Udi muindile tshinyi kumpala eku?

TSHIDI BIBLE WAMBA

“Nzambi . . . neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”​—Buakabuluibua 21:3, 4, Nkudimuinu wa bulongolodi bupiabupia.

MUDI MULAYI EU MUA KULENGEJA NSOMBELU WEBE

Mudimu muimpe udi ukusankisha.​—Yeshaya 65:21-23.

Masama ajika, makenga onso ajika.​—Yeshaya 25:8; 33:24.

Kuikala ne muoyo wa kashidi ne disanka pamue ne balunda ne balela betu.​—Misambu 37:11, 29.

TUDI NE BUA KUITABA TSHIDI BIBLE WAMBA ANYI?

Eyowa, bua malu abidi aa:

• Nzambi udi ne bukole bua kukumbaja malu adiye mulaye. Anu Yehowa nkayende ke utubu babikila mu Bible ne: “Wa Bukole Buonso,” bualu udi ne bukole budi kabuyi ne mikalu. (Buakabuluibua 15:3) Nanku udi ne bukole bua bungi menemene bua kulongolola malu bimpe pa buloba. Bible udi wamba ne: “Nzambi udi mua kuenza malu onso.”​—Matayi 19:26.

• Nzambi mmusue kukumbaja malu adiye mulaye. Tshilejilu, Yehowa udi ne ‘dijinga dikole’ dia kubisha bantu badi bafue.​—Yobo 14:14, 15.

  Bible udi wamba kabidi ne: Yezu Muana wa Nzambi wakondopa bantu bavua basama. Wakabondopa bua tshinyi? Bualu ke tshivuaye musue kuenza. (Mâko 1:40, 41) Pavua Yezu wambuluisha bantu, uvua uleja bimpe menemene mutu Tatu wende ne dijinga dia kuambuluisha bantu badi bakenga.​—Yone 14:9.

  Nunku tudi bajadike ne: Yehowa ne Yezu mbasue bua tuikale ne disanka matuku adi kumpala eku.​—Misambu 72:12-14; 145:16; 2 Petelo 3:9.