Ntshinyi tshidi Bible wamba bua diselangana ne muntu wa dikoba dikuabu?

Diandamuna dia mu Bible

Nzambi udi wanyisha bua mulume ne mukaji badi ne makoba mashilangane baselangane bualu makoba onso adi mumue ku mêsu kuende. Bible udi wamba ne: “Nzambi udi wenzela muntu yonso malu mu mushindu wa muomumue . . . , nansha yeye wa mu dikoba kayi.”​—Bienzedi 10:34, 35, Bible wa Good News.

Mona mêyi makuabu a mu Bible adi akula bua dibaka ne mudi makoba onso mikale mumue.

Makoba onso mmafumine kudi muntu umue

Bantu bonso mbafumine mu Adama muntu wa kumpala ne mukajende Eva udi Bible ubikila ne: “mamuende wa bantu bonso badi ne muoyo.” (Genese 3:20) Ke bualu kayi Bible udi wakula bua Nzambi ne: “Wakenza bisamba bionso bia bantu bifumine mu muntu umue.” (Bienzedi 17:26) Bantu bonso mba mu dîku dimue nansha bobu ba dikoba kayi. Kadi bantu ba muaba uudi musombele bobu batamba kusungulujangana bua makoba anyi bua malu a mpetu, ntshinyi tshiudi mua kuenza?

Bantu badi ne meji batu ‘bumvuangana’

Bantu bonso kabena bitaba diselangana ne muntu wa dikoba dikuabu nansha mudidi dianyishibue kudi Nzambi. (Yeshaya 55:8, 9) Wewe ujinga kubuela mu dibaka ne muntu wa dikoba dikuabu, mbimpe nuandamune nende nkonko idi ilonda eyi:

• Bantu ba muaba uudi anyi bena mu dîku dienu bobu bakula bibi, ntshinyi tshiudi mua kuenza?

• Mmushindu kayi unudi mua kuambuluisha bana benu balela bua kutantamena kansungansunga?

“Kumvuanganga” ke kudi mua kuanuambuluisha bua dibaka dienu diende bimpe.​—Nsumuinu 13:10; 21:5.