Diabolo utu mushindu kayi?

Diandamuna dia mu Bible

Diabolo mmuntu wa mu nyuma utu kayi umueneka to, mmumue ne: kena ne mubidi wa mashi ne mâyi to.—Efeso 6:11, 12.

Tshimfuanyi tshia Diabolo mukuate lunsomo lua lunene. Udi ne tshimuenekelu bu tshia mbuji muikale ne nsengu ne mukila.

Bazodi ba bungi batu bazola Diabolo mukuate lunsomo lua lunene, muikale ne tshimuenekelu bu tshia mbuji udi ne nsengu ne mukila. Bamue badi bela meji ne: bantu bavua bazole Diabolo mushindu eu bua musangu wa kumpala bavua ne muoyo kukadi bidimu bipite pa 1000. Bidi bimueneka ne: mianu ne bilele bia bantu ba kale ke bivua bibasake bua kuzola Diabolo mushindu au.

Ntshinyi tshidi Bible wamba bua Diabolo?

Bible udi ubikila Diabolo mu mishindu ya bungi. Bidi bituambuluisha bua kumanya bumuntu buende, kadi ki ntshimuenekelu tshiende to. Mona imue ya ku mishindu ayi:

Muanjelu wa butoke. Diabolo udi wenza bu udi upesha bantu bintu bimpe bua kubasaka bua kulonda malongesha ende pamutu pa kulonda malongesha a Nzambi.—2 Kolinto 11:14.
Ntambue udi ukungula. Diabolo udi uluisha batendeledi ba Nzambi ne luonji luonso.—1 Petelo 5:8.
Dragon munene. Diabolo udi ukuatshisha buôwa, udi ne bukole bua bungi, ne udi ne tshinyangu tshibi tshitambe.—Buakabuluibua 12:9.

Mvese idi yakula bua Diabolo

2 Kolinto 11:14: “Satana muine utu udivuija bu muanjelu wa butoke.”

Diumvuija: Satana udi ulobesha bantu ne bintu bimpe bua kubasaka bua balonde malongesha ende pamutu pa kulonda malongesha a Nzambi.
Efeso 6:11: “Vualayi bia mvita bionso bia kudi Nzambi bua numone mua kukandamena bienzedi bia budimu bia Diabolo.”

Diumvuija: Diabolo udi ulukakaja mayele mabi bua kufikisha bantu ku dibenga kutumikila Nzambi.
Yakobo 4:7: “Kokelayi Nzambi; kadi kandamenayi Diabolo, ne yeye neanunyeme.”

Diumvuija: Muntu yeye utumikila Nzambi pamutu pa Diabolo udi mua kukandamena mateyi a Satana bimpe.
1 Petelo 5:8: “Muena lukuna wenu, Diabolo, udi utambakana bu ntambue udi ukungula, ukeba bua kudia muntu.”

Diumvuija: Diabolo mmukine bantu badi batumikila Nzambi ne musue kushipa malanda abu nende.