Mariya wa ku Magadala uvua nganyi?

Diandamuna dia mu Bible

Mariya wa ku Magadala uvua muyidi wa Yezu Kristo wa lulamatu. Dîna diende dia Magadala edi didi pamuapa difumina ku tshimenga tshia Magadala (pamuapa Magadana). Tshimenga etshi tshivua pabuipi ne Mbuu wa Galela. Pamuapa Mariya uvua musombele muaba au tshikondo kampanda.

Mariya wa ku Magdala ngumue wa ku bakaji ba bungi bavua benda ne Yezu ne bayidi bende. Bakaji abu bavua babambuluisha ne bintu bia ku mubidi. (Luka 8:1-3) Mariya wa ku Magadala au wakamona bashipa Yezu, uvua kabidi mu bantu ba kumpala bavua bamone Yezu pavuaye mubishibue ku lufu.​—Mâko 15:40; Yone 20:11-18.

• Mariya wa ku Magadala uvua ndumba anyi?

• Mariya wa ku Magadala uvua “mupostolo kudi bapostolo” anyi?

• Mariya ku Magadala uvua mukaji wa Yezu Kristo anyi?

• Mu Bible mudi bakaji bungi kayi badibu babikila ne: Mariya?

Mariya wa ku Magadala uvua ndumba anyi?

Bible kena wamba ne: Mariya wa ku Magadala uvua ndumba to. Bible udi wakula anu bua bualu buende ne: Yezu wakipata bademon muanda mutekete bavua bamukuate.​—Luka 8:2.

Bua tshinyi bantu ba bungi badi bitaba ne: uvua ndumba kumpala kua yeye kulua muyidi wa Yezu? Bidimu nkama ya bungi panyima pa lufu luende, bantu bakuabu bakamba ne: Mariya ke muntu uvua kayi mumanyike uvua (pamuapa ndumba) uvua musukule makasa a Yezu ne binsonji biende, yeye kuakupula ne nsuki yende. (Luka 7:36-38) Kadi kakuena mvese nansha umue wa mu Bible udi ujadika bualu ebu to.

Mariya wa ku Magadala uvua “mupostolo kudi bapostolo” anyi?

Tòo. Bena Katolike badi bamubikila ne: “Mariya munsantu wa ku Magadala” anyi nne: “mupostolo kudi bapostolo” bualu uvua mu bantu ba kumpala bavua bamanyishe bapostolo dibishibua dia Yezu ku lufu. (Yone 20:18) Kadi kabiena bimuvuija mupostolo to. Bible muine kena wamba ne: uvua mupostolo to.​—Luka 6:12-16.

Bavua bajikije kufunda Bible pabuipi ne ku ndekelu kua bidimu lukama bia kumpala panyima pa Yezu. Bidimu nkama ya bungi pashishe, bamfumu ba bitendelelu bakapesha Mariya wa ku Magadala muanzu munene wa pa buawu. Mifundu ya mu bidimu bia 100 ne bia 200 idi kayiyi mu mikanda ya mu Bible idi yamba ne: bapostolo ba Yezu bakuabu bavua bumvuila Mariya mukawu. Malu mafuanyikija aa kaena ne tshijadiki nansha tshimue mu Bible to.

Mariya ku Magadala uvua mukaji wa Yezu Kristo anyi?

Tòo. Bushuwa, Bible udi uleja patoke ne: Yezu wakashala mujike.a