Mutu Yehowa wandamuna masambila etu

1, 2. Ntshinyi tshitutu pamuapa tudiebeja bua masambila etu?

UKADIKU mudiebeje bua kumanya ni Yehowa utu wandamuna masambila ebe anyi? Biobi nanku, kuena nkayebe to. Bana betu ba bungi bakadi pabu bambe mutubu badiebeja bualu ebu nangananga padibu mu ntatu. Bituikala tukenga, bidi mua kutukolela petu bua kujingulula mudi Yehowa wandamuna masambila etu.

² Tumonayi tshidi tshitujadikila ne: Yehowa utu wandamuna masambila a batendeledi bende. (1 Yone 5:15) Netuandamune kabidi nkonko eyi: Bua tshinyi bidi mua kumueneka imue misangu bu ne: Yehowa kena wandamuna masambila etu? Mmushindu kayi utu Yehowa wandamuna masambila etu?

YEHOWA UDI MUA KUANDAMUNA MU MUSHINDU UTUDI KATUYI BATEKEMENE

3. Bua tshinyi Yehowa mmusue bua tuikale tusambila?

³ Bible udi utujadikila ne: Yehowa mmutunange bikole, ne utu utuangata ne mushinga. (Hag. 2:7; 1 Yone 4:10) Ke bualu kayi udi utuambila bua tuikale tusambila, tumulomba diambuluisha. (1 Pet. 5:6, 7) Mmusue kutuambuluisha bua tushale pabuipi nende ne tunanukile mu ntatu itudi nayi.

4. Ntshinyi tshidi tshitujadikila ne: Yehowa utu wandamuna masambila a batendeledi bende? (Tangila kabidi tshimfuanyi.)

⁴ Patutu tubala Bible, tutu tumona muvua Yehowa wandamuna masambila a batendeledi bende. Tuangate tshilejilu tshia mukalenge Davidi. Mu nsombelu wende mujima, uvua mutuilangane ne baluishi babi ba bungi menemene, ne uvua anu ulomba Yehowa diambuluisha. Musangu mukuabu wakalomba Yehowa ne: “Yehowa wanyi, teleja disambila dianyi; umvua disengelela dianyi dia dilomba diambuluisha. Ngandamuna mu lulamatu luebe ne mu buakane buebe.” (Mis. 143:1) Yehowa wakandamuna masambila a Davidi, yeye kumusungila. (1 Sam. 19:10, 18-20; 2 Sam. 5:17-25) Davidi uvua mua kuamba ne dishindika dionso ne: “Yehowa udi pabuipi ne bonso badi bamubila.” Tudi petu mua kuikala ne dishindika adi.​—Mis. 145:18.

5. Yehowa uvua wandamuna masambila a batendeledi bende ba kale mu mushindu uvuabu batekemene anyi? Fila tshilejilu. (Tangila kabidi tshimfuanyi.)

⁵ Yehowa utu pamuapa wandamuna masambila etu mu mushindu utudi katuyi batekemene. Ke tshivua tshienzekele mupostolo Paulo. Wakalomba Nzambi bua umbushe “dieba mu mubidi” wende. Paulo wakasambila misangu isatu mijima anu bua lutatu alu. Yehowa wakandamuna masambila au anyi? Eyowa, kadi ki mmu mushindu uvua Paulo mutekemene to. Pamutu pa Yehowa kumujikijila lutatu alu, wakamupesha bukole buvuaye nabu dijinga bua atungunuke ne kumuenzela mudimu ne lulamatu.​—2 Kol. 12:7-10.

6. Bua tshinyi bidi mua kumueneka imue misangu bu ne: Yehowa kena wandamuna masambila etu?

⁶ Yehowa udi mua kuandamuna masambila etu petu mu mushindu utuvua katuyi batekemene to. Tuikale batuishibue ne: Yehowa mmumanye mushindu mutambe buimpe menemene wa kutuambuluisha. Udi mene “mua kuenza bivule bipitshidile kule ne kule malu onso atudi tulomba anyi tuelela meji.” (Ef. 3:20) Bua bualu abu, udi mua kuandamuna masambila etu dîba dituvua katuyi bamanye anyi mu mushindu utuvua katuyi belele meji.

7. Bua tshinyi bidi mua kutulomba bua kushintulula malu atudi tulomba mu disambila? Fila tshilejilu.

⁷ Pamuapa tudi mua kushintulula malu atudi tulomba mu disambila patudi tujingulula tshidi disua dia Yehowa menemene. Tuangate tshilejilu tshia muanetu Martin Poetzinger. Matuku makese yeye mumane kusela, bakamuela mu buloko bua bena Nazi bua dienzejangana midimu mikole. Kumpala, wakalomba Yehowa bua bamupatule mu buloko abu bua amone mua kutabalela mukajende ne bua atuadijilule kuyisha. Kadi panyima pa mbingu ibidi, kavua mumone bualu nansha bumue buvua buleja ne: Yehowa uvua mua kumupatulamu to. Nunku, wakatuadija kusambila ne: “Yehowa, suaku undeje tshiudi musue bua meme kuenza.” Pashishe kutuadijaye kuela meji bua bena Kristo netu bavua pabu mu buloko amu. Ba bungi ba kudibu bavua basamisha mutu bua bakaji babu ne bana babu. Ke muanetu Poetzinger kutuadija kusambila ne: “Yehowa, tuasakidila bua mudimu mupiamupia uudi mumpeshe eu. Ngambuluisha bua ngikale nkolesha bana betu aba ne mbakankamija.” Wakenzamu bidimu tshitema, ubakankamija ne ubakolesha.

8. Mbualu kayi bua mushinga butudi ne bua kumanya patudi tusambila?

⁸ Tudi ne bua kumanya ne: Yehowa udi ne malu adiye mulongolole, ne neaakumbaje anu dîba didiye muteke. Mu malu adiye mulongolole au, mudi dijimija dia bintu bionso bidi bitukebela ntatu lelu eu bu mudi bipupu, masama, ne lufu bua kashidi. Yehowa neakumbaje disua diende ku diambuluisha dia Bukalenge buende. (Dan. 2:44; Buak. 21:3, 4) Kadi mu dindila tshikondo atshi, Yehowa mmulekele Satana ukokesha buloba.b (Yone 12:31; Buak. 12:9) Yehowa yeye mujikije ntatu ya bukua bantu lelu, bidi mua kumueneka bu ne: Satana udi ukokesha bimpe. Nunku bu mutudi ne bua kuindila bua Yehowa akumbaje milayi yende, kabiena biumvuija ne: mmutulekele kayi utuambuluisha to. Tumonayi imue mishindu idiye utuambuluisha.

MISHINDU IDI YEHOWA WANDAMUNA MASAMBILA LELU

9. Mmunyi mudi Yehowa mua kutuambuluisha patudi tukeba kuangata mapangadika? Fila tshilejilu.

⁹ Udi utupesha meji. Yehowa mmutulaye bua kutupesha meji adi akengela bua tuangate mapangadika mimpe. Tudi dijinga ne meji a Nzambi nangananga patudi tuangata mapangadika ashintulula nsombelu wetu mujima, bu mudi dia kushala mujike anyi kubuela mu dibaka. (Yak. 1:5) Tumonayi tshivua tshifikile muanetu wa bakaji mukuabu udi mujike, diende Maria.c Uvua wenza mudimu wa bu mpanda-njila ne disanka pakatuilanganaye ne muanetu wa balume mukuabu. Udi wamba ne: “Bu muvua bulunda buetu buenda bukola, tuvua tuenda tunangangana bikole. Mvua mumanye ne: mvua ne bua kuangata dipangadika. Meme kusambila bikole menemene bua bualu abu. Mvua dijinga ne buludiki bua Yehowa, kadi mvua mumanye kabidi ne: kavua mua kungangatshila dipangadika to.” Udi uleja ne: Yehowa wakandamuna masambila ende, kumupeshaye meji. Mushindu kayi? Bu muvuaye mukebulule malu mu mikanda yetu, wakapeta biena-bualu bivua bimupeteshe mandamuna a nkonko yende. Wakatumikila kabidi mibelu ya meji ya kudi mamuende uvua ne lulamatu kudi Yehowa. Mibelu ayi yakambuluisha Maria bua kukonkonona dinanga divuaye munange muanetu wa balume au; kumanya kuvua dinanga diende mua kumufikisha. Nunku wakamanya mua kuangata dipangadika dia meji.

10. Bilondeshile Filipoyi 4:13, Yehowa neenze tshinyi bua kuambuluisha batendeledi bende? Fila tshilejilu. (Tangila kabidi tshimfuanyi.)

¹⁰ Udi utupesha bukole bua kunanukila. Anu bu muvua Yehowa mupeshe mupostolo Paulo bukole, neatupeshe petu bukole butudi tukengela bua kunanukila mu ntatu. (Bala Filipoyi 4:13.) Mona muvua Yehowa muambuluishe muanetu Benjamin bua kunanukila mu ntatu. Patshivuaye nsonga, yeye ne bena mu dîku diabu bavua basombele mu kamponyi ka bena tshimuangi mu Afrike. Udi wamba ne: “Mvua nsambila misangu yonso ndomba Yehowa bua ampeshe bukole bua kuenza malu adi amusankisha. Yehowa wakandamuna masambila anyi, kumpeshaye ditalala dia mu lungenyi, dikima dia kutungunuka ne kuyisha, ne mikanda ya kubala bua ngikale anu nende mu malanda makole.” Udi utungunuka wamba ne: “Kubala malu a bena Kristo nanyi bakuabu ne kulonga muvua Yehowa mubambuluishe bua kunanukila, kuakakolesha dipangadika dianyi dia kushala mumulamate.”

11, 12. Leja mudi Yehowa wandamuna masambila etu ku diambuluisha dia bena Kristo netu? (Tangila kabidi tshimfuanyi.)

¹¹ Udi usaka bena Kristo netu bua kutuambuluisha. Butuku kumpala kua kushipabu Yezu, wakasambila bikole. Wakalomba Yehowa bua amuepule ku tshipendu tshia ne: mmupendi wa Nzambi. Pamutu pa Yehowa kuenza nanku, wakatuma muanjelu bua kumukolesha. (Luka 22:42, 43) Yehowa udi mua kutuambuluisha petu kupitshila kudi bana betu ba balume ne ba bakaji badi mua kutubikila ku telefone anyi kulua kututangila bua kutukankamija. Tuetu bonso tudi mua kukeba mpunga ya kuambila bena Kristo netu “dîyi dimpe.”​—Nsu. 12:25.

¹² Tuangatayi tshilejilu tshia muanetu Miriam. Mbingu mikese bayende mumane kufua, uvua anu nkayende kumbelu muikale ne kanyinganyinga kakole, udiumvua mushikile. Uvua anu udila, ukeba muntu wa kumuyukidisha. Udi wamba ne: “Tshivua ne bukole bua kubikila muntu nansha umue to, nunku ngakasambila. Pantshivua nsambila ngenda ndila apu, telefone wanyi wakadila. Mukulu mukuabu uvua mulunda wanyi munene ke uvua umbikila au.” Mukulu au ne mukajende bakakolesha Miriam. Uvua mutuishibue ne: Yehowa ke uvua musake muanetu au bua kumubikila.

13. Fila tshilejilu tshia mudi Yehowa mua kusaka bantu badi kabayi bamutendelela bua kuandamuna masambila etu?

¹³ Udi mua kuandamuna masambila etu kupitshila kudi bantu badi kabayi bamutendelela. (Nsu. 21:1) Imue misangu, Yehowa utu usaka bantu badi kabayi bamutendelela bua kuenzela bantu bende malu mimpe bua kuandamuna masambila a batendeledi bende. Tshilejilu, wakasaka mukalenge Atashasete bua kuitaba dilomba dia Nehemiya dia kupingana mu Yelushalema bua kuibakulula tshimenga. (Neh. 2:3-6) Lelu kabidi, Yehowa udi mua kusaka bantu badi kabayi bamutendelela bua kutuambuluisha patudi mu lutatu.

14. Mmunyi mudi tshilejilu tshia Soo Hing tshikukankamija? (Tangila kabidi tshimfuanyi.)

¹⁴ Muanetu wa bakaji diende Soo Hing wakamona ne: Yehowa uvua musake doktere wende bua kumuambuluisha. Muanende wa balume uvua ne masama a mutu. Pavua muanende au mupete njiwu mikole, yeye ne bayende bakalekela mudimu bua kuikala kumutabalela. Nunku, bakapeta lutatu lua makuta. Soo Hing wakamba ne: ukavua umvua bu ne: ukavua mushikile. Wakambila Yehowa yende yonso ya munda, kumulombaye bua amuambuluishe. Doktere uvua utangila bualu buabu au wakabatabalela bikole. Kuenzaye bua bapete diambuluisha dia kudi mbulamatadi ne muaba muimpe wa kusomba. Pashishe wakamba ne: “Tuakamona tshianza tshia Yehowa mu bualu ebu. Udi bushuwa ‘Muteleji wa disambila.’”​—Mis. 65:2.

BIDI BIKENGELA DITABUJA BUA KUKEBA DIANDAMUNA DIA YEHOWA NE KUDITABA

15. Ntshinyi tshiakambuluisha muanetu wa bakaji mukuabu bua kumanya ne: Yehowa uvua wandamuna masambila ende?

¹⁵ Yehowa katu wandamuna masambila etu misangu yonso mu mushindu udi ukemesha to. Kadi mandamuna atutu tupeta atu anu atutu nawu dijinga bua kushala ne lulamatu kudi Tatu wetu wa mu diulu. Nunku, ikala ukeba bua kumanya mudi Yehowa wandamuna masambila ebe. Muanetu wa bakaji Yoko uvua umona anu bu ne: Yehowa kavua wandamuna masambila ende to, kadi pashishe wakatuadija kufunda malu avuaye ulomba Yehowa. Panyima pa matuku, wakatangila malu avuaye mufunde au, kumonaye ne: Yehowa uvua muandamune masambila ende a bungi too ne akavuaye yeye muine mupue muoyo. Ku musangu ne ku musangu, mbimpe tuikale tuelangana meji a mudi Yehowa wandamuna masambila etu.​—Mis. 66:19, 20.

16. Mmunyi mutudi mua kuleja ne: tudi ne ditabuja mu tshilumbu tshia disambila? (Ebelu 11:6)

¹⁶ Tudi tuleja ditabuja patudi tusambila ne patudi tuitaba mushindu kayi wonso udi Yehowa wandamuna masambila etu. (Bala Ebelu 11:6.) Tuangate tshilejilu tshia Mike ne mukajende Chrissy. Bavua ne tshipatshila tshia kuya ku Betele. Mike udi wamba ne: “Tuvua buwuje dilomba bua kuya ku Betele misangu ya bungi ne tuvua tusambila bikole bua tshipatshila atshi, kadi kabavua batubikile to.” Mike ne mukajende bavua bashale ne dishindika dia ne: Yehowa mmumanye mushindu mutambe buimpe wa kuenza nabu mudimu. Bakatungunuka ne kuenza tshivuabu mua kukokesha, benza mudimu wa bumpanda-njila muaba uvuabu dijinga ne bamanyishi ba bungi ne bambuluisha mu midimu ya luibaku. Lelu badi mu mudimu wa butangidi buena ngendu. Mike udi wamba ne: “Yehowa kavua anu wandamuna masambila etu mu mushindu utuvua batekemene to, kadi uvua muandamune mu mushindu muimpe utuvua tuetu bine katuyi belele meji to.”

17, 18. Bilondeshile Misambu 86:6, 7, tudi ne bua kuikala ne dishindika kayi?

¹⁷ Bala Misambu 86:6, 7. Davidi, muimbi wa misambu uvua mutuishibue ne: Yehowa uvua uteleja masambila ende ne uandamuna. Ikala mutuishibue pebe nanku. Bilejilu bitudi bakuile mu tshiena-bualu etshi bidi bitujadikila ne: Yehowa udi mua kutupesha meji ne bukole bitudi tukengela bua kunanukila. Udi mua kusaka bena Kristo netu anyi mene bantu badi kabayi banji kuikala batendeledi bende bua kutuambuluisha mu mishindu kampanda.

¹⁸ Padi Yehowa kayi wandamuna masambila etu mu mushindu utudi batekemene, tudi bamanye ne: neaandamune anu. Neatupeshe tshitudi tukengela, utupeshatshi pa dîba ditudi natshi dijinga menemene. Nunku ikalayi nusambila batuishibue ne: Yehowa neanutabalele mpindieu ne ‘neakumbaje dijinga dia tshintu tshionso tshidi ne muoyo.’​—Mis. 145:16.