Malu adibu baledile mu Mabeji a tshisangilu tshia Nsombelu ne mudimu wetu
LUMINGU LUA DIA 3-9/6
BIUMA BIA MU DÎYI DIA NZAMBI | GALATIYA 4-6
“‘Tshifuanyikijilu’ ne muditshi tshitutangila”
Hagâ
Bilondeshile mupostolo Paulo, Hagâ uvua tshimfuanyi tshia tshisamba tshia Isalele wa ku mubidi tshivua tshilaye Yehowa bua kunemeka tshipungidi tshia mikenji ya Mose tshivuabu badie nende ku mukuna wa Sinai, tshipungidi atshi tshiakalela “bana ba bupika.” Bu muvua bena Isalele bena mapanga, bakapanga kunemeka mêyi a tshipungidi atshi. Tshiotshi kuenza bua kabikadi bantu badikadile to, kadi bangatshibue bu bena mpekatu bavua bakumbanyine lufu; nanku, bavua bapika. (Yne 8:34; Lom 8:1-3) Hagâ uvua uleja Yelushalema wa mu matuku a Paulo bualu yeye Yelushalema au ke uvua tshimenga tshikulu tshivua tshileja bulongolodi bua bena Isalele ba ku mubidi tshiakadimona mu bupika ne bana batshi. Kadi bena Kristo bela manyi bobu mbana ba “Yelushalema wa muulu” udi mukaji wa Nzambi wa mu tshimfuanyi. Yelushalema eu udi anu bu Sala mukaji mudikadile, bualu katu muanji kukuatshibua ku bupika nansha. Anu bu muvua Yishemaele mukengeshe Izaka, bana ba Yelushalema uvua mupika bavua bakengeshe bana ba “Yelushalema wa muulu” bavua Yezu mupikule. Ndekelu wa bionso, Hagâ ne muanende bakipatshibua, bileja muvua Yehowa mubenge tshisamba tshia Isalele wa ku mubidi.—Gal 4:21-31; tangila kabidi Yne 8:31-40.
Dikeba bubanji bua mu Dîyi dia Nzambi
Udi mumanye anyi?
Yezu uvua mubikile Yehowa mu disambila ne: “Aba, Tatu” bua tshinyi?
Muaku aba wa tshiena Alama udi umvuija “tatu” anyi “Tatu wanyi.” Misangu yonso isatu idi Bible utela muaku eu, udi uwutela mu masambila adi bantu belela Yehowa, Tatu wa mu diulu. Kadi batu bawutela bua tshinyi?
Mukanda kampanda udi wamba ne: “Mu matuku a Yezu, bana bavua babikila batatuabu ne: Aba, bua kuleja kanemu ne malanda makole avua pankatshi pabu ne batatuabu abu.” Uvua umue wa ku miaku ya ntuadijilu ivua muana ulonga bua kubikila tatuende. Yezu wakatela muaku eu pavuaye usambila Tatu wende ne muoyo mujima. Pavua Yezu mu budimi bua Getesemane mêba makese kumpala kua yeye kufua, wakasambila Yehowa ne mêyi a ne: “Aba, Tatu.” (The International Standard Bible Encyclopedia.)—Mâk 14:36.
Mukanda umue umue au udi wamba ne: “Mikanda ya bena Yuda ya mu tshikondo tshia bena Lomo ne bena Greke, kabavua bafundamu muaku Abbā bu muaku wa kusambila nawu Nzambi to, bualu buabu bobu bivua mua kumueneka bu dipanga kanemu bua kubikila Nzambi mushindu au. [Kadi] Yezu . . . uvua mutele muaku eu mu disambila bua kuleja muvuaye mu malanda makole ne Nzambi.” Miaba mikuabu ibidi idi Bible utela muaku “Aba,” mupostolo Paulo ke uvua muyifunde, idi ileja ne: bena Kristo ba mu bidimu lukama bia kumpala bavua pabu batela muaku eu mu masambila abu.—Lomo 8:15; Galatiya 4:6.
Udi mumanye anyi?
Pavua mupostolo Paulo wamba ne: uvua ne “bimanyinu bia mupika wa Yezu” pambidi, uvua usua kuamba tshinyi?—Galatiya 6:17.
▪ Mêyi a Paulo aa avua mua kuikala avuluija bantu bavua bamuteleja malu a bungi. Tshilejilu, bavua mua kuikala bavuluka tshiamu tshivuabu bakunjija mu kapia bua kuenza natshi tshimanyinu pambidi pa bantu bavuabu bakuata mu mvita, bivi ba ba bintu bia mu ntempelo, ne bapika bavua banyema. Pavua bantu bapeta tshimanyinu tshia nanku bivua bibapuekesha milongo.
Kadi bantu kabavua anu bamona bimanyinu abi mu mushindu mubi to. Bantu ba bungi ba kale bavua benza bimanyinu pambidi pabu bua kuleja muvuabu ba tshisa kampanda anyi ba tshitendelelu kansanga tshisunguluke. Tshilejilu, mukanda mukuabu udi wamba ne: “Bena Sulia bavua baditua bimanyinu pa tshianza anyi ku nshingu bua kuleja muvuabu batendeledi ba nzambi Hadada ne Atargatis . . . Bavua kabidi bazola mutendeledi yonso wa nzambi Dionysus dibeji dia muonji wa tshilama tshia ditu.”
Bantu ba bungi ba lelu badi bamba ne: Paulo uvua wakula bua bibangu bivuaye nabi bia ku mitutu ivuaye mupete mu mudimu wende wa bumisionere. (2 Kolinto 11:23-27) Nansha nanku, Paulo uvua mua kuikala wakula muaba eu bua nsombelu wende mujima, kadi ki mbua tshimanyinu kampanda pambidi pende tshivua tshileja ne: uvua muena Kristo to.
LUMINGU LUA DIA 10-16/6
BIUMA BIA MU DÎYI DIA NZAMBI | EFESO 1-3
“Diludika dia malu dia Yehowa ne mudimu wadi”
Bualu busokoka bua tshijila
Bukalenge bua Masiya. Paulo udi ufila diumvuija dialabale dia bualu busokoka bua tshijila bua Kristo mu mikanda ivuaye mufunde. Mmufunde mu Efeso 1:9-11 bua mudi Nzambi mutumanyishe “bualu busokoka bua tshijila” bua disua diende, wamba ne: “Wakalongolola anu bu muvuabi bimusankisha bua diludika dia malu ku ndekelu menemene kua bikondo bisungula, bua kusangisha bintu bionso mu Kristo, bintu bidi mu diulu ne bintu bidi pa buloba. Eyowa, mu yeye utudi nende mu buobumue ne uvuabu batusungule nende bu bapianyi bu muvuabu badianjile kutusungula bilondeshile dilongolola dia yeye udi ukumbaja malu onso bu mudiye upangadija bilondeshile disua diende.” Nanku, “bualu busokoka bua tshijila” ebu budi butangila Bukalenge bua Nzambi bulombola kudi Masiya. “Bintu bidi mu diulu” bidi Paulo wakuila mbantu badi ne ditekemena dia kupiana Bukalenge bua mu diulu pamue ne Kristo. “Bintu bidi pa buloba” mbantu bakokeshabu kudi Bukalenge abu. Yezu wakaleja bayidi bende ne: bualu busokoka bua tshijila abu buvua butangila Bukalenge bua Nzambi pakabambilaye ne: “Mbanupeshe nuenu bualu busokoka bua tshijila bua Bukalenge bua Nzambi.”—Mâk 4:11.
LUMINGU LUA DIA 17-23/6
BIUMA BIA MU DÎYI DIA NZAMBI | EFESO 4-6
Dikeba bubanji bua mu Dîyi dia Nzambi
Bunsantu
Nyuma muimpe. Bukole buenzeji bua Yehowa, anyi nyuma, mbukole budi ku bukokeshi buende butuye ukumbaja nabu disua diende. Mbukezuke ne mbua tshijila. Nzambi mmubuteke anu bua kukumbaja nabu midimu yende mimpe. Nunku, Bible udi ububikila ne: “nyuma muimpe” anyi “nyuma wa tshijila.” (Mis 51:11; Luk 11:13; Lom 1:4; Ef 1:13) Padi muntu upeta nyuma muimpe, nyuma eu udi wenza bua ikale wa tshijila anyi mukezuke. Kadi muntu au yeye wenza bualu kampanda bukoya anyi bubi, udi ‘unyingalaja’ nyuma eu. (Ef 4:30) Nyuma muimpe ki mmuntu to, kadi udi uleja tshidi bumuntu bua tshijila bua Nzambi, nanku udi mua ‘kunyingalala.’ Muntu udi nende yeye wenza bualu kampanda bubi udi ‘ujima kapia ka nyuma.’ (1Ts 5:19) Yeye utungunuka ne kuenza malu mabi, nyuma wa Nzambi udi mua ‘kunyingalala,’ bifikisha Nzambi ku dimukina. (Yes 63:10) Muntu udi unyingalaja nyuma muimpe udi anu bu udi umupenda, pende muntu udi umupenda udi wenza mpekatu munene; Yezu uvua muambe ne: muntu wa mushindu au kabakumufuila luse to, nansha mu ndongoluelu wa malu eu, nansha mu utshidi ulua.—Mat 12:31, 32; Mâk 3:28-30; tangila SPIRITU.
Lukuka
Ludi lumuenekela mu bienzedi. Lukuka ludi lumueneka patoke mu amue malu adi muntu wenza adi aleja mudiye ne meji mabi adi kaayi a ku tshifukilu. Yakobo mufundi wa Bible udi uleja ne: dijinga dibi padidi dikola didi dilela mpekatu. (Yak. 1:14, 15) Muena lukuka udi mua kumanyika ku malu adiye wenza. Mupostolo Paulo wakamba ne: kuikala muena lukuka kudi mumue ne kuikala mutendeledi wa mpingu. (Ef. 5:5) Muntu wa nanku udi uvuija tshintu tshidiye ujinga nzambi wende, utshiteka kumpala kua mudimu wa Mufuki wende ne ntendelelu wende.
LUMINGU LUA DIA 24-30/6
BIUMA BIA MU DÎYI DIA NZAMBI | FILIPOYI 1-4
Dikeba bubanji bua mu Dîyi dia Nzambi
Milambu
Milambu ya bia kunua. Bena Isalele bavua balambula milambu ya bia kunua pamue ne milambu mikuabu ya bungi, nangananga pakavuabu babuele mu Buloba Bulaya. (Nom 15:2, 5, 8-10) Milambu ayi ivua mvinyo (“maluvu makole”) uvuabu bapongolola pa tshioshelu. (Nom 28:7, 14 ; tangila kabidi Eks 30:9; Nom 15:10.) Mupostolo Paulo wakafundila bena Kristo ba mu Filipoyi ne: “Nansha bobu benda bampongolola bu mulambu wa bia kunua pa mulambu ne mudimu wa tshijila kudi ditabuja dienu dinufikishe, ndi ne disanka.” Muaba eu Paulo udi utela mulambu wa bia kunua bua kuleja dijinga divuaye nadi dia kudifila yeye muine bua bena Kristo nende. (Flp 2:17) Matuku makese kumpala kua kufuaye, wakafundila Timote ne: “Bakadi benda bampongolola bu mulambu wa bia kunua, ne tshikondo tshia kundekelabu tshikadi pabuipi.”—2Tm 4:6.