Bulongolodi bupiabupia budi Nzambi mulaye

BIBLE (Dîyi didi Nzambi mufundishe) udi utupesha ditekemena padiye wamba ne: ‘Bu mudi mulayi wende tudi tutekemena diulu dipiadipia ne buloba bupiabupia mudi buakane buikalemu.’—2 Petelo 3:13.

‘Diulu dipiadipia’ ntshinyi? Bible utu usuikakaja diulu ne bukokeshi. (Bienzedi 7:49) ‘Diulu dipiadipia’ mmbulamatadi mupiamupia wikala ne bua kukokesha buloba bujima. Mmupiamupia bualu neapingane pa muaba wa ndongoluelu udiku lelu wa mamfumu; udi kabidi bualu bupiabupia mu dikumbana dia malu adi Nzambi mulaye. Ke Bukalenge buvua Yezu mutulongeshe bua kulomba mu disambila. (Matayo 6:10) Bu mudi Nzambi ke uvua mubuenze, ne kabidi bu mudiye usombela mu diulu, badi babubikila ne: ‘Bukalenge bua mu diulu.’—Matayo 7:21.

‘Buloba bupiabupia’ ntshinyi? Ki ndibulunge dikuabu dia buloba to, bualu Bible udi wamba patoke ne: bantu nebasombe bua kashidi pa buloba buetu ebu. ‘Buloba bupiabupia’ nnsangilu mupiamupia wa bantu. Nebuikale bupiabupia bualu nebikale bamane kubutula bantu babi. (Nsumuinu 2:21, 22) Bonso bikala ne muoyo tshikondo atshi nebatumbishe Nzambi, nebamunemeke ne nebasombe mu diumvuangana ne malu adi Nzambi ulomba. (Musambu 22:27) Mpindieu, badi babikila bantu ba mu matunga onso bua buobu kulonga malu aa ne bua kushintululabu nsombelu wabu ikale mu diumvuangana ne malu makane aa. Ke tshiudi wenza pebe anyi?

Mu buloba bupiabupia, muntu yonso neanemeke bukokeshi bua Nzambi. Dinanga dia Nzambi didiku dikusaka bua kutumikila mikenji yende anyi? (1 Yone 5:3) Ditumikila mikenji ya Nzambi didiku dimueneka mu nzubu webe anyi? ku mudimu peshi mu kalasa anyi? mu nsombelu webe anyi?

Mu buloba bupiabupia abu, bantu nebikale batendelela Nzambi mulelela mu buobumue. Utu utendelela Mufuki wa diulu ne buloba anyi? Ntendelelu webe udi bulelela ukusanga ne batendeledi nebe ba mu matunga onso, makoba onso ne miakulu yonso anyi?—Musambu 86:9, 10; Yeshaya 2:2-4; Sefanya 3:9.

[Kazubu mu dibeji dia 17]

Nzambi udi mulaye malu aa

Nzambi udi mulaye malu aa m’Mufuki wa diulu didi dimueneka dia mitoto ne buloba ebu. Yeye ke uvua Yezu Kristo mubikile ne: ‘Nzambi umuepele mulelela.’—Yone 17:3.

Bantu ba bungi batu batendelela nzambi idibu buobu nkayabu benze. Bantu miliyo ne miliyo badi bakukuila bimfuanyi anyi mpingu. Bakuabu badi batumbisha bisumbu bienza kudi bantu, nkindi idi mishindamene pa bintu bidi bimueneka peshi batendelela majinga abu nkayabu. Nansha bantu badi bamba mudibu batendelela Nzambi bilondeshile Bible kabena banemeka dîna dia eu udiye ubikila ne: ‘Nzambi mulelela’ to.—Dutelonome 4:35.

Mufuki udi udiamba nkayende ne: ‘Meme ndi Yehowa, adi ndîna dianyi.’ (Yeshaya 42:5, 8) Dîna edi didi mu Bible misangu mipite pa 7 000 mu miakulu ivuabu bamufunde. Yezu Kristo wakalongesha bayidi bende bua kusambila ne: ‘Tatu wetu udi mu diulu, banemeke dîna diebe.’—Matayo 6:9.

Nzambi mulelela mmuntu wa mushindu kayi? Udi wamba nkayende mudiye ‘wa dinanga ne luse, kayi ufika munda lukasa, udi muule tente ne bulenga ne bulelela’ ne mudiye kayi ulekela kunyoka muenji wa bibi udi ubenga kutumikila mikenji yende ku bukole. (Ekesode 34:6, 7, MMM) Malu adiye muenzele bantu mu kupita kua bidimu adi ajadika ne: ke tshidiye menemene.

Dîna ne muenadi, bionso mbia kunemeka ne kuangata bu bia tshijila. Bu mudiye Mufuki ne Mfumu mutambe bunene, amu yeye ke utudi ne bua kutumikila ne kutendelela ne muoyo wetu wonso. Utuku umutumikila ne umutendelela anyi?

[Kazubu/Tshimfuanyi mu dibeji dia 18]

‘Diulu dipiadipia ne buloba bupiabupia’ nebilue ne malu kayi?

Buloba bukudimuna Mparadizu Luka 23:43

Mudimu mulenga, biakudia bia bungi Yeshaya 25:6; 65:17, 21-23

[Kazubu/Bimfuanyi mu dibeji dia 19]

Neupete pebe masanka aa anyi?

Nzambi kêna mua kushima nansha!—Tito 1:2.

Yehowa udi wamba ne: ‘Dîyi [dianyi] kadiena dipingana kundi patupu, kadiyi dianji kuenza muanda undi musue dienze, kadiyi dianji kushikija muanda ungakaditumina.’—Yeshaya 55:11.

Yehowa ukadi mutuadije kufuka ‘diulu dipiadipia ne buloba bupiabupia.’ Mbulamatadi wa mu diulu ukadi wenza mudimu. Tshishimikidi tshia ‘buloba bupiabupia’ tshikadi tshimana kuenza.

Kunyima kua mumane kuleja amue malu malenga ikala ‘diulu dipiadipia ne buloba bupiabupia’ ne bua kutuadila bantu, mukanda wa Buakabuluibua udi wambulula mêyi a Nzambi nkayende, Mfumu mutambe bunene, wamba ne: ‘Mona, ndi mvuija bintu bionso bipiabipia.’ Udi wamba kabidi ne: ‘Funda; bualu bua mêyi aa adi mêyi a kueyemena ne malelela.’—Buakabuluibua 21:1, 5.

Lukonko ludi ne mushinga ndua ne: Tudiku tuenza mashintuluka adi akengedibua bua batubale petu bu bakumbanyine kuikala mu ‘buloba bupiabupia’ buikala ku bukokeshi bua ‘diulu dipiadipia’ anyi?