Bantemu ba Yehowa batu bepuka bantu bakadi balekele buntemu anyi

Tòo, katutu bakine bantu bavua babatijibue Bantemu ba Yehowa bakadi mpindieu kabatshiyi bayisha anyi pamuapa kabatshiyi babuela netu mu bisangilu to. Kadi tudi tuya kudibu bua kubambuluisha bua bapetulule kabidi nyanji ya malu a Nzambi.

Muntu yeye muenze mpekatu munene, katutu tumuipata anu musangu umue mu tshisumbu to. Kadi Ntemu ukadi mubatijibue yeye muenze bualu budi bushipa mukenji kampanda wa mu Bible ne kayi munyingalale to, tudi tumuipata mu tshisumbu. Bible udi wamba patoke ne: “Umbushayi muntu mubi au munkatshi muenu”.​—1 Kolinto 5:13.

Kadi tshienzeka ntshinyi bobu bipate mulume mu tshisumbu eku mukajende ne bana bende bikale anu Bantemu? Kabakuenza kabidi malu a mu nyuma pamue to, kadi malanda ende ne bena mu dîku diende kaakukoseka to. Dibaka diabu kadiakufua to, ne nebikale anu banangangane ne bena mu dîku diende.

Muntu udibu bipate mu tshisumbu udi mua kubuela mu bisangilu bietu. Ne yeye musue, bakulu ba mu tshisumbu badi mua kumupesha mibelu idi mua kumuambuluisha bua kuluaye kabidi Ntemu. Muntu au yeye mulekele bienzedi bibi, muleje ne muoyo mujima ne: mmusue kuikala ne nsombelu udi umvuangana ne mikenji ya mu Bible, badi mua kumupingaja mu tshisumbu.