Efeso 3:20​—“[Nzambi] udi mua kuenza bivule bipitshidile kule ne kule malu onso atudi tulomba anyi tuelela meji”

“Mpindieu kudi yeye udi mua kuenza bivule bipitshidile kule ne kule malu onso atudi tulomba anyi tuelela meji, bilondeshile bukole buende budi buenza mudimu munda muetu, butumbi buikale kudiye.”​—Efeso 3:20, 21, Nkudimuinu wa bulongolodi bupiabupia.

“Kudi Nzambi, udi ne bukole bua kuenza malu matambe atudi katui bamanye mua kumulomba ne mua kuelangana meshi, bu mudi bukole budi butusonsola munda muetu, butumbi buikale kudiye.”​—Efeso 3:20, 21, Mukanda wa Nzambi.

Diumvuija dia Efeso 3:20

Mupostolo Paulo udi uleja dishindika diende dia ne: Nzambi udi ne bukole bua kuandamuna masambila a batendeledi bende ne bua kubakumbajila malu adibu batekemene mu mishindu idibu kabayi mua kuelela meji to. Udi nansha mua kuandamuna masambila abu mu mishindu mimpe mitambe idibu kabayi mua kutekemena to.

“Mpindieu kudi yeye udi mua kuenza bivule . . . bilondeshile bukole buende budi buenza mudimu munda muetu.” Mvese wa 21 udi uleja ne: “yeye” au nYehowa Nzambi.a Paulo wakafundamu ne: “Butumbi buikale kudiye ku butuangaji bua tshisumbu ne ku butuangaji bua Kristo Yezu.” (Yone 20:31) Bualu bukuabu, Nzambi udi mua kutupesha bukole, mmumue ne: bukole butudi nabu dijinga bua kuenza disua diende.​—Filipoyi 4:13.

Mu mvese wa 20, mupostolo Paulo wakalejamu bualu bua pa buabu budi butangila bukole budi nabu Yehowa bua kuambuluisha batendeledi bende. Mukanda mukuabu mmuambe bua tshiambilu tshidibu bakudimune ne: “yeye udi mua” ne: “Mvese au kena wamba patupu ne: Nzambi udi ne bukole bua kuenza bualu kampanda anyi ne: bidi mua kuenzeka bua enze to; kadi udi umvuija ne: udi ne bukole bua kubuenza.” Muntu wetu eu yeye mudie netu bulunda utu ujinga kutuambuluisha, kadi kena anu ne bukole bua kuenza nanku misangu yonso to. Yehowa yeye udi misangu yonso ne bukole bua kuenza tshionso tshidi tshikengela bua kutabalela batendeledi bende ne kuandamuna masambila abu. Yeye nkayende ke udi ne bukole ne bukokeshi bidi kabiyi ne mikalu to.​—Yeshaya 40:26.

“[Nzambi] udi mua kuenza bivule bipitshidile kule ne kule malu onso atudi tulomba anyi tuelela meji.” Yehowa udi mua kupesha batendeledi bende bintu bia bungi menemene anyi mene “bivule bipitshidile kule ne kule” bidibu balomba. Udi mua kubambuluisha mu mishindu mipite kule ne kule idibu mua kumona ne: mmikumbane, anyi ne: mmubapeshe bintu ne tshianza tshilekelela.

Mêyi a ne: “kule ne kule malu onso atudi tulomba anyi tuelela meji” adi atulongesha bualu bukuabu budi mu mvese eu. Pakamba mupostolo Paulo ne: “kule ne kule malu onso atudi tulomba anyi tuelela meji” uvua musue bua bena Kristo bonso bumvue ne: Nzambi udi mua kubambuluisha mu mishindu ivuabu kabayi batekemene to. Mu Bible mukuabu, mbakudimune tshitupa tshia kumpala tshia mvese wa 20 ne: “Kudi yeye udi ne bukokeshi bua kuenza malu matambe pa atudi tumulomba anyi tuela meji.” (Mukenji Mulenga Lelu) Kudi misangu idi bena Kristo mua kumona ne: ntatu yabu mmipite bunene anyi nne: mmikole bua kuyijikija. Pamuapa ki mbamanye nansha malu akulomba Nzambi mu disambila to. Kadi Yehowa mmumanye nsombelu wabu ne udi ne bukole bua kubambuluisha. Mu tshikondo tshiakanyine, udi mua kujikija lutatu luonso, mmumue ne: kulujikija mu mushindu uvuabu pamuapa kabayi belele meji to. (Yobo 42:2; Yelemiya 32:17) Bua mpindieu, udi ubapesha bukole bua kunanukila ne disanka.​—Yakobo 1:2, 3.

Malu adi Efeso 3:20 wakuila

Mukanda wa Efeso mmukanda uvua mupostolo Paulo mufundile bena Kristo bavua basombele mu tshimenga tshia Efeso mu Asia Mukese, tshitupa tshia ditunga dia Turquie lelu. Mu mukanda au, Paulo wakafundamu ngenyi idi mu disambila divuaye mubasambidile. (Efeso 3:14-21) Wakalomba bua badienzeje bua kuidikija mushindu muimpe uvua Yezu wela meji ne wenza malu, nunku bafike ku dimanya dinanga dia Kristo. Bualu abu budi butangila bena Kristo bonso. Paulo wakajikija disambila diende pa kutumbisha Nzambi ne kuamba mêyi adi mu Efeso 3:20, 21.

Tangila filme muîpi eu bua kumona kadiosha ka mukanda wa Efeso.