Mâko 11:24​—“Bintu bionso binudi nulomba mu disambila, ikalayi ne ditabuja ne: nukadi babipete”

“Ke bualu kayi ndi nnuambila ne: bintu bionso binudi nulomba mu disambila, ikalayi ne ditabuja ne: nukadi babipete, ne nenubipete.”​—Mâko 11:24, Nkudimuinu wa bulongolodi bupiabupia.

“Ke pandi nnuambila ne: tshionso tshinudi nulomba mu disambila, nuitabe ne: nukadi batshipete, nanku nebanupetshio.”​—Mâko 11:24, Mukanda wa Mvidi Mukulu (Katolike).

Diumvuija dia Mâko 11:24

Pavua Yezu muambe mêyi aa, uvua usua kuleja bayidi bende mudibi ne mushinga bua bobu kubenga kulengulula bukole budi nabu disambila. Uvua ubajadikila ne: Nzambi udi uteleja masambila abu ne udi uandamuna. Muntu udi wenza masambila ne muoyo mujima, uenza mu diumvuangana ne disua dia Nzambi ikala mutuishibue ne: malu adiye ulomba neakumbane anu kukumbana. Mbienze anu bu ne: bakadi bandamune disambila diende.

Yezu mmutambe kuleja mudibi ne mushinga bua kusambila bikale ne ditabuja. Mmumvuije ne: muntu udi usambila kena ne bua ‘kuelakana mu muoyo wende’ to, kadi udi ne bua kuikala ne “ditabuja ne: tshidiye wamba netshienzeke.” (Mâko 11:23) Bua tshinyi? Mbualu bantu badi belakana kabena mua ‘kutekemena ne: nebapete tshintu kudi Yehowa to.’a​—Yakobo 1:5-8.

Muntu udi ne ditabuja utu usambila misangu ya bungi. (Luka 11:9, 10; Lomo 12:12) Padiye wenza nanku udi uleja ne: udi menemene dijinga ne tshintu tshidiye mulombe atshi, kabidi ne: udi witaba bushuwa ne: Nzambi neandamune disambila diende. Mu bulelela, mmumanye kabidi ne: Nzambi udi mua kumuandamuna mu mushindu mushilangane ne uvuaye yeye mutekemene; pamuapa udi mua kuandamuna nanku dîba dishilangane ne divuaye muteke mu mutu.​—Efeso 3:20; Ebelu 11:6.

Kadi mêyi a Yezu aa kaena umvuija ne: muntu yonso udi mua kutekemena bua kupeta tshionso tshidiye ulomba Nzambi mu disambila to. Yezu uvua uyukila ne bayidi bende, balume ba ditabuja bavua badienzeja ne muabu muonso bua kutendelela Yehowa mu mushindu udiye wanyisha. Bible udi wamba ne: Yehowa udi uteleja anu masambila adi umvuangana ne disua diende. (1 Yone 5:14) Katu uteleja masambila a bantu badi babenga kutumikila mikenji yende ku bukole, ne kabayi banyingalala bua malu mabi adibu benza to. (Yeshaya 1:15; Mika 3:4; Yone 9:31) Bua kumanya malu makuabu adi atangila masambila atu Nzambi uteleja, tangila filme muîpi eu.

Malu adi Mâko 11:24 wakuila

Matuku a ndekelu avua Yezu uyisha pa buloba, wakaleja bayidi bende muvuabi ne mushinga bua kuikala ne ditabuja dikole kudi Nzambi. Wakabapesha tshilejilu bua kubaleja mushinga au. Pavuaye mu njila mutangile ku Yelushalema, wakamona mutshi wa mfigi uvua muele mabeji mapiamapia. Kadi mutshi au uvua umueneka kawuyi wela bimuma to, nunku Yezu wakawela mulawu. (Mâko 11:12-14) Tshimuenekelu tshia dishima tshivua natshi mutshi au tshivua tshileja muvua tshisamba tshia Isalele wa kale tshimueneka ne: tshivua tshitendelela Nzambi, kadi mu bulelela katshiyi ne ditabuja to. (Matayi 21:43) Katupa kakese pashishe, mutshi wa mfigi wakafubidila, bileja tshivua ne bua kufikila bena Isalele bavua kabayi ne ditabuja abu mu matuku makese.​—Mâko 11:19-21.

Kadi Yezu uvua mutuishibue ne: bayidi bende bavua mua kupeta ditabuja divua dikengela bua kutshimuna ntatu ne kuenza malu a dikema. (Mâko 11:22, 23) Mubelu uvua Yezu mupeshe bayidi bende bua disambila uvua mufike anu pa dîba menemene bualu ditabuja diabu divua ne bua kutetshibua mu matuku makese. Bavua ne bua kutantamena lutatu lua lufu lua Yezu ne buluishi bukole buvuabu bapeta mu mudimu wabu wa kuyisha. (Luka 24:17-20; Bienzedi 5:17, 18, 40) Lelu, bayidi ba Yezu badi pabu mua kutshimuna ntatu mikole padibu baleja ditabuja kudi Nzambi ne bitaba bukole budi nabu disambila.​—Yakobo 2:26.

Tangila filme muîpi eu bua kumona kadiosha ka mukanda wa Mâko.