Yobo wakalama muoyo wende mutoke

MUNTU udi mua kushala anu mulamate Nzambi nansha bobu bamukengeshe bikole anyi? Udi mua kumutumukila nansha biobi bimueneka bu ne: kena ne bintu bia ku mubidi anyi? Malu akafikila Yobo adi atupetesha diandamuna dia nkonko eyi bualu yakamutangila pende.

Patshivua bena Isalele mu Ejipitu, Yobo mulela wa Abalahama uvua musombele mu ditunga didibu babikila lelu eu ne: Arabie. Tshikondo atshi banjelu bavua badisangishe kumpala kua Yehowa mu diulu, Satana pende uvua munkatshi muabu. Kumpala kua tshisangilu atshi, Yehowa wakaleja muvuaye wanyisha lulamatu lua muena mudimu wende Yobo. Nunku wakamba ne: kakuvua muntu mukuabu uvua ne muoyo mutoke bu wa Yobo to. Kadi Satana ntomboji au wakamba ne: Yobo uvua wenzela Nzambi mudimu anu bualu uvua mumubeneshe ne uvua umukuba. Satana uvua bu uvua wamba ne: bobu bangate bintu bionso bivua nabi Yobo, neadiule Nzambi.

Nzambi wakalekela Satana bua kuanji kunyenga Yobo bubanji buende, kushipa bana bende, ne kumutua disama. Bu muvua Yobo kayi mumanye malu onso avua Satana wenza au, kavua mua kujingulula bua tshinyi Nzambi uvua mulekele ntatu ayi to. Nansha nanku, kakela Nzambi nyima to.

Balunda babi basatu bakalua kutangila Yobo. Tshitupa tshinene tshia mukanda wa Yobo tshidi tshiakula bua ngenyi mibi ivuabu bajinga kumukuna mu mutu ya ne: Nzambi uvua umunyoka bua mpekatu ivuaye muenze mu musokoko. Balumiana abu bavua bambe ne: bena mudimu ba Nzambi kabatu bamusankisha to, Nzambi muine katu ubeyemena nansha. Yobo wakabenga ngelelu wabu wa meji mubi au. Wakabashindikila ne: uvua ne bua kulama muoyo wende mutoke too ne ku lufu!

Kadi Yobo wakenza tshilema tshia kujinga kudibingisha ne: kavua ne kalema to. Pavuabu bayukile apu, kuvua nsonga mukuabu uvua musombe ubateleja, diende Elihu. Wakatuadija pende kuakula. Wakabela Yobo bua muvuaye kayi mujingulule ne: kubingisha bumfumu butambe bunene bua Yehowa Nzambi ke kuvua ne mushinga wa bungi menemene kupita dibingisha dia muntu kayi mukuabu yonso. Elihu wakabela kabidi balunda babi ba Yobo abu ne dîsu dikole.

Pashishe Yehowa wakayukila ne Yobo bua kuakaja ngelelu wende wa meji. Wakamueleshisha meji ne bintu bia dikema bia bungi bia mu bufuki bua kumuleja mudi muntu mushadile bikole pa kumufuanyikija ne bunene bua Nzambi. Yobo wakitaba mibelu ya Nzambi ayi. Bu mudi Yehowa muikale ne “dinanga dikole menemene ne luse,” wakajikija disama diende, kuvudijaye bubanji buende misangu ibidi kupita kumpala, ne wakamubenesha bua kulela bana bakuabu 10. (Yakobo 5:11) Pakalamaye muoyo wende mutoke mu ntatu mikole ayi, Yobo wakandamuna ku mashimi a Satana uleja ne: bantu badi mua kushala balamate Nzambi nansha padibu mu ntatu.

​​—Malu mangatshila mu mukanda wa Yobo.