Luka 2:14​—‘Ditalala dikale panshi pa buloba kudi bantu badi basankisha Nzambi’

“Butumbi buikale kudi Nzambi muulu mutumbuke ne ditalala dikale pa buloba munkatshi mua bantu badiye muanyishe.”​—Luka 2:14, Nkudimuinu wa bulongolodi bupiabupia.

‘Butumbi buikale kudi Nzambi mu diulu, ditalala dikale panshi pa buloba munkatshi mua bantu badi basankisha Nzambi.’​—Luka 2:14, Mukanda wa Nzambi.

Diumvuija dia Luka 2:14

Mêyi a kutumbisha nawu Nzambi avua banjelu bambe tshikondo tshivuabu balele Yezu au, adi aleja ne: Nzambi udi wanyisha bantu badi bitabuja Yezu ne nebapete ditalala.

“Butumbi buikale kudi Nzambi muulu mutumbuke.” Banjelu bavua bamba mêyi aa bua kushindika mudi Nzambi mukumbane bua kuangata butumbi buonso. Mêyi au adi aleja kabidi ne: diledibua dia Yezu ne mudimu wende wa diyisha bivua ne bua kutumbishisha Yehowaa Nzambi bikole. Tshilejilu, pavuaye uyisha, kavua uditumbisha bua malu avuaye ulongesha bantu to, kadi uvua upesha Tatu wende butumbi. Wakamba ne: “Malu andi ndongesha ki nganyi to, kadi nga udi muntume.” (Yone 7:16-18) Pavua Yezu wenza bishima, bantu bavua muaba au bavua misangu ya bungi ‘batuadija kutumbisha Nzambi.’ (Luka 5:18, 24-26; Yone 5:19) Nansha lufu lua Yezu luakatumbishisha Nzambi. Ludi luambuluisha kabidi bua Nzambi kukumbaja dijinga diende dinene dia kuwuja buloba tente ne bantu bakane badi banange ditalala.​—Genese 1:28.

“Ditalala dikale pa buloba.” Ditalala adi ki nditu bantu bumvua anu padi mvita ijika to. Kadi didi diumvuija kabidi ditalala dia mu muoyo didi muntu umvua padi Yehowa umuanyisha. Ku butuangaji bua Yezu, bantu badi mua kuikala mu ditalala ne Nzambi. (Yakobo 4:8) Bu mudi Yezu Mukalenge wa Bukalenge bua Nzambi, neapeteshe bantu ditalala dia kashidi pa buloba bujima.​—Misambu 37:11; Luka 1:32, 33.

“Bantu badiye muanyishe.” Tshiambilu etshi tshidi tshitangila bantu badi Nzambi muanyishe bua mudibu bamuitabuje ne muoyo ne mujima ne bitabuje kabidi Yezu uvuaye mutume. Katshiena tshileja dianyisha didi Nzambi uleja bantu bonso nansha bobu ne bikadilu kayi anyi bienzedi kayi, peshi muoyo muimpe udi bantu balejangana mu bobu to. Nkudimuinu mikuabu ya Bible, bu mudi wa Mukanda wa Mvidi Mukulu (Mishonyi), udi wakula bua “bantu badiye munange.” Kadi bilondeshile mikanda mifunda ku bianza ya kale ya kueyemena, badi bakula bua ditalala didi munkatshi mua bantu badi Nzambi wanyisha. Ke lungenyi ludi mu Nkudimuinu wa bulongolodi bupiabupia ne mu nkudimuinu mikuabu ya bungi ya matuku etu aa.​—Tangila “Luka 2:14 mu nkudimuinu mikuabu.”

Malu adi Luka 2:14 wakuila

Luka nshapita 2 udi wakula bua bidimu bia kumpala bia nsombelu wa Yezu pa buloba. Matuku makese yeye mumane kuledibua, muanjelu wakamuenekela balami ba mikoko bavua “basombe pambelu mu mpata balama mikoko yabu butuku.”b (Luka 2:4-8) Muanjelu wakabamanyisha “lumu luimpe lua disanka dinene” lua ne: “Mbanulelele lelu Musungidi mu tshimenga tshia Davidi, yeye udi Kristo Mukalenge.” (Luka 2:9-11) Muanjelu wakambila balami ba mikoko muaba uvuabu mua kupeta muana wa katoto au, pashishe kumonabu banjelu ba bungi batumbisha Nzambi. Pakafika balami ba mikoko abu ku Beteleheme, bakasangana Mariya ne Jozefe ne Yezu utshivua muana wa katoto. (Luka 2:12-16) Balami ba mikoko bamane kubalondela bualu bua dikema abu, bakapingana bua kulama mikoko yabu, “benda batumbisha Nzambi bua malu onso avuabu bumvue ne bamone.”​—Luka 2:17-20.

Luka 2:14 mu nkudimuinu mikuabu

“Butumbi budi kudi Mvidi Mukulu mu diulu ditamba bule ne ditalala diende wakudipa bantu badiye unanga pa buloba.”​—Luka 2:14, Mukenji Mulenga Lelu.

“Butumbi buikale kudi Nzambi mu diulu, Ditalala dikale hanshi ha buloba munkatshi mua bantu badi basankisha Nzambi.”​—Luka 2:14, Mukanda wa Nzambi.

“Butumbi buonsu budi kudi Mvidi Mukulu mulu mu diulu, bupole buende budi pa buloba, kudi bantu badiye munange!”​—Luka 2:14, Mukanda wa Mvidi Mukulu (Mishonyi).

Tangila kafilme aka bua kumona kadiosha ka mukanda wa Luka.