TUIKALAYI NE NSOMBELU WA BUENA KRISTO
Ikala mudilongolole anu ku mpindieu bua malu a tshimpitshimpi
Bua tshinyi mbimpe kudilongolola? Njiwu anyi masama a tshimpitshimpi ne dibuela mu lupitadi mmalu adi mua kutukuata kaayi ela mpungi to. Nunku, longolola bionso biudi mua kulongolola mpindieu bidi mua kulua kukuambuluisha bua kupeta luondapu luimpe dîba dia disama dia tshimpitshimpi. Wewe muenze nanku, neuleje muudi unemeka muoyo ne mukenji wa Yehowa wa mashi.—Bz 15:28, 29.
Ntshinyi tshiudi mua kuenza bua kudilongolola?
Sambila ne uwuje karte ka dibenga kuedibua mashi (karte ka DPA) bimpe menemene.a Bamanyishi bakadi babatijibue badi mua kuangata kabu karte ka DPA kudi muanetu utu utangila malu a mikanda, kuangatshila ne bana babu batekete karte ka bumuntu (Carte d’identité).
Wewe mamu udi ne difu, lomba bakulu formilere wa Malu a kumanyisha bamamu badi ne mafu (S-401). Formilere eu neakuambuluishe bua kumanya tshia kuenza mu ntatu idi mua kumueneka tshikondo tshiudi ne difu ne pa kulela.
Wewe musungule ngondapilu udi mufuane kukebesha lutatu lua bualu bua mashi anyi bua wewe kushala mu lupitadi, dianjila kumanyisha bakulu ne wambile bena mu lupitadi ne: nebalue kuntangila kudi muanetu wa mu Bantemu ba Yehowa.
Mmunyi mudi bakulu mua kukuambuluisha? Badi mua kukuambuluisha bua kuwuja karte ka DPA. Nansha nanku, bakulu kabakukuangatshila mapangadika a ngondapilu wa wewe kulonda anyi kulejabu mmuenenu wa mukulu ne mukulu mu bualu abu to. (Lom 14:12; Gal 6:5) Paudi umanyisha bakulu ba mu tshisumbu tshienu ne: udi mu nsombelu udi tshilumbu tshia mashi mua kumueneka, nebakubikidile diakamue bena mu Komite wa diumvuangana ne mpitadi.
Mmunyi mudi bena mu komite au mua kukuambuluisha? Mbalongeshe bana betu ba mu komite eu mua kuambuluisha baminganga ne bena malu a mikenji bua kumvuabu mmuenenu wetu wa bualu bua mashi bilondeshile ntendelelu wetu. Badi mua kuyukila ne baminganga bua bakebe mishindu mikuabu ya kukuondapa kabayi bakuela mashi to. Badi mua kukukebela doktere udi unemeka mmuenenu webe wa mashi pikalabi bikengela.
NUTANGILE FILME WA MUA KUDIANGATSHILA MAPANGADIKA MU TSHILUMBU TSHIA MASHI, PASHISHE NUANDAMUNE LUKONKO ELU:
Mbualu kayi buudi mulonge mu filme eu budi mua kukuambuluisha bua kuikala mudilongolole bua malu a tshimpitshimpi adi mua kulomba diedibua mashi?
a Dilongesha dia 39 dia mukanda wa Shala ne muoyo kashidi! didi mua kukuambuluisha bua kuangata mapangadika bua ngondapilu udi tshilumbu tshia mashi mua kumueneka.