanda eu bavua bena Yuda ne bantu ba bisamba bikuabu. Mu bantu ba bisamba bikuabu abu muvua bantu batengula bavua bitabuje buena Yuda ne ba bisamba bikuabu bavua kabayi batengula, bimueneka ne: muvua kabidi ndelanganyi ya bantu ba mu bitupa bia maloba bidibu babikila lelu ne: Grande-Bretagne. (Bz 13:14, 43; 16:1; Gal 5:2) Buonso buabu bavua bababikila ne: bena Kristo ba mu Galatiya bualu bavua basombele muaba uvuabu babikila ne: Galatiya. Mukanda eu mu kabujima kawu udi uleja ne: Paulo uvua mumanye bantu bavuaye uwufundila bavua lua ku sud kua provense wa bena Lomo abu bimpe menemene, kadi kavua uwufundila bantu bavuaye kaye mumanye bavua lua ku nord to, bualu bidi bimueneka ne: katshia kavua muanji kukuya to.