Miliyare ya makuta mmituke bua mvita-Idi itudisha makuta bungi kayi menemene?

Mvita idi yangata makuta a bungi menemene.

• “Tshidimu tshishale etshi, mbulamatadi ya pa buloba bujima mmitule ndola miliyare binunu bibidi ne bia mu njila anu bua mvita.”​—The Washington Post, mu dia 13/2/2024.

Kadi pa kumbusha makuta, mvita idi ikebesha malu makuabu a bungi. Tuangate tshilejilu tshia mvita ya mu Ukraine.

• Basalayi. Badi batshinka ne: mbashipe basalayi batue ku binunu 500 anyi mbabatape bibi katshia mvita yatuadija bidimu bibidi bishale ebi.

• Bantu badi kabayi basalayi. Bilondeshila Bulongolodi bua matunga masanga, bantu bapite pa binunu 28 mbafue anyi mbatapike bibi menemene. Kadi munene kampanda wa Bulongolodi ebu wakamba ne: “Mbikole bua kumanya bungi bua bantu badi bafue anyi badi batapike mu mvita eyi.”a

Pa buloba bujima, bungi bua bantu badi bakenga bua mvita ne bimvundu mbupite bungi.

• Miliyo 114. Ke bungi bua bantu badi bamuangale miaba ivuabu bua mvita ne bua malu a tshikisu pa buloba bujima katshia mu ngondo wa 9 wa 2023.

• Miliyo 783. Ke bungi bua bantu badi batata bua biakudia. “Bimvundu ke bitshidi bikebesha nangananga dipangila dia biakudia; bantu bia pa lukama 70 badi ne nzala, badi miaba idi mvita ne malu a tshikisu.”​—Bulongolodi budi butangila malu a biakudia.

Mvita neyijika dimue dituku anyi? Tudi mua kutekemena nsombelu wa ditalala anyi? Nekuikale tshikondo tshiajika bupele ne bantu kupeta biakudia bia bungi anyi? Ntshinyi tshidi Bible wamba?

Tshikondo tshia mvita

Bible ukavua mumanyishe ne: nekuikale mvita ya bungi pa buloba, uvua mumvuije bualu ebu mu ngumvuilu wa mu tshimfuanyi pavuaye muakule bua muendeshi wa kabalu.

• “Kabalu kakuabu kakapatuka, ka dikala dikunze kunzuu, ne bakapesha eu uvua musombapu bukokeshi bua kumbusha ditalala pa buloba bua bantu bashipangane, ne bakamupesha muele wa mvita munene.”​—Buakabuluibua 6:4.

Muendeshi wa kabalu wa mu tshimfuanyi eu badi bamulondela kudi bakuabu babidi badi tshimfuanyi tshia tshiyole tshia nzala ne lufu bu tshipupu tshikebesha kudi malu makuabu pa buloba bujima. (Buakabuluibua 6:5-8) Bua kumanya malu makuabu a bungi adi atangila dîyi dia buprofete edi ne bua tshinyi tudi ne bua kutuishibua ne: didi munkatshi mua kukumbana matuku etu aa, bala tshiena-bualu tshia “Bendeshi ba tubalu banayi mbanganyi?”

Ditekemena dia ditalala

Mu katupa kîpi emu, kabakuikala benza mudimu ne mabanji a pa buloba bua mvita to. Kadi, kabiakuenzeka ku bukole bua bantu to. Bible udi wamba ne:

• Nzambi ‘neajikije mvita pa buloba bujima.’​—Misambu 46:9.

• Nzambi neajikije malu mabi onso makebesha kudi mvita. “Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”​—Buakabuluibua 21:4.

• Nzambi neajadike ditalala dia kashidi bua bantu bonso. “Bantu banyi nebasombele muaba udi ditalala dia kashidi, mu miaba ya kusombela ya bukubi ne mu miaba ya kuikishila ya bupole.”​—Yeshaya 32:18.

Bilondeshila dîyi dia buprofete dia mu Bible, mvita ne malu makuabu atudi tumona lelu adi aleja ne: tshikondo tshia ditalala tshikadi pabuipi.

Mmunyi muatutuadila Nzambi ditalala edi? Neatutuadiladi ku diambuluisha dia mbulamatadi wende wa mu diulu anyi Bukalenge buende. (Matayi 6:10) Bua kumanya tshidi Bukalenge ebu ne tshidibu mua kukuenzela, tangila filme muîpi wa Bukalenge bua Nzambi ntshinyi?