Makenga kaakujika anyi

TSHIDI BIBLE WAMBA

Nzambi ‘neabakupule binsonji bionso ku mêsu. Lufu kaluakuikalaku kabidi, nansha madilu, nansha miadi, nansha dikenga.’​—Buakabuluibua 21:3, 4, Mukanda wa Mvidi Mukulu [Mishonyi].

MUDI MVESE EU UKUAMBULUISHA

Udi umvua ne: Nzambi ki ngudi mukebeshe ntatu to.​—Yakobo 1:13.

Udi ukola ku muoyo paudi umanya ne: Nzambi mmumanye bimpe menemene mutudi tudiumvua patudi tukenga.​—Zekâya 2:8.

Udi upeta ditekemena dia ne: ntatu yonso neyijike.​—Misambu 37:9-11.

TUDI NE BUA KUITABA TSHIDI BIBLE WAMBA ANYI?

Eyowa, bua malu abidi aa:

• Nzambi mmukine makenga ne malu mabi. Tangila muvua Yehowa umvua pavuabu bakengesha bantu bende mu bikondo bia kale. Bible udi wamba ne: wakumvua bibi “bua bantu bavua babakengesha.”​—Balumbuluishi 2:18, Nkudimuinu wa bulongolodi bupiabupia.

  Nzambi udi unyingalala bikole bua aba badi bakengesha bakuabu. Tshilejilu, Bible udi wamba ne: Nzambi udi ukina “bianza bidi biela mashi adi kaayi ne bualu panshi.”​—Nsumuinu 6:16, 17.

• Nzambi udi utabalela yonso wa kutudi. Yehowa mmumanye ntatu ya muntu yonso anu mudi ‘muntu yonso mumanye dikenga diende ne lutatu luende.’​—2 Kulondolola 6:29, 30.

  Ku diambuluisha dia Bukalenge buende, Yehowa neajikije ntatu ne makenga bia muntu yonso mu matuku makese emu. (Matayi 6:9, 10) Kadi kumpala kua tshikondo atshi kulua, udi ukolesha ne dinanga dionso bonso badi bamukeba ne muoyo umue.​—Bienzedi 17:27; 2 Kolinto 1:3, 4.