Leja muudi ne dianyisha bua “mapa mikale bantu”

1. Ngamue mapa kayi adi Yezu mutupeshe?

KAKUENA muntu utu wambuluishangana bu Yezu to. Pavuaye pa buloba, uvua wenza bishima bua kuambuluisha bantu. (Luka 9:​12-17) Wakatufidila dipa ditambe bunene dia muoyo wende. (Yone 15:13) Katshia wabishibua ku lufu, mmutungunuke ne kuambuluisha bantu. Anu muvuaye mulaye, wakalomba Yehowa bua atupeshe nyuma wende muimpe bua nyuma au atulongeshe ne atukoleshe. (Yone 14:​16, 17, dim; 16:13) Yezu udi utungunuka ne kutupesha bitudi nabi dijinga ku diambuluisha dia bisangilu bia tshisumbu bua tulongeshe bantu ba pa buloba bujima bua kubavuija bayidi.—Mat. 28:​18-20.

2. Munkatshi mua “mapa mikale bantu” adibu batele mu Efeso 4:​7, 8 mudi banganyi?

² Tuakulayi bua mapa makuabu adi Yezu mutupeshe. Mupostolo Paulo wakafunda ne: Yezu mumane kubanda mu diulu, “wakafila mapa mikale bantu.” (Bala Efeso 4:​7, 8.) Wakumvuija ne: Yezu uvua mufile mapa au bua kuambuluisha tshisumbu tshia bena Kristo mu mishindu ya bungi. (Efeso 1:​22, 23; 4:​11-13) Lelu, munkatshi mua “mapa mikale bantu” au mudi basadidi ba mudimu, bakulu, ne batangidi ba bijengu.a Bu mudi bantu aba bapange bupuangane, batu benza bilema. (Yak. 3:2) Nansha nanku Mukalenge Yezu Kristo udi wenza nabu mudimu bua kutuambuluisha. Badi mapa adiye mutupeshe.

3. Leja mutudi tuetu bonso mua kukuatshisha “mapa mikale bantu” aa mu mudimu udibu benza.

³ Yezu mmupeshe “mapa mikale bantu” aa mudimu wa kukolesha tshisumbu tshia bena Kristo. (Ef. 4:12) Kadi tuetu bonso tudi mua kubakuatshisha bua benze mudimu wabu wa mushinga mukole eu. Tshilejilu, padiku mudimu wa dibaka nzubu wa Bukalenge, bamue batu badifila bua kuwenza; bakuabu batu bambuluisha badi bawenza abu, babatuadila biakudia anyi bintu bikuabu peshi babambuluisha mu mishindu mikuabu. Bia muomumue, tuetu bonso tudi mua kuambuluisha basadidi ba mudimu, bakulu, ne batangidi ba bijengu ku bitudi tuamba ne tuenza. Tumonayi mudi mudimu wabu mukole mua kutuambuluisha ne mutudi mua kubaleja dianyisha, kudileja kabidi Yezu udi mutupeshe “mapa mikale bantu” aa.

BASADIDI BA MUDIMU BADI BENZA “MIDIMU YA DIAMBULUISHANGANA”

4. Ngimue “midimu kayi ya diambuluishangana” ivua basadidi ba mudimu benza mu bidimu lukama bia kumpala?

⁴ Mu bidimu lukama bia kumpala, bavua bateka bamue bana betu ba balume basadidi ba mudimu. (1 Tim. 3:8) Bidi bimueneka ne: bobu ke bavua benza “midimu ya diambuluishangana” ivua Paulo muakuile. (1 Kol. 12:28) Nunku bidi bimueneka kabidi ne: basadidi ba mudimu bavua benza midimu ya bungi ya mushinga, biambuluisha bakulu bua kudifila ku mudimu wa dilongesha ne wa bulami. Tshilejilu, basadidi ba mudimu bavua pamuapa bambuluishe bua kutentula Mifundu ya tshijila anyi basumbe bintu bivua bikengela bua kuyitentula.

5. Ngimue midimu kayi ya diambuluishangana idi basadidi ba mudimu benza lelu?

⁵ Mona imue midimu ya diambuluishangana idi basadidi ba mudimu benza mu tshisumbu tshienu. (1 Pet. 4:10) Badi mua kubateka ku malu a tshibutshilu tshia makuta anyi a teritware ne ku mikanda (benza kabidi bua ikalaku bua bamanyishi kuyipeta). Badi mua kubateka ku malu a biamu bia mêyi ne bindidimbi, ku diakidilangana, anyi kubapesha mudimu wa dilama Nzubu wa Bukalenge ne mankenda. Midimu yonso eyi idi ne mushinga bualu idi yambuluisha tshisumbu bua kuendatshi bimpe. (1 Kol. 14:40) Basadidi batu kabidi benza imue midimu mu tshisangilu tshia Nsombelu ne mudimu wetu ne miyuki ya patoke. Badi kabidi mua kuteka musadidi wa mudimu bua ikale muambuluishi wa mutangidi wa kasumbu ka buambi. Imue misangu batu balomba basadidi ba mudimu bakumbane bua kufila bakulu mu makumbula a bulami.

6. Ngamue malu kayi adi atusaka bua kuikala ne dianyisha kudi basadidi ba mudimu bua mudimu wabu mukole?

⁶ Mudimu udi basadidi ba mudimu benza udi wambuluisha tshisumbu mushindu kayi? Muanetu wa bakaji wa mu Bolivie, diende Beberly,b udi wamba ne: “Basadidi ba mudimu batu benza bua bisangilu binsankishe bikole. Mudimu utubu benza utu ungambuluisha bua kuimba misambu, kuandamuna, kuteleja miyuki, ne kulonga malu adi mu filme ne bimfuanyi bidibu baleja mu bisangilu. Batu benza bua tudiumvue mu bukubi patudi mu bisangilu, bambuluisha kabidi bana betu badi kabayi ne mushindu wa kulua mu bisangilu bua kubilondela ku biamu bia bantu bakula bamonangane. Patu bisangilu bijika, batu bantunga mulongo ku dikomba, bambuluisha bua kubala makuta, ne benza bua tupete mikanda itudi nayi dijinga. Ndi mbela tuasakidila wa manza tente!” Muanetu wa bakaji Leslie wa mu ditunga dia Colombie udi bayende muikale mukulu, udi wamba ne: “Basadidi ba mudimu ke batu bambuluisha bayanyi bua kuenza midimu mishilashilangane. Bu bobu kabayi bamuambuluisha, bia kuenza bivua bimupita bungi. Nunku ndi ne dianyisha dia bungi kudibu, bua mudibu badiakeje bua kumuambuluisha ne disanka dionso.” Udiku pebe ne dianyisha bua mudimu udi basadidi ba mu tshisumbu tshienu benza anyi?—1 Tim. 3:13.

7. Mmunyi mutudi mua kuleja dianyisha bua mudimu udi basadidi ba mudimu benza? (Tangila kabidi tshimfuanyi.)

⁷ Nansha mutudi mua kuikala ne dianyisha kudi basadidi ba mudimu, Bible udi utulomba bua ‘tubambile mutudi tuanyisha’ mudimu wabu. (Kolos. 3:15) Mukulu mukuabu wa mu ditunga dia Finlande, diende Krzysztof, udi uleja dianyisha didiye nadi, wamba ne: “Ndi ntuma mukanda, mfundamu mêyi a mu mvese kampanda ne ndejamu muvua musadidi wa mudimu mukuabu mungambuluishe anyi tshidi tshinsaka bua kuanyisha mudimu wende.” Pascal ne Jael badi basombele mu Nouvelle-Calédonie batu basambila bua basadidi ba mudimu. Pascal udi wamba ne: “Matuku aa, tutu tusambila bikole bua basadidi ba mudimu ba mu tshisumbu tshietu, tuela Yehowa tuasakidila bua bualu buabu, tumulomba bua ikale nabu ne abambuluishe.” Yehowa utu uteleja masambila a mushindu eu, ne atu ambuluisha tshisumbu tshijima.—2 Kol. 1:11.

BAKULU BADI BENZA “MUDIMU MUKOLE MUNKATSHI MUENU”

8. Ntshinyi tshivua tshisake Paulo bua kuamba bua bakulu nende ne: badi “benza mudimu mukole”? (1 Tesalonike 5:​12, 13)

⁸ Bakulu ba mu tshikondo tshia Paulo bavua benza mudimu mukole mu tshisumbu. (Bala 1 Tesalonike 5:​12, 13; 1 Tim. 5:17) Bavua ‘balombola’ tshisumbu, tuambe ne: balombola bisangilu ne bangata mapangadika pamue. Bavua ‘badimuija’ bena Kristo nabu, mmumue ne: babapesha mibelu mimpe bua kubakuba. (1 Tes. 2:​11, 12; 2 Tim. 4:2) Bushuwa, bakulu aba bavua kabidi benza mudimu mukole bua kupetesha bena mu mêku abu bivuabu nabi dijinga ne badienzeja bua ditabuja diabu ne malanda abu ne Yehowa bikale anu bikole.—1 Tim. 3:​2, 4; Tito 1:​6-9.

9. Tela imue midimu itu bakulu benza lelu.

⁹ Lelu bakulu badi ne midimu ya bungi ya kuenza. Mukulu yonso udi wenza mudimu wa muambi. (2 Tim. 4:5) Badi tshilejilu tshimpe bua mudibu bayisha ne tshisumi, balongolola mudimu wa kuyisha mu teritware wabu, ne batulongesha bua kuyisha ne kulongesha bimpe. Batu kabidi balumbuluishi badi ne luse, kabayi ne kansungansunga. Padi muena Kristo wenza mpekatu munene, bakulu batu baditatshisha bua kumuambuluisha bua akajilule malanda ende ne Yehowa, eku bikale ne dîsu dikangula bua tshisumbu tshikale anu tshikezuke. (1 Kol. 5:​12, 13; Gal. 6:1) Mudimu wa bulami ke mudimu mutambe bunene utu bakulu benza. (1 Pet. 5:​1-3) Batu bela miyuki milongolola bimpe, badienzeja bua kumanya muntu yonso mu tshisumbu, ne benza makumbula a bulami. Bamue bakulu batu bambuluisha kabidi mu mudimu wa dibaka Nzubu ya Bukalenge ne wa diyilama, balongolola malu adi atangila mpungilu, benza mudimu mu Komite ya diumvuangana ne mpitadi ne batu mu tusumbu tudi ne mudimu wa kukumbula babedi. Pa kumbusha midimu eyi, badi ne mikuabu kabidi. Bulelela, bakulu badi batuenzela mudimu mukole!

10. Mmalu kayi adi atusaka bua kuikala ne dianyisha kudi bakulu bua mudimu mukole udibu benza?

¹⁰ Yehowa ukavua muambe ne: bakulu bavua ne bua kutulama, ne ‘katuvua [mua] kutshina anyi kumvua buôwa bukole kabidi to.’ (Yel. 23:4) Muanetu wa bakaji Johanna wa mu Finland wakadimuenena dikumbana dia mêyi aa pavua disama dikole dikuate mamuende. Udi wamba ne: “Bivua binkolela bua kukuatshila muntu mumvua ngumvua, kadi pangakakuatshila mukulu kampanda umvua tshiyi mumanye bimpe menemene, wakasambila nanyi, kuntelejaye ne lutulu. Wakanjadikila ne: Yehowa mmunange. Tshiena mvuluka menemene tshivuaye mungambile to, kadi ndi mvuluka ne: tshivua kabidi mumvue buôwa to. Ndi mutuishibue ne: Yehowa uvua mumutume bua kungambuluisha dîba menemene divua dikengela.” Mmushindu kayi uvua bakulu ba mu tshisumbu tshienu bakuambuluishe?

11. Mmunyi mutudi mua kuleja bakulu ne: tudi ne dianyisha bua mudimu wabu? (Tangila kabidi tshimfuanyi.)

¹¹ Yehowa mmusue ne: tuleje bakulu dianyisha “bua mudimu wabu.” (1 Tes. 5:​12, 13) Henrietta udi musombele pende mu Finland udi wamba ne: “Bakulu batu badifila bua kuambuluisha bakuabu, kadi abi kabiena biumvuija ne: bobu ke badi ne dîba dia bungi ne makanda a bungi anyi ne: kabena bobu ne ntatu to. Imue misangu ntu mbambila anu ne: ‘Bana betu, nudi bakulu bimpe ba dikema. Ndi musue bua numanye bualu abu.’” Muanetu wa bakaji Sera wa mu Turquie udi wamba ne: “Bakulu batu dijinga ne kubakankamija bua batungunuke ne kuenza mudimu wabu. Tudi mua kubafundila mesaje, kubabikidisha bua kuela nabu tshianza mukana anyi kuyisha nabu.” Kudi mukulu uutu utamba kuanyisha bua mudimu mukole utuye wenza mu tshisumbu tshienu anyi? Yeye muikalaku, keba mishindu ya kumuleja dianyisha diudi nadi adi.—1 Kol. 16:18.

BATANGIDI BA BIJENGU BATU BATUKOLESHA

12. Nkasumbu kayi kakuabu ka bantu balume kavua Yezu muteke bua kukolesha bisumbu? (1 Tesalonike 2:​7, 8)

¹² Yezu wakapesha kabidi tshisumbu “mapa mikale bantu” adi enza mudimu mu mushindu mukuabu. Wakasaka bakulu ba mu Yelushalema bua kutuma Paulo, Bânaba, ne bantu bakuabu mu mudimu wa butangidi buena ngendu. (Bien. 11:22) Bua tshinyi? Bua kukumbaja tshipatshila tshia muomumue ne tshia basadidi ne bakulu, tuambe ne: tshia kukolesha bisumbu. (Bien. 15:​40, 41) Bana betu abu bakadipangisha malu a bungi, bateka too ne mioyo yabu mu njiwu bua kulongesha bakuabu ne kubakankamija.—Bala 1 Tesalonike 2:​7, 8.

13. Ngimue midimu kayi itu batangidi ba bijengu benza?

¹³ Batangidi ba bijengu batu benza ngendu bikole. Bamue batu benza kilometre ya bungi bua kuya kukumbula bisumbu bikuabu. Mutangidi wa tshijengu utu ne miyuki ya kuela lumingu luonso, utu wenza makumbula a bulami, ulombola tshisangilu tshia bampanda-njila, tshia bakulu, ne bisangilu bia mudimu wa buambi. Utu ulongolola miyuki ya kuela, ulongolola kabidi malu bua mpuilu ne mpungilu. Utu ulongesha mu tulasa tua bampanda-njila, ulongolola malu bua tshisangilu tshia pa buatshi tshia bampanda-njila ba mu tshijengu tshiende, ne wenza midimu mikuabu, pamuapa idi Betele umupesha, umulomba bua kuyenza lukasa lukasa.

14. Ngamue malu kayi adi atusaka bua kuikala ne dianyisha kudi batangidi ba bijengu bua mudimu mukole udibu benza?

¹⁴ Patu batangidi ba bijengu bakumbula bisumbu, bitu biambuluisha bana betu mushindu kayi? Muanetu wa balume kampanda wa mu Turquie udi wamba bua makumbula a batangidi ba bijengu ne: “Musangu wonso utubu batukumbula, bitu binsaka bua kupitshisha dîba dia bungi, ngenda ngambuluisha bena Kristo nanyi. Nkadi mutuilangane ne batangidi ba bijengu ba bungi, kadi mu buonso buabu amu, kakuena nansha umue uvua umueneka bu ne: kavua muntu wa kukuatshila malu anyi kayi ne dîba dia kuyukila ne bakuabu to.” Johanna utukadi batele, wakayisha ne mutangidi wa tshijengu, kadi kabavua bapete muntu wa kuyisha to. Udi wamba ne: “Nansha nanku, tshitu mpua dituku adi muoyo to. Bana betu babidi ba bakaji ba munda mudi nzala bavua bafuma ku diumbuka muaba utuvua, baye muaba mukuabu. Pandi mbavuluka, muoyo udi unsama. Mutangidi wa tshijengu wakankakamija ne muoyo mujima, kungambuluishaye bua kumona ne: mudimu wa Yehowa udi mua kuenza bua tudisangane kule ne bakuabu, kadi mbua tshitupa tshîpi bualu mu bulongolodi bupiabupia, netuikale ne mpunga ya kusomba ne bena mu mêku etu ne balunda betu pamue bua kashidi.” Bana betu ba bungi batu pabu bavuluka malu mimpe a batangidi ba bijengu.—Bien. 20:37–21:1.

15. a) Bilondeshile 3 Yone 5-8, mmunyi mutudi mua kuleja batangidi ba bijengu dianyisha? (Tangila kabidi tshimfuanyi.) b) Bua tshinyi mbimpe tuikale ne dianyisha kudi bakaji ba bana betu badi benza midimu mikole mu tshisumbu? Mmushindu kayi utudi mua kubalejadi? (Tangila kazubu ka “Vuluka bakaji babu.”)

¹⁵ Mupostolo Yone wakakankamija Gayo bua kuakidila bana betu bavua balua kukumbula bisumbu bua ‘kubatuma mu njila wabu mu mushindu udi muakanyine Nzambi.’ (Bala 3 Yone 5-8.) Umue mushindu utudi mua kuenza nanku nkubikidisha mutangidi wa tshijengu bua tuele nende tshianza mukana. Mushindu mukuabu ngua kubuela mu bisangilu bia buambi padiye utukumbula. Leslie utukadi batele udi uleja pende dianyisha didiye nadi mu mishindu mikuabu. Udi wamba ne: “Ntu ndomba Yehowa bua atabalele majinga a batangidi ba bijengu. Meme ne bayanyi tuakabafundila kabidi mikanda, tubambila muvua makumbula abu matuambuluishe bikole. Vuluka ne: batangidi ba bijengu mbantu bu tuetu, batu pabu ne yabu ntatu ne batu batshioka pabu.” Kudi misangu itubu bapeta masama, tunyinganyinga ne ditekeshibua mu mikolo. Mêyi mimpe audi mua kuambila mutangidi wa tshijengu anyi katshintu kaudi mua kumupesha, bidi mua kuikala diandamuna dia disambila divuaye muenze ukeba diambuluisha!—Nsu. 12:25.

TUDI DIJINGA NE “MAPA MIKALE BANTU”

16. Bilondeshile Nsumuinu 3:​27, nkonko kayi idi bana betu ba balume mua kudiela?

¹⁶ Tudi basue ne: pa buloba bujima, bana betu ba balume ba bungi bikale “mapa mikale bantu.” Biwikale muanetu wa balume mumane kubatijibua, udi mua kuambuluisha tshisumbu mushindu eu anyi? (Bala Nsumuinu 3:27.) Udi ne dijinga dia kukumbaja malu malomba bua kulua musadidi wa mudimu anyi? Biwikale musadidi wa mudimu, udi ne dijinga dia kukumbaja malu malomba bua kulua mukulu anyi?c Udi ne mushindu wa kuakaja malu mu nsombelu webe bua kuwuja dilomba dia kuya ku Kalasa ka bamanyishi ba Bukalenge anyi? Neulonge malu a bungi mu kalasa aku ne neenze bua Yezu akuate nebe mudimu bikole menemene. Wewe umona ne: kuena mukumbane, lomba Yehowa nyuma wende bua akuambuluishe bua wenze mudimu wonso udibu bakupesha.—Luka 11:13; Bien. 20:28.

17. Dikalaku dia “mapa mikale bantu” mu tshisumbu didi dijadika tshinyi bua Mukalenge wetu Yezu Kristo?

¹⁷ Dikalaku dia “mapa mikale bantu” mu tshisumbu ntshijadiki tshia ne: Yezu udi utulombola mu matuku a ku nshikidilu aa. (Mat. 28:20) Bu mudi Mukalenge wetu Yezu mutunange, utuambuluisha, utupetesha bitudi nabi didijinga, ne mututekele bana betu ba balume bakumbane bua kutuambuluisha, kabienaku bitusaka bua kuikala ne dianyisha dia bungi kudiye anyi? Nunku keba mpunga ya kuambila bana betu abu muudi ne dianyisha bua mudimu mukole udibu benza. Kupu muoyo bua kuela Yehowa tuasakidila to, bualu yeye ke mufidi wa “Dipa dionso dimpe ne dipa dionso dipuangane.”—Yak. 1:17.