Ndilu wa kudia anu bisekiseki nkayabi​—Ntshinyi tshidi Bible wamba?

Pa buloba bujima, bantu ba bungi mbasue kulamata ku ndilu wa badia anu bisekiseki nkayabi.

• “Ndilu wa kudia anu bisekiseki nkayabi mmushindu wa kuela meji ne wa kuenza malu udi bantu benza muabu muonso bua kubenga kukengesha nyama anyi kuyenzela bibi bua kuyidia, bua kuenza nayi bia kuvuala peshi bua malu makuabu.”​—The Vegan Society.

Bamue mbasue kulamata ku ndilu wa badia anu bisekiseki nkayabi bualu badi batabalela nyama, ne mbasue kuakaja nsombelu pa buloba, kuikala ne makanda a mubidi mimpe, anyi bua malu a ntendelelu.

• “Ndilu wa kudia anu bisekiseki nkayabi mmushilangane ne ndilu mikuabu ya bungi bualu bantu batu batamba kumona ndilu au bu dilongesha, dipangadika dia kuenza tshidi tshimpe anyi tshibi, peshi mushindu udi muntu yonso mua kulengeja buloba.”​—Britannica Academic.

Ndilu wa kudia anu bisekiseki nkayabi ke mushindu wa kujikija ntatu pa buloba anyi? Ntshinyi tshidi Bible wamba?

Mutu Mufuki wetu umona bantu ne nyama

Bible udi uleja ne: Mufuki wetu Yehowa Nzambia utu umona bantu bapite nyama, kabidi ne: mmupeshe bantu bukokeshi bua kuyikokesha. (Genese 1:27, 28) Ndekelu wa bionso, Nzambi wakanyishila bantu bua kudia nyama. (Genese 9:3) Kadi ki mmusue bantu bakengeshe nyama to.​—Nsumuinu 12:10.

Bilondeshile Bible, kudia nyama anyi kubenga kudia ndipangadika didi muntu nkayende ne bua kudiangatshila.b Dipangadika adi kadiena dituvuija bantu bimpe ku mêsu kua Nzambi to. (1 Kolinto 8:8) Muntu nansha umue kena ne bua kupetula dipangadika didi mukuabu wangata pa bidi bitangila bidiye usungula bua kudia to.​—Lomo 14:3.

Tshialengeja nsombelu wetu matuku atshilualua

Bible udi uleja ne: mapangadika atudi tuangata kaena mua kujikija ntatu idi pa buloba bujima to. Malu a tshididi, a mu nsombelu, ne a mpetu ke adi akebesha ntatu ya bungi idi pa buloba idi muntu kayi mua kujikija to. Bible udi wamba ne:

• “Tshintu tshidi tshikonyangale, kabena mua kutshilulamija.”​—Muambi 1:15.

Mufuki wetu neajikije ntatu itudi nayi lelu. Mu ngakuilu wa mu tshimfuanyi Bible udi uleja tshienzaye.

• “Ngakamona diulu dipiadipia ne buloba bupiabupia; bualu diulu dia kale ne buloba bua kale bivua bijimine, ne mbuu katshienaku kabidi to.”​—Buakabuluibua 21:1.

Nzambi neapingaje “diulu dipiadipia,” mmumue ne: Bukalenge buende bua mu diulu pa muaba wa mbulamatadi ya bana ba bantu, anyi “diulu dia kale.” Bukalenge buende nebumbushe “buloba bua kale,” mmumue ne: bantu babi, nebukokeshe “buloba bupiabupia,” anyi bantu badi bakokela bukokeshi buabu ne muoyo mujima.

Anu mu bukokeshi bua Bukalenge bua Nzambi ke muikala bantu mua kulonga mua kusomba mu ditalala ne nyama ne kunemeka bintu bidi pa buloba.​—Yeshaya 11:6-9.