Dilongesha 3

Mbimpe wewe kumanya Nzambi

Bua kuikala mulunda wa Nzambi, udi ne bua kumumanya. Balunda bebe batu bamanye dîna diebe ne batu bakubikiladi, ki mmuomu’anyi? Nzambi mmusue bua umanye dîna diende ne wikale uditela. Dîna dia Nzambi ndiodiedi: Yehowa. (Musambu 83:18; Matayo 6:9) Mbimpe kabidi wewe kumanya tshidiye musue ne tshidiye mubenge. Wewe mumanye balunda ne baluishi ba Nzambi, mbimpe. Bua kufika ku dimanya muntu bitu biangata dîba dia bungi. Bible udi wamba ne: mbimpe tuetu kuikala ne dîba dia kulonga malu a Yehowa.—Efeso 5:15, 16.

Balunda ba Nzambi badi benza malu adi amusankisha. Elabi meji bua balunda bebe. Wewe ubenzela malu mabi ne wenza bidibu kabayi basue, nebatungunuke ne kuikala balunda bebe anyi? Tòo! Bia muomumue, biwasua kuikala mulunda wa Nzambi, udi ne bua kuenza malu adi amusankisha.—Yone 4:24.

Bitendelelu bionso kabiena bifikisha ku didia bulunda ne Nzambi to. Yezu (mulunda wa Nzambi wa pa muoyo) wakakula bua njila ibidi. Njila umue mmunene ne mmûle tente ne bantu. Paudi ulonda njila eu, udi uya kufua. Njila mukuabu mmukese ne udi ne bantu bakese. Wewe mulonde njila eu, udi upeta muoyo wa tshiendelele. Mmumue ne: biwasua kudia bulunda ne Nzambi, udi ne bua kumanya mushindu muimpe wa kumutendelela.—Matayo 7:13, 14.