Biamu bidi bienza malu bu bantu​—Ndibenesha anyi mmulawu?​—Ntshinyi tshidi Bible wamba?

Matuku adi panshi aa, bamfumu ba buloba bujima, bamanyi ba bia panu, ne bamanyi ba malu a biamu mbaleje ne: biamu bidi bienza malu bu bantu bidi ne bukole bua bungi. Nansha mudibu bitabe ne: biamu ebi bidi biambuluisha, badi kabidi basamisha mutu bua mudibi bifuane kuenzelangana bibi.

• Mu dia 4/5/2023, mfumu tshindondi wa ditunga dia États-Unis Kamala Harris mmuambe ne: “Biamu bidi bienza malu bu bantu ngumue wa ku mishindu mibandile bikole ya mamanya a malu a biamu ya matuku etu aa idi mifuane kulengeja nsombelu wa bantu . . . Kadi biamu ebi mbifuane kabidi kuteka bantu mu njiwu mikole, kunyanga manême a bantu ne malu abu masokoka, ne kusaka bantu ku dibenga kueyemena tshididi tshia demokrasi.”

• Kasumbu ka badoktere ba bukua matunga ne baminganga bapiluke balombola kudi doktere Frederik Federspiel bavua bafunde mu tshikandakanda tshivuabu bapatule mu dia 9/5/2023 ne: “Nansha mudi biamu bidi bienza malu bu bantu mua kulengeja mushindu wa kuondopa bantu, mbifuane kutuenzela kabidi bibi ku mubidi ne mu lungenyi.”​—BMJ Global Health.a

• “Bantu bakadi benza malu ne biamu bidi bienza malu bu bantu bua kumuangalaja ngumu ya dishima. Mu matuku makese emu, mbifuane kujimijila bantu midimu. Bantu badi benza mudimu mu malu a biamu badi basamisha mutu bikole ne: kumpala eku biamu bidi bienza malu bu bantu mbifuane kuteka bukua bantu mu njiwu.”​—The New York Times, 1/5/2023.

Mu kupita kua matuku, netumone patoke ni bantu nebenze mudimu ne biamu bidi bienza malu bu bantu bua kuambuluisha bantu anyi kubenzela bibi. Ntshinyi tshidi Bible wamba?

Bua tshinyi bintu bidi bantu benza bidi bishiyangana ne dielakana?

Bible udi uleja bua tshinyi bantu kabena mua kutujadikila ne: mishindu mipiamipia ya biamu bidibu benza kabakuenza nayi mudimu anu bua malu mimpe to.

1. 1. Nansha bantu bobu ne meji mimpe, kabena mua kudianjila kumona bipeta bibi biakebesha malu adibu benza to.

   • “Kudi njila udi umueneka muakane ku mêsu kua muntu, kadi ku ndekelu udi ufikisha ku lufu.”​—Nsumuinu 14:12.

2. 2. Muntu kena mua kumanya ne: bantu bakuabu nebenze malu bimpe anyi bibi ne tshintu tshidiye mupatule to.

   • “Mvua ne bua [kushiya mudimu wanyi] bua muntu udi ulua panyima panyi. Kadi nnganyi udi mumanye bikalaye muena meji anyi mutshimbakane? Kadi yeye neikale ne bukokeshi ku mutu kua bintu bionso bimvua mukuatshile mudimu mukole ne musamishile meji bua kubipeta muinshi mua dîba.”​—Muambi 2:18, 19.

Dielakana dia nunku didi dileja bua tshinyi tudi dijinga ne buludiki bua kudi Mufuki wetu.

Nkuepi kutudi mua kutuma muoyo wetu?

Mufuki wetu mmulaye ne: kakulekela babutula buloba peshi bukua bantu kudi bantu anyi tshintu tshionso tshidi bantu benza to.

• “Buloba budi bushalaku kashidi.”​—Muambi 1:4.

• “Bantu bakane nebapiane buloba, nebasombapu bua kashidi.”​—Misambu 37:29.

Ku diambuluisha dia Bible, Mufuki wetu udi utupesha buludiki buatufikisha ku nsombelu muimpe wa ditalala matuku atshilualua. Bua kumanya malu a bungi adi Bible wamba, bala tshiena-bualu tshia “Ntshinyi tshidi mua kutuambuluisha bua kupeta nsombelu muimpe matuku atshilualua?” ne tshia “Ditekemena dilelela dia matuku atshilualua mimpe.”