Lomo 15:13​—“Nzambi udi ufila ditekemena anuwuje tente ne disanka dionso ne ditalala dionso”

“Nzambi udi ufila ditekemena anuwuje tente ne disanka dionso ne ditalala dionso bualu nudi numueyemena, bua ditekemena dienu divule ku bukole bua nyuma muimpe.”​—Lomo 15:13, Nkudimuinu wa bulongolodi bupiabupia.

‘Nzambi wa ditekemena anuwuje tente ne disanka ne ditalala dia mu ditabuja dienu, bua nuenu nukumbane mu ditekemena mu bukole bua nyuma muimpe.’​—Lomo 15:13, Mukanda wa Nzambi.

Diumvuija dia Lomo 15:13

Ne mêyi au mupostolo Paulo wakaleja dijinga diende dia ne: Nzambi uwuje bena Kristo nende ne ‘disanka ne ditalala.’ Ngikadilu mimpe eyi mmisuikakaja ku ditekemena didi Nzambi ufila anyi ku bukole bua nyuma muimpe.

Mukanda wa Nzambi udi utulongesha malu a bungi pa bidi bitangila ditekemena didi Nzambi ufila. Tudi tubala mu Lomo 15:4 ne: “Malu onso avuabu bafunde kale [mu Bible] bavua baafunde bua kutulongesha, bua tupete ditekemena ku diambuluisha dia dinanukila dietu ne dia busambi bua mu Mifundu.” Mu Bible, Nzambi mmulaye bua kujikija malu adi apangisha bantu ba bungi bua kuikala ne ditekemena lelu bu mudi bupele, kansungansunga, masama, ne lufu. (Buakabuluibua 21:4) Milayi ya Nzambi neyikumbane ku butuangaji bua Yezu Kristo. Nunku tudi mua kutekemena matuku atshilualua mimpe.​—Lomo 15:12.

Ditekemena didi Nzambi ufila didi mua ‘kuvula,’ anyi ‘kuyila ne panshi’ anu tuetu bamueyemene. Patudi tutungunuka ne kulonga malu adi amutangila, tudi tutuishibua ne: mmukumbane tshishiki bua tuetu kumueyemena. (Yeshaya 46:10; Tito 1:2) Ditekemena dilelela didi Nzambi ufila didi dituwuja tente ne disanka ne ditalala nansha tuetu tutuilangana ne ntatu.​—Lomo 12:12.

Ditalala, disanka, ne ditekemena mbisuikakaja kabidi ku “nyuma muimpe” udi bukole buenzeji bua Nzambi.a Nzambi utu ukuata mudimu ne nyuma wende muimpe bua kukumbaja milayi yende; muanda au udi utupesha ditekemena. Nyuma au udi utuambuluisha kabidi bua kuikala ne ngikadilu mimpe bu mudi disanka ne ditalala.​—Galatiya 5:22.

Malu adi Lomo 15:13 wakuila

Mukanda wa Lomo uvua mufundila bena Kristo ba mu Lomo. Bamue bavua bena Yuda, bakuabu kabavua bena Yuda to. Paulo wakabakankamija buonso buabu bua badienzeje bikole bua kuikala mu buobumue mu meji ne mu bienzedi nansha muvuabu bafume miaba mishilangane ne bikale ne bilele bishilangane.​—Lomo 15:6.

Paulo wakavuluija bena Kristo ba mu Lomo ne: Nzambi ukavua mulaye kuonso aku tshikondo tshivua bantu ba bisamba bionso ne bua kumutumbisha mu buobumue. Paulo wakatela Mifundu ya mu tshiena Ebelub misangu inayi bua kujadika muanda au. (Lomo 15:9-12) Ntshinyi tshivuaye musue kuleja? Pa kumbusha bena Yuda, mudimu wa diyisha wa Kristo uvua mua kuambuluisha bantu ba bisamba bionso. Nzambi wakapesha bantu bonso abu ditekemena dia muomumue. Bena mu tshisumbu tshia ku Lomo bonso bavua ne bua ‘kuakidilangana bimpe’ nansha bobu bafume muaba kayi.​—Lomo 15:7.