Nkuepi kutu Bantemu ba Yehowa bapetela makuta a mudimu wabu?

Makuta atutu tupeta bua kuenza midimu yetu atu afumina banga banga ku mapa a budisuile adibu bafila kudi Bantemu ba Yehowa.a Tutu bateke tushete tua kuela makuta mu miaba yetu ya kudisangishila, ne tudi baleje mishindu mikuabu ya difila mapa mu tshitupa tshia: Kufila dipa. Mbalejamu miaba misunguluke idi muntu mua kudisunguila bua kufila mapa bua mudimu wetu udi wenzeka pa buloba bujima, makuta adi tshisumbu tshitula, anyi bua bionso bibidi.

Bantemu ba Yehowa kabatu balombibue bua kufila tshia dikumi anyi makuta bungi kampanda bukosa anyi tshikese tshia ku adibu bapeta to. (2 Kolinto 9:7) Katutu tusanga makuta mu bisangilu bietu anyi tufutshishanganamu makuta, anyi kabidi bua kubatiza muntu, kujiika muntu mufue, kubanjija dibaka, peshi bua malu makuabu a ntendelelu to. Katutu tupetela makuta mu dipana mampa, mu dikangula bisalu, dienza manaya a makuta, dienza ngendu ya mindololotshi, bibilu kampanda, anyi malu makuabu a buena aa to, ne katutu tulomba bantu bua kufila mapa to. Bualu bukuabu, katutu tuambila bantu mêna a bantu batu bafila mapa to. (Matayi 6:2-4) Mu site wetu wa Enternete ne mu mikanda yetu kamutu madisuisha a bintu adi atupetesha makuta to.

Bisumbu bia Bantemu ba Yehowa bionso bitu bifila luapolo lua ku ngondo lua makuta adibu batule mu bisangilu biabu. Batu bakonkonona tshibutshilu tshia tshisumbu pa tshibidilu bua kujadika ne: badi batula makuta bimpe.​—2 Kolinto 8:20, 21.

Mishindu ya kufila mapa

• Tushete tua mapa: Udi mua kuela makuta anyi sheke ya makuta mu tushete tua mu Nzubu ya Bukalenge, mu Nzubu ya Mpuilu, ne miaba mikuabu itudi tuenzela bisangilu bietu.

• Mapa mafidila ku Enternete: Mu matunga a bungi, udi mua kubuela mu tshitupa tshia “Kufila dipa bua Bantemu ba Yehowa” bua kufila mapa ku diambuluisha dia karte ka kusumba naku bintu mu dibanza, karte ka kuangata naku makuta ku banke, kutuma makuta ku banke, ne mishindu mikuabu ya kufila mapa ku biamu.b Bantemu bakuaba batu basungula bua ‘kuteka tshintu ku luseke’ ngondo yonso, bapangadija bua kuikala kufila mapa pa tshibidilu ku diambuluisha dia umue wa ku mishindu eyi.—1 Kolinto 16:2.

  

• Kulongolola mapa a kufila: Imue mishindu ya kufila mapa itu ilomba kulongolola malu kumpala kua dîba, anyi kudianjila kuenzeja mikanda kua mbulamatadi. Kuenza nanku kudi mua kuambuluisha bua bakukepeshile bungi bua makuta a bitadi bidibu bateke mu ditunga dienu. Mbiambuluishe bantu ba bungi bua kumanya bimpe menemene malu adi atangila difila makuta anyi bintu biabu patshidibu ne muoyo anyi biapeshabu muntu udibu basungule padibu bafua. Tudi tukulomba bua ufundile Biro bidi bitangila mudimu wa Bantemu ba Yehowa bia muaba uudi bua kumanya malu makuabu wewe musue kufila mapa bilondeshile mishindu idi ilonda eyi:

  • konte ya ku banke

  • makuta a tshieya

  • mpangu ne nzubu

  • bukenji bua kupeta bintu ne makuta malamisha

  • testama ne bintu bilamisha

Bua kumanya malu makuabu a mishindu ya mua kufila mapa muaba uudi musombele, tangila dibeji dia “Kufila dipa bua Bantemu ba Yehowa.”