Bakafutshibua bua ngendelu kayi kadiwu

YEHOWA utu ubenesha ne ufuta basadidi bende ba lulamatu. Pakuabo apa, badi ne bua kuindila mutantshi bua kumona diakana dia bipatshila bia Nzambi, kadi ndisanka kayipu didiku padi mabenesha ende apetshibua!

Biakalejibua nunku’eu kukadi bidimu bitue ku binunu bibidi, bua Zakâya muakuidi muena Yuda ne mukaji’ende Elisabeta, buonso bena dîku dia Alona. Nzambi uvua mulaya bena Izalele dibabenesha mu dibapa ndelanganyi bu buobo ne bua kumutumikila ne lulamatu. Wakamba ne: bana badi difutu. (Lewitiki 26:9; Musambu wa 127:3) Nansha nanku, Zakâya ne Elisabeta bakavu banunu, kabayi ne muana.​—Luka 1:1-7.

Mifundu idi yamba ne: Zakâya ne Elisabeta “bubidi buabo bakadi bakane ku mesu kua Nzambi, bakadi balonda mikenshi yonso ya Mukelenge ne mei andi, kabakadi ne bualu.” (Luka 1:6) Bavua batambe kunanga Nzambi bikole ne kabayi bamona kuenda biakane ne kulama mikenji yende bu bujitu nansha.​—1 Yone 5:3.

Mabenesha kaayi matekemena

Tuanji kupinga ku ndekelu wa printemps anyi mbangilu wa été wa tshidimu 3 K.B.B. Herodese Munene ke udi mukalenge mu Yudeya. Dimue dituku, muakuidi Zakâya udi ubuela mu Tshitupa tshinsantu tshia ntempelo mu Yeruzaleme. Padi bantu bunguile pambelu mu disambila, udi wuosha kamonya pa tshialtare tshia or. Pamue apa biangatshibue bu mudimu udi mutambe mikuabo ya matuku wonso, mudimu eu udi wenzeka panyima pa dilambula mulambu. Muakuidi uvua mua kupeta tshia diese etshi amu musangu umue mu matuku a muoyo wende.

Zakâya kena witabuja mêsu ende. Tangila, muanjelo wa Yehowa mmuimane ku luseka lua balume lua tshialtare tshia kamonya! Muakuidi mununu udi upampakana ne utshina. Kadi muanjelo udi wamba ne: “Zakâya, kutshinyi, bualu bua bakunvua kulomba kuebe, mukashi webe Elisabeta neakulelele muana, neumuidike ne, Yone.” Eyowa, Yehowa wakumvua malombu a disuminyina a Elisabeta ne Zakâya.​—Luka 1:8-13.

Muanjelo ekusakidila ne: “Wewe newikale ne diese ne disanka; bantu ba bungi nebasanke bua kuledibua kuandi. Yeye neikale muntu munene ku mesu kua Mukelenge; kanu biandi nvinyo ne bintu bidi bikuatangana; yeye neûshibue tente ne [spiritu munsantu, NW] diambedi mamu wandi kai muanze kumulela.” Yone neikale matuku ende wonso Munazi mûle ne spiritu wa Nzambi. Muanjelo udi utungunuka: “Yeye neakudimushe mitshima ya bana ba Isalele ba bungi kudi Mukelenge Nzambi wabo. Yeye neaye ku mpala kuandi ne nyuma ne bukole bia Eliya, bualu bua kuhingisha mitshima ya batatu kudi bana, ne bua kualukisha bena buhidia ku meshi a badi bakane; ne bua kulongoluela Mukelenge bantu badi ne mitshima yabo mimana kulongolola.”​—Luka 1:14-17.

Zakâya udi webeja ne: “Nemanye bualu ebu munyi? Bualu bua meme ndi muntu mununu, ne mukashi wanyi udi ne bidimu bia bungi.” Muanjelo ekumuandamuna: “Ndi bianyi Gabaliele, ntu ngimana ku mesu kua Nzambi; nakutumibua bua kuakula n’ebe ne bua kukuluila ne lumu luimpe. Tangila, wewe neuhue, kuena umanya mua kuakula tô ne halua dituku dialua malu â, bualu bua wewe kuakuitabusha mei anyi, neajalame dituku dialua malu au.” Padi Zakâya uluhuka mu ntempelo, kena wakula, ne bantu badi bamanya ne: mmumona tshikena-kumona. Tshionso tshidiye mua kuenza, nkumanyisha ne bianza, bua kumvuija meji ende. Padi mudimu wende ujika, udi upinga kuende.​—Luka 1:18-23.

Muanda wa disanka

Amu bu muvuabo balaya, Elisabeta udi mpindieu ne kabingila ka kusanka. Udi wimita difu, kufulaye bundu bua muvuaye nkumba. Mulela wenda, Mariya, udi upeta pende disanka, bualu muanjelo umue umue au, Gabaliele, udi umuambila ne: “Mona, wewe newimite difu, neulele muana mulume, neumuidike ne, Yesu; yeye neikale munene, nebamuidike dina ne Muana wa Udi Mutambe Bunene wa mu diulu; Mukelenge Nzambi neamuhe nkuasa wa butumbi wa tatu wandi Davidi.” Mariya mmusanke bikole bua kuikala “mupika mukaji wa [Yehowa, NW]”​—Luka 1:24-38.

Mariya udi uya lukasa kua Zakâya ne Elisabeta mu musoko mukuabo mu ditunga dia mikuna mu bena Yuda. Pakumvua disekelela dia Mariya, muana udi munda mua Elisabeta udi utupika ne disanka. Ku buenzeji bua spiritu munsantu wa Nzambi, Elisabeta udi wela dîyi dikole ne: “Wewe udi mukashi mutambe kusankishibua, muana udi munda muebe udi muvudishila disanka. Bualu ebu bua kulua kundi munyi, bua mamu wa Mukelenge wanyi wakulua kundi? Hakubuela dî dia muoyo uwakungela mu matshu anyi, muana wakutabuluka mu difu dianyi bualu bua disanka. Mukashi wakitabusha udi ne disanka, bua nebashikishe malu onso akamuambilabo kudi Mukelenge.” Mariya udi wandamuna ne disanka dinene. Disomba diende ne Elisabeta nedinenge pamue ne ngondo isatu.​—Luka 1:39-56.

Kuledibua kua Yone

Padi tshikondo tshiakana, muana wa balume udi uledibua kudi Elisabeta ne Zakâya, buonso buabo banunu. Dituku dia muanda mukulu, muana udi utengudibua. Balela mbasue kuidika muana dîna ne, Zakâya, kadi Elisabeta udi wamba ne: “Tô, nansha! kadi neabikidibue Yone.” Bayende utshidi kamama, udi wanyisha anyi? Udi ufunda pa mukanda ne: “Yone ndiende dina.” Dia kamue, ludimi lua Zakâya ludi lusuluka, ne utuadija kuakula, ubenesha Yehowa.​—Luka 1:57-66, NW.

Mûle ne spiritu munsantu, muakuidi eu ne disanka udi wamba malu mu tshiprofete. Udi wamba bu mudi Musungidi mulaya​—‘lusengu lua lupandu mu nzubu mua Davidi’—​mumane kupatula bilondeshile tshiovo tshia Abrahame bua Kankanunuina kalua kusankisha bisamba bionso. (Genese 22:15-18) Bu mudiye mudianjidi wa Masiya, muana mulela wa Zakâya mu mushindu wa tshishima, ‘neaye kumpala kua Yehowa bua kupesha bantu dimanya dia lupandu.’ Mu kupita kua bidimu, Yone uvua udiunda ne ukola mu spiritu.​—Luka 1:67-80, NW.

Bafutshibua bia bungi

Zakâya ne Elisabeta bavua bilejilu bimpe bia ditabuja ne lutulu. Bakatungunuka kukuatshila Yehowa mudimu ne lulamatu nansha muvuabo ne bua kuindila kudi Nzambi, ne mabenesha abo matambe bunene akalua amu pakavuabo ne bidimu bivule.

Kadi, mmabenesha kayipu akapetabo kudi Elisabeta ne Zakâya! Ku buenzeji bua spiritu wa Nzambi, buonso buabo bakamba malu mu tshiprofete. Bakapeta diese dia kulua baledi ne balongeshi ba mudianjidi wa Masiya, Yone Mubatiji. Kupite apu, Nzambi wakabangata bu bakane. Bia muomumue, aba badi batungunuka lelu mu njila wa Nzambi badi mua kuangatshibua bu bakane kudi Nzambi ne nebapete mafutu a disanka mavule bua ngendelu kayi kadiwu mu mêyi-matuma a Yehowa.