2 Timote 1:7​—“Nzambi ki mmutupeshe nyuma wa buôwa to”

“Bualu Nzambi kavua mutupeshe nyuma wa buôwa to, kadi wa bukole, wa dinanga, ne wa meji majalame.”​—2 Timote 1:7, Nkudimuinu wa bulongolodi bupiabupia.

“Bualu Nzambi ki mmutupeshe nyuma wa buôwa to, kadi wa bukole, wa dinanga ne wa meji mimpe.”​—2 Timote 1:7, Bible [Matayi-Buakabuluibua].

Diumvuija dia 2 Timote 1:7

Nzambi udi mua kuambuluisha muntu bua kuenza malu mimpe ne dikima dionso. Ki mmusue bua tuikale ne “buôwa,” budi mua kupangisha muntu bua kuenza malu adi asankisha Nzambi to.

Tumonayi ngikadilu isatu idi Nzambi utupesha idibu batele mu mvese au idi ituambuluisha bua kumbusha buôwa.

“Bukole.” Katshia kuonso eku, bena Kristo mbafike ku dienzela Nzambi mudimu ne dikima nansha padibu kumpala kua baluishi ba bungi badi babafunyina anyi padibu mu nsombelu ya njiwu. Kabatu balukila tshianyima bua buôwa to. (2 Kolinto 11:23-27) Badi bafika ku dienza nanku mushindu kayi? Mupostolo Paulo wakumvuija ne: “Bua malu onso ndi ne bukole ku diambuluisha dia yeye udi umpesha bukole.” (Filipoyi 4:13) Nzambi udi mua kupesha batendeledi bende “bukole budi bupite bua pa tshibidilu” bua batantamene lutatu kayi luonso.​—2 Kolinto 4:7.

“Dinanga.” Dinanga dikole didi muena Kristo munange Nzambi didi dimuambuluisha bua kuakuila malu makane ne dikima. Kabidi, dinanga didi muena Kristo munange bakuabu didi dimusaka bua kuteka majinga abu kumpala kua ende, nansha padiye kumpala kua buluishi anyi padiye mu njiwu.​—Yone 13:34; 15:13.

“Meji majalame.” Mu Bible, meji majalame atu atamba kuleja bukokeshi budi nabu muena Kristo bua kuangata mapangadika a meji adi apetangana ne Dîyi dia Nzambi. Muntu udi ne meji majalame udi ne ngelelu wa meji muimpe ne kena ne malu makole nansha padiye utuilangana ne ntatu to. Udi wangata mapangadika adi aleja mudiye ne meji a Nzambi, bualu mmumanye ne: malanda ende ne Nzambi adi ne mushinga wa bungi kupita mmuenenu wa bakuabu.

Malu adi 2 Timote 1:7 wakuila

Mukanda wa 2 Timote bakawufunda kudi mupostolo Paulo bu mukanda mufundila Timote mulunda wende munanga ne muenzejanganyi nende wa mudimu. Mu mukanda au, Paulo wakakankamija nsonga Timote ne muoyo mujima bua atungunuke ne kudifila bikole mu mudimu wa diyisha. (2 Timote 1:1, 2) Bidi bimueneka ne: Timote uvua muena bundu anyi muena lumamamama, pamuapa ke tshivua tshimupangishe bua kuenza midimu yende mu tshisumbu tshia bena Kristo. (1 Timote 4:12) Kadi Paulo wakavuluija Timote ne: uvua mupete tshipedi, mmumue ne: mudimu wa pa buawu mu tshisumbu. Wakamukankamija bua kikadi ne buôwa pavuaye wenza malu ne bukokeshi buende bu mutangidi mu tshisumbu, pavuaye uyisha lumu luimpe, anyi pavuaye ukenga bua ditabuja diende to.​—2 Timote 1:6-8.

Nansha muvua mêyi au atangila bangabanga Timote, adi ajadikila bonso badi basue kuenzela Nzambi mudimu lelu ne: Nzambi neabapeshe bionso bidibu nabi dijinga bua kumuenzela mudimu nansha bobu batuilangane ne ntatu.