Muntu udi ne bua kulongolola njila udi uledibua

Elizabeta ukavua pabuipi menemene ne kulela. Mulela wende Mariya uvua musombe nende kukavua ngondo isatu. Mpindieu dîba dikavua dikumbane bua Mariya kumulaya ne kuenza luendu lule mutangile ku nord bua kuya kuabu ku Nazaleta. Yeye pende uvua ne bua kulela muana wa balume mu ngondo mitue ku isambombo.

Matuku makese Mariya mumane kuya, Elizabeta wakalela. Mbualu bua disanka bua muvua Elizabeta mulele bimpe ne bua muvuaye yeye ne muana bikale ne makanda a mubidi mimpe! Pavua Elizabeta muleje bena mutumba ne balela bende muana, bakasanka pamue nende.

Nzambi uvua muelele bena Isalele mukenji wa ne: padibu balela muana wa balume, mu dituku dia muanda mukulu badi ne bua kumutengula ne kumuinyika dîna. (Lewitiki 12:2, 3) Bamue bakamona ne: bivua bikengela kuinyika muana au dîna dia tatuende Zekâya. Kadi Elizabeta wakabenga wamba ne: “Tòo, kadi nebamuinyike ne: Yone.” (Luka 1:60) Vuluka ne: muanjelu Gabaliele uvua muambe ne: badi ne bua kuinyika muana eu dîna dia Yone.

Bena mutumba ne balela bavua babenga bamba ne: “Kakuena mulela webe nansha umue udibu binyike dîna edi to.” (Luka 1:61) Badi banyungisha bianza bakonka Zekâya dîna divuaye musue kuinyika muana. Ke Zekâya kulombesha kabaya ne kufundapu diandamuna diende ne: “Yone ke dîna diende.”​—Luka 1:63.

Ke muakulu wa Zekâya kupingana mu tshishima. Vuluka ne: uvua mujimije muakulu pavuaye mubenge kuitaba tshivua muanjelu mumuambile, tshia ne: Elizabeta uvua ne bua kulela muana wa balume. Nunku mpindieu, pakakula Zekâya, bena mutumba bende bakakema badikonka ne: “Muana eu nealue nganyi?” (Luka 1:66) Mbamone tshianza tshia Nzambi mu mushindu uvuabu binyike Yone dîna.

Pashishe, Zekâya uvua muwule tente ne nyuma muimpe wakamba ne: “Yehowa, Nzambi wa Isalele, atumbishibue, bualu mmutume ntema yende kudi bantu bende ne mmubatuadile lupandu. Mmutujudile lusengu lua lupandu mu nzubu mua Davidi muena mudimu wende.” (Luka 1:68, 69) Pavuaye mutele “lusengu lua lupandu,” uvua wakula bua Mukalenge Yezu uvua ne bua kulua kuledibua. Zekâya udi wamba ne: ku diambuluisha dia Yeye au, ‘tuetu bamane kupikudibua mu bianza bia bena lukuna, Nzambi neatupeshe diakalenga dia kumuenzela mudimu wa tshijila kakuyi buôwa ne lulamatu ne buakane kumpala kuende matuku etu onso.’​—Luka 1:74, 75.

Zekâya wakadianjila kuamba bua muanende ne: “Wewe, muana mutekete, nebakubikile ne: muprofete wa Mutambe Bunene, bualu neudianjile kumpala kua Yehowa bua kulongolola njila yende, bua kupesha bantu bende dimanya dia lupandu ku dibuikidibua dia mpekatu yabu, bua luse lunene lua Nzambi wetu. Ku luse elu, butoke bua patshiatshia nebulue kutudi bufumina muulu, bua kutokesha badi basombe mu mîdima ne mu mundidimbi wa lufu ne bua kuludika makasa etu mu njila wa ditalala.” (Luka 1:76-79) Aa mmêyi a buprofete adi akankamija!

Mpindieu Mariya uvua bushuwa kayi muanji kusedibua wakafika kuabu ku Nazaleta. Ntshinyi tshiamufikila pamuenekabi bimpe ne: uvua ne difu?